【全劇終】《我喺街執咗個失憶嘅女仔返屋企》: 記憶中的女孩（上）

嚟到呢個地方之後，已經過咗五日。
 
雖然確切表達過唔想嚟嘅意願，但爸媽話佢地都走晒嘅話屋企就會冇人睇住我，所以跟埋嚟係唯一選項，即使我內心有嘅係一萬個唔願意。
 
我地嘅落腳點係一間兩層高嘅獨立屋，外面有好大嘅花園，聽講連啲樹都係間屋嘅主人所有；爸媽每日都會匿喺某間房，同其他大人傾住啲不知名嘅議題，同我一啲關係都冇嘅事。
 
我對呢個地方嘅印象係除咗悶之外，都係悶。
 
所以，我成日問：「幾時走得呀？」
 




呢個時候，爸媽就會答：「我地有啲好重要嘅公事同人傾緊，你自己去畫畫好冇？」
 
「…嘖。」我細聲抱怨，轉身就走。
 
好在有帶畫簿，所以我可以畫畫。呢度冇嘢好，除咗風景幾靚之外。
 
我喺大屋旁邊搵咗一棵樹，花咗啲時間爬上去之後，就開始我嘅寫生活動。
 
畫畫吓，忽然間覺得有人喺同一視平線嘅高度望住我。
 




我望吓兩邊，距離我最近嘅落地窗屬於二樓一間長期拉埋窗簾嘅房，間房出面仲有個小小嘅露台。
 
不過，頭先電光火石嘅瞬間，我絕對見到有人偷偷拉開窗簾，眼定定向我呢邊望過來。
 
然後，察覺到我望向佢之後，佢又即刻拉返埋窗簾。
 
奇怪嘅人。
 
第二日，當我照樣爬上樹，諗住靠畫畫渡過整個上晝嘅時候，我發現尋日嗰間房嘅窗簾打開咗一半。
 




我好奇呢間房裏面究竟係點嘅樣，於是傾前身，想要擴闊視野範圍。
 
然後，我見到一個女仔喺度瞓緊覺。
 
唔係瞓床，而係就咁瞓咗喺地下，蜷縮著身體。
 
…明明有個同我差唔多大嘅女仔喺呢間屋裏面可以一齊玩，阿爸阿媽佢地又唔同我講。雖然要我同女仔玩，我本身都唔係幾想，不過起碼…
 
諗緊呢堆嘢嘅同時，個女仔醒咗。
 
我被佢嚇親，一時間唔記得撇開視線。
 
佢慢慢睜開雙眼，埋藏喺眼眶裏面嘅係一雙紫色嘅瞳孔。
 
只係，望落去一啲生氣都冇。




 
佢個樣有啲疑惑，向住我呢邊眨咗兩吓眼。意識到同佢對望緊之後，我立即別過視線，畢竟爸媽講過偷望其他人唔係一個好好嘅行為。
 
冇幾耐之後，間房又閂埋咗窗簾。
 
我將注意力放返喺本畫簿上面，但愈畫愈覺得今日嘅風景，好似變得比尋日無聊。
 
腦海充斥頭先屬於個女仔嘅一對紫色眼睛。
 
「…都未見過有人對眼係紫色。」我自言自語，然後喺隨身行裝裏面拎返冇幾耐之前畫嘅一幅畫出嚟——上面畫咗冇出世嘅阿妹同龍貓，「你覺得呢？」
 
我將畫裏面阿妹對眼改成淡紫色，就同頭先窗邊個女仔一樣，因為我諗女仔都係鍾意差唔多嘅顏色。