【全劇終】《我喺街執咗個失憶嘅女仔返屋企》: 記憶中的女孩（下）

食完下晝飯之後，我又番返同一棵樹上面，仲俾我發現到原來再爬高啲嘅話，就可以望到前方嘅一片海洋，同埋旁邊嘅燈塔。
 
眼前呢片風景，我想將佢地統統收進畫簿，於是開始動筆，直到冇幾耐之後聽到拉開窗簾嘅聲音——
 
我往聲音來源望去，係尋日個女仔。佢就打側瞓咗喺窗邊，用佢嗰一雙淡紫色嘅眼睛注視窗外某一片風景，我跟住佢視線望，發現佢望緊嘅同我頭先畫緊嘅都係同一樣嘢：
 
前方嘅海洋，仲有旁邊嘅燈塔。
 
不過同尋日一樣，嗰對淡紫色眼睛睇起嚟依然了無生氣。
 




可能因為我爬得高過尋日，個女仔冇發現我嘅存在，就咁樣躺在窗旁，而我都暫時將注意力放返喺眼前嘅風景畫上。
 
個女仔一直維持同一個動作，明明望住咁靚嘅風景，但表情一啲都唔開心。
 
我將眼前嘅畫面畫低咗，就喺同一幅風景畫裏面——躺在窗邊嘅女孩，遙望遠方嘅景色。
 
到差唔多畫完嘅時候，天空已經出現日落嘅徵兆。
 
「…弊，要快啲返入去。」爸媽叮囑過我要喺晚飯前返到大屋，於是我趕快收拾帶嚟嘅畫具。
 




我將畫簿同畫具放入隨身行裝，準備企起身嘅時候，忽然腳下一滑——
 
「…哇啊啊啊！」
 
棵樹距離地面有一段高度，呢度跌落去嘅話絕對會跌得好慘，而且唔使諗都知會被大人鬧死——
 
本能反應驅使下，我雙手奮力亂抓，喺跌落地面前觸碰到某種堅硬材質。
 
我睜開眼睛，發現自己正懸吊在二樓某個露台外。
 




被眼下嘅高度所嚇倒，我發出慘叫聲：「…哇啊啊啊！」
 
與此同時，支撐住全身重量嘅手逐漸變得無力，眼看快要跌落去。
 
呢個時候，有一對手從上方伸出，捉住咗就嚟跌落去嘅我。
 
嗰對手嘅主人望住我，講咗一句我聽唔明嘅語言。
 
「…你講咩呀？」
 
雖然出咗少少狀況，但今次係我第一次喺近距離之下注視嗰一雙淡紫色嘅瞳孔。
 
唔止咁，我仲得以望清呢個女仔嘅外貌，佢留住一把及腰嘅長髮，身上著住嘅係一套白色連身薄紗裙。
 
佢吸咗一啖氣，然後用有啲生澀嘅口音講：




 
「捉實我。」
 
十二年前，夏。