【全劇終】《我喺街執咗個失憶嘅女仔返屋企》: 對話（中）

羅凱撒繼續講落去：「你仲記唔記得你同小悠嘅相遇係點？」
 
雖然唔明佢呢個問題嘅意義，不過我照樣回憶起當時嘅片段：「點會唔記得？佢嗰陣喺垃圾房入面走出嚟。」
 
羅凱撒微笑：「然後呢？」
 
「跟住佢話自己咩都唔記得晒，又話自己會閃靈，總之就極度麻煩…」
 
「閃靈？」
 




「…個名係我求其改嘅，啱啱遇見小悠嗰陣佢話自己成日暈低之後就會去咗另一個地方…不過呢樣嘢唔重要啦，因為我已經知道佢只係亂噏。」就喺繁星祭嘅前一夜，小悠喺學校天台同我坦白，仲俾我發現佢偷偷喊過。
 
羅凱撒唔知幾時開始用手掩住咗嘴，指縫間漏出零碎笑聲：「對唔住，雖然好失禮…但你先俾我笑完。」
 
我唔知羅凱撒係笑緊我咁嘅大話都信，定係笑緊小悠咁嘅大話都講得出，抑或單純笑緊「閃靈現象」呢個白痴名，不過我姑且等佢笑完。
 
冇幾耐，羅凱撒嘅笑聲終於停止：「咳咳，我地可以繼續。」
 
「唔止咁，佢仲要同樓下看更夾埋扮鬼嚇我，搞到我入醫院…。」
 




羅凱撒又斷斷續續笑咗一陣：「扮鬼、扮閃靈…真係聞所未聞，果然好有希渝嘅風格。」
 
我嘆一口大氣，與此同時腦入面出現嘅係小悠偶然就會表現出——亦即係我稱之為空悠嘅另一面：「如果我冇估錯，佢話自己失憶都係假架啦？」
 
「喺學校度重遇佢之後，佢就叫我幫佢保守呢個秘密。」羅凱撒冇正面回答，某程度上已經默認我頭先嘅推測。
 
「我可唔可以問你兩個問題？」得到羅凱撒點頭回應後，我稍為將腦裏嘅疑問整理一下，「咁校監之前講嘅幽靈學生係？仲有，你頭先話重遇係咩意思？」
 
雖然靠住小悠寫嗰封謎之信件上面啲小學雞字跡，我都幾乎肯定佢同羅凱撒並唔係開學先認識；不過我需要聽羅凱撒嘅說明。
 




佢發出招牌冷笑：「幽靈學生純粹係指小悠嘅資料冇交到上教育機關，你就理解成佢以一個旁聽生身分嚟到我地學校讀書；至於你第二個問題…」
 
講到呢度佢啪一吓手指，頭先個疑似管家就捧住一個冚咗蓋嘅銀色碟現身。
 
我以為係講到一半大家開始肚餓所以有嘢食供應，點知羅凱撒從碟上取下嘅，係一張一睇就知唔食得嘅物體。
 
佢將手上啲嘢放到茶几上，我得以睇清楚原來係一幅相。
 
「…相？」
 
佢指住相裏面嘅內容：「嗯，所以係『重遇』；唔止我，你喺垃圾房遇到小悠嗰次，都係重遇。」