【全劇終】《我喺街執咗個失憶嘅女仔返屋企》: 繁星祭篇：陌生的名字

望住手裏嘅一幅畫——一幅早就俾我整唔見咗嘅畫，我有啲唔真實嘅感覺。
 
呢一份就係小悠喺信裏面話要物歸原主嘅禮物。
 
我拎部電話出嚟，打咗俾應該同人食緊最後晚餐嘅小悠。
 
電話響咗一陣就接通，不過對面冇聲音傳來。
 
我冇多加理會：「喂。」
 




小悠依然冇出聲，但我繼續講：「我搵到你講嗰份禮物喇，喺禮堂。
 
「…雖然我好想知點解你會有呢幅畫，不過睇你封信嘅內容，你都冇諗過答我呢個問題架喇。
 
「所以，我就咩都唔問，淨係帶住感謝去接受你呢份禮物。以後畫到氣餒嗰陣呢，就會拎返幅畫出嚟睇。」
 
對面一片寂靜，只係得少許雜音。
 
「喂，你唔係開咗speaker吓嘩…？」唔知點解我想像到另一邊嘅畫面係小悠臉上掛住惡作劇嘅笑容，一邊聽住我呢通電話，一邊示意其他人安靜。
 




我嘆一口氣，對面都係冇反應。
 
不過就算佢真係開咗speaker，將我所講嘅說話分享俾全世界知道，都無阻我打呢個電話嘅目的。
 
除咗同佢講我已經搵到佢份禮物之外，更重要嘅係坦率地向佢傳達內心嘅想法。
 
「…多謝就講完嘞，跟住落嚟同你講嘅係另一樣嘢。
 
「雖然運動會之後有一次諗過同你講，但準備講嗰陣，嗰次你又咁啱話要去追夢…所以最尾我都係冇講到。
 




「但我喺度諗，兩樣嘢或者唔應該拉埋一齊講，你有你去追夢，我有我鍾意你。嗯，雖然你聽完可能覺得好驚訝，因為我自己都覺得好驚訝，但呢一句就係我想同你講嘅嘢，我鍾意你，請你繼續留喺我身邊。
 
「——雖然好想咁講。不過呢幾個月以嚟望住你臉上嘅表情，我知道你係好認真想要實現你嘅夢想，題外話：就算係而家我依然覺得呢個夢想就只有你呢個白痴先諗得出。
 
「所以，不如我地做個約定。喺你成功拯救一千隻…都係唔好，一百隻啦。喺你成功拯救一百隻龍貓之後，我會將頭先句說話再講一次俾你聽，到時候…」
 
「唔好再講喇。」對面嘅一把聲音打斷我，但呢把聲唔係屬於小悠。
 
「…邊個？」
 
我隨即記起，呢把令我有印象嘅聲音係屬於嗰個叫紫悅嘅人。
 
「…點解會係你架。小悠呢…」發出嘅聲線聽起嚟充滿無奈，原因只有一個，就係頭先講咗咁大段羞恥度100％嘅說話，居然俾呢個叫紫悅嘅人聽到晒（其他人我唔介意，不過就係唔想俾佢聽到，可能因為我知道佢係羅凱撒嗰邊嘅人，畢竟之前紫悅以羅凱撒親屬嘅身分參加學校運動會），而更重要嘅係，小悠唔知有冇一直聽緊。
 
「小悠已經唔再存在，所以你可以收線。」佢突如其來又一句九唔搭八。




 
「…你可唔可以俾返個電話小悠？」
 
「唔需要，都冇呢個必要，對住你呢啲蠢人…係咁。」
 
我叫住佢：「喂唔好收線住呀。」
 
對面嘅紫悅大概已經將電話拉遠，所以聲音聽起來變得隱約：「再講落去，希渝就唔捨得走。」
 
電話裏面傳來掛斷嘅提示音。
 
雖然唔算好清晰，不過隱約聽得到。
 
紫悅頭先提及一個名。
 




一個…我已經唔係首次認識到嘅陌生名字。