【全劇終】《我喺街執咗個失憶嘅女仔返屋企》: 對話（上）

位於遠郊之外嘅一棟三層高獨立屋內，一身管家打扮嘅人將注滿不知名褐色飲料嘅精緻茶杯放到我面前嘅茶几上，講咗一句「請慢用」然後走人。
 
「…唔該。」喉嚨裏發出嘅聲音稍嫌乾澀，嗰個管家打扮嘅人唔知係聽到定聽唔到，並冇理會我就踏出咗房間。
 
「唔使咁拘謹，當自己屋企得喇。」坐喺我對面嘅羅凱撒翹起雙腳，面帶餘裕地微笑。
 
「雖然你咁講…」背後係咁大個人都未坐過咁舒服嘅絨質梳化，不過高級材質嘅柔軟未能抵消當刻嘅緊張感。
 
至於我點解會喺羅凱撒屋企，則要追溯30分鐘前。
 




「希渝…」由紫悅嘴裏聽到嘅人名，並唔係我首次聽見。
 
——嗰封我叫夕嵐幫我翻譯嘅謎之信件。
 
本身我手上只有透過訊息收到嘅超低清版本，不過年假嘅時候，阿爸阿媽久違地從外地返咗嚟，帶嚟嘅唔止係多國手信，仲有謎之信件嘅真跡。
 
然後我發現，我一直以為冇署名嘅信件，翻轉後面原來有第二頁。貌似因為唔夠位，所以寫信嘅人至會將自己個名寫喺背面。
 
而嗰個名，就係希渝。我冇估錯嘅話，呢個希渝亦都係小悠。
 




所以從禮堂離開之後，我返咗屋企拎返呢封謎之信件，望住上款寫住嘅羅凱撒三個字，打咗一個電話：
 
「羅凱撒，我有嘢要代小悠俾返你。」
 
時間回到現在。
 
羅凱撒依然維持翹腳坐姿，拎起茶杯呷咗一口裏面嘅液體，不慌不忙地說道：「所以，你話要代佢俾返我嘅嘢係？」
 
我從懷中取出嗰封由希渝所寫嘅信件，放到茶几上，再向羅凱撒嘅方向推去。
 




羅凱撒眼裏首先閃過驚訝，隨後好似想確認啲咩一樣，輕輕拿起茶几上嘅信紙，開始閱讀信上嘅內容，目光隨著眼球移動而變得柔和。
 
我一直默不作聲，靜待羅凱撒嘅回應。
 
閱畢，佢閉上雙眼，兩秒後再度睜開：「估唔到唔見咗十幾年嘅嘢都可以搵返，今次真係要多謝你。」
 
唔知道係因為離開咗學校呢個地方，抑或係佢手上封信嘅關係，眼前嘅羅凱撒所散發嘅氣場明顯同平時有所不同，至少係令人覺得容易相處嘅類型。
 
「呢封信係小悠交俾你？」羅凱撒問。
 
我搖頭：「係我父母俾我，雖然我都唔知點解封信會喺佢地度。」
 
「你唔諗住問我？」
 
我再度搖頭：「開學到而家，你要答一早答咗。」




 
佢將目光投向牆上掛鐘，片刻後開口：「而家係九點半，希渝應該上咗飛機，即係話我同佢嘅約定已經完結，」講到呢度佢冷笑一聲，「佢大概冇諗過，我會擅自幫呢個約定設下期限。」
 
面對一如以往嘅兜大圈+略帶中二嘅講嘢方式，我仍然一頭霧水：「咩約定？」
 
佢再次呷一口茶，然後施施然回答：
 
「我要幫佢保守秘密嘅約定。」