【全劇終】《我喺街執咗個失憶嘅女仔返屋企》: 尋找希望（二）

「希渝？兩個字都咁難，可唔可以寫出嚟？」個男仔對我提出同一請求。於是我喺頭先佢寫咗帆字嘅紙上面寫下自己名字。
 
「呢個名，係點解？」佢問。
 
「…唔係好嘅意思，我已經查過。」
 
「點會？」個男仔喺我手中搶過字典，「一定係你搞錯，我幫你搵多次。」
 
「你搵幾多次都唔會改變。」
 




佢聽到之後，原本望住字典嘅雙眼忽然抬起，臉上掛著稍微認真嘅表情：「你唔單止表情好悲傷，就連講嘅嘢都咁悲傷。」講完又埋頭喺字典裏面。
 
揭咗一陣之後，佢興奮大叫：「有喇有喇！」
 
「渝…我唔識睇之後啲解釋，係咩意思？」佢將本字典轉過來。
 
我一眼都冇望過就答佢：「係變化。」
 
「變化…即係改變呀？」佢側頭問。
 




「嗯，所以我個名係會改變嘅希望，即係捉唔到嘅希望。」
 
佢嘆一口氣：「我話你…呢個解釋會唔會太過夾硬嚟。」
 
「唔會，」我低頭，望住被繫在腳上嘅厚重物體，「呢個就係證據。」
 
個男仔沿我視線望去，然後驚訝：「呢個咩嚟架？」
 
「腳鐐，亦都係對我嘅愛——媽媽係咁講。」
 




「你話呢樣嘢係愛？但係你俾呢樣嘢鎖住咪郁唔到囉？」
 
「嗯，所以唔會搵到希望。」
 
「…你講得太悲傷喇。」
 
「你覺得好悲傷？」
 
佢點頭：「嗯，超悲傷，你嘅表情都係。」
 
「點解你咁講？」
 
佢突然拎咗一幅畫出嚟：「因為，只要望吓呢幅畫就知道。」
 
「…畫？」




 
「嗯。」
 
畫裏面係一個躺在窗邊嘅女孩，正在遙望遠方景色。
 
「…呢個係我？」
 
「嗯，喺出面唔覺意望到，就開始畫。」佢聳一下肩。
 
我仔細望咗幅畫一陣，然後講：「你畫畫好靚。」
 
「嘛…」佢撇過視線，臉上出現些許紅暈。
 
望住佢呢個樣，我偷偷地笑：「唔係每日都畫嘅話，應該畫唔到啲咁靚嘅畫。」
 




「…的確有每日都畫，因為阿爸阿媽睇到會好開心，同埋我本身都鍾意畫。」佢一邊講一邊搲頭。
 
「你好犀利。」
 
「但係，畫笑嘅表情果然係容易過畫悲傷嘅表情。」
 
畫入面嘅女孩，正如佢所講般掛住悲傷表情。
 
「咁你再畫過？今次將佢畫成喺度笑。」
 
「畫唔到。」佢一口回絕。
 
「點解？」
 
「因為畫入面嘅女仔，即係你，本身就係咁悲傷。」




 
「…對唔住。」我低頭。
 
「…邊有人會特登道歉架？你果然係怪人。」
 
佢冇再理我，開始喺度畫畫。
 
過咗一陣，我忍唔住問：「你畫緊咩？」
 
佢一直望住幅畫，隻手冇停過落嚟：「嗰個，痛唔痛架？」
 
「嗯？」
 
「我係指呢樣嘢。」佢舉起咗幅畫俾我睇，畫入面係腳鐐，同我腳上嘅一模一樣。
 




我垂低頭：「痛，不過我慣。」
 
佢合上畫簿，忽然企起身走到我身旁，開始研究我腳上面樣嘢：「…原來係咁。」
 
然後，佢雙手各執一邊，用力一扯——
 
「…你想做咩？！」
 
佢笑：「整爛佢囉，冇咗呢樣嘢嘅話，你應該就會笑。」
 
「等陣…！」我下意識縮起雙腳。
 
佢不停用力拉扯，理所當然半點效用都冇。過咗一陣佢應該發現到呢點，所以終於停手。
 
「唔會有用架。」
 
佢似乎用力過度，有點喘氣：「果然單靠兩隻手係打唔爆呢舊嘢。」
 
此時，房間外傳來某人嘅聲音：「希渝！我帶咗新字典嚟呀！我地一齊睇吖！」
 
「係羅凱撒…。」
 
個男仔聽到之後起身：「咁，我都係時候返落去。」
 
「你要走嗱？」
 
「嗯，唔想爸媽擔心。」
 
「拜拜。」
 
「拜拜！聽日一齊再玩過！」
 
「嗯！」或者係久違地識到新朋友，內心好耐未試過咁期待。
 
「你笑嗰陣果然好好睇，你應該笑多啲。」
 
聽完佢咁講，我先知道自己臉上掛著笑容。
 
「我入嚟喇——」話音未落，房門已經被打開，羅凱撒一見到個男仔就大叫，「你係邊個呀？」
 
個男仔趁機跑向打開嘅房門：「殊！我借部psp俾你玩，你幫我保守秘密！拜拜！」
 
等到個男仔走咗之後，羅凱撒問我：「頭先嗰個到底邊個嚟架？」
 
「係新朋友。」
 
「新朋友？幾時識架？」
 
「就喺啱啱。」
 
「原來係咁，係個點嘅人？」
 
「…一個好有趣嘅人。」
 
「真係？我又想同佢一齊玩。」
 
「嗯！下次我地三個一齊睇字典！」我接過羅凱撒帶嚟嘅新字典，細聲唸咗一次個男仔嘅名——
 
「…高田帆。」