【全劇終】《我喺街執咗個失憶嘅女仔返屋企》: 對話（下）

我望住被放在茶几上嘅相。
 
相嘅正中間係一部從正面影過去嘅三角琴，前面坐咗兩個細路，一個係背對鏡頭彈緊琴嘅男仔；另一個係面向鏡頭發出腼腆笑容，長髮及腰嘅女仔。仲有一個拎住部psp挨喺部琴隔離，顯然專注於打機嘅男仔。
 
「…點解我冇印象，自己影過呢幅相。」相入面嗰部藍色psp的確係我嘅，個男仔身上件比卡超t-shirt都的確係我嘅，但我就係冇印象自己幾時影過呢幅相。
 
照咁樣睇，背對鏡頭嘅應該就係羅凱撒，而嗰個女仔就更加易認——因為除咗頭髮長咗好多之外，佢嘅外貌基本上係迷你版嘅小悠。
 
「睇嚟失憶嗰個唔係小悠而係你，」羅凱撒講到一半停咗停，然後繼續，「不過都唔可以怪你，畢竟對你嚟講喺嗰個島度過嘅日子就只係僅僅嘅幾日。」
 




我拼命想要回憶起呢幅相嘅緣由，但就好似去到一個充滿既視感嘅地方，卻諗唔起自己幾時到訪過一樣，徒勞無功。
 
我正想追問關於呢幅相嘅事，羅凱撒一直望住牆上掛鐘。
 
數秒之後，背後響起來自掛鐘嘅報時聲，嚇到我差啲成個彈起。
 
佢無視我嘅失禮：「哼，時間啱啱好。」
 
「…吓？」
 




羅凱撒重新望向我：「你應該有好多嘢想問，不過我唔係解答你嘅最佳人選。」
 
「你個樣話俾我聽你喺度計劃緊啲嘢…而且通常唔係一件好事…。」
 
「你果然…同以前一樣，一啲都冇變。」講呢句嘅時候，佢微笑。
 
與此同時，外面一陣嘈吵嘅雜音——未去到震耳欲聾，但足以令人要掩住耳仔嘅程度。
 
「你冇聽錯，係我屋企架私人飛機嘅聲。」
 




「私、私人飛機？？！」我大叫，但大唔過逐漸迫近嘅引擎聲。
 
「之前喺學生會室我話過爭你一個人情，而家就係還呢個人情嘅時候…。」
 
「呢個人情…會唔會誇咗啲…」
 
佢對我嘅反應視若無睹：「證件行李嗰啲我之後會幫你準備，而家上機應該會快過普通航班去到。」
 
「…你想夾我去邊？」
 
佢將嗰幅我地三個人嘅合照交到我手中：「去搵相裏面個女仔，佢先係解答你嘅最佳人選。」
 
「…係就係，但會唔會倉卒咗少少。」我摷勻全部，除咗基本跟身嘢之外，就只係得小悠臨走前寫俾我嗰封信，同埋佢還俾我嗰幅畫咗女孩同龍貓嘅畫。
 
望一眼幅畫，依舊係同小悠外貌相似嘅女孩，仲有佢隔離嘅龍貓。




 
「原來希渝臨走前仲寫咗封信俾你，咁佢有冇喺信裏面解釋一切？」羅凱撒望住我手上封信問。
 
手上嘅信同埋舊畫作提醒咗我，由喺禮堂打俾小悠，直到嚟到羅凱撒屋企，呢短短數個小時內我所接收嘅訊息量令我忘記咗一樣嘢。
 
我打俾小悠，純粹就係想同佢講我會等佢；而呢句說話，折騰咗成晚都係未傳達到。
 
羅凱撒托一下眼鏡，重覆頭先嘅問題：「我問你希渝佢有冇喺信裏面…」
 
佢未講完，我就搖頭：「係小悠。封信係小悠臨走前寫俾我。」
 
「意味不明…。」羅凱撒爆咗一句日文，然後托眼鏡，「學校嗰邊我會幫你解釋，唔好浪費我屋企架私人飛機。」
 
我抱住豁出去嘅心態接受咗羅凱撒嘅好意，理由一定唔係因為瞥見羅凱撒身後嘅管家臉上嘅凶狠表情，彷彿告訴我一係上機，一係死。
 




臨走前，我問咗羅凱撒一個無聊問題：
 
「知唔知小悠要去嗰個地方有冇繽紛樂賣？」
 
聽完，佢回答：「唔知，不過你可以去揾吓。」
 
我笑，諗起某次同小悠談論起佢即將要去嘅係個點嘅地方。
 
「…果然係個冇人識嘅島。」
 
於是，帶住小悠留低嘅一封信，仲有一幅畫，我（喺羅凱撒個私人機師陪伴下）展開咗孤獨嘅越洋過海之旅。