【全劇終】《我喺街執咗個失憶嘅女仔返屋企》: 新年番外篇（中）

結果，除咗一年裏面累積落嚟嘅無謂嘢之外，今年嘅年廿八，我同阿妹將小悠一齊掃埋出屋——為咗迎接一個無風無浪嘅年假。
 
不過，話就話掃佢出屋，但實情係阿爸阿媽今次返嚟會逗留幾日以上，要小悠自己一個喺外面遊盪幾日實在有點不近人情，於是阿妹曾經提出租間5星級酒店俾佢住，但鑑於多餘嘅錢已經俾小悠用嚟買咗眼前嘅繽紛樂山，加上年假期間酒店爆滿，呢個方案只好撤回。
 
隨後，我同阿妹諗到頭都痛都未諗到一個可以好好安置小悠嘅地方，經過內心嘅天使同惡魔一番交戰，就喺我準備撤回前言，容許小悠今個年假喺有限度情況下偷偷瞞住阿爸阿媽匿埋喺我地屋企（具體上可行，實際上需計劃）之前，小悠以一副皇者姿態話俾我同阿妹聽，佢已經搵到往後幾日落腳嘅地方——
 
「…芝芝屋企？」
 
「冇錯！我頭先問過佢，佢話非常之歡迎我過去暫住。」
 




「去人地屋企住一啲唔好意思都冇…我諗係得你先做得出…」我用一個小悠聽唔到嘅聲量講。
 
「我記得你同呢個叫芝芝嘅人都幾熟吓？」今次到阿妹講。
 
「嗯！算係熟過同阿帆嘅~」
 
「係咁就好喇，呢幾日唔使擔心你一個人唔知去邊。」
 
「等等，我頭先係咪聽到我個名…」對於瞓住都中槍呢回事，我冇餘力發表其他意見。
 




就係咁，阿爸阿媽返嚟住嘅呢幾日，小悠會暫時寄居喺芝芝屋企。
 
年三十晚（小悠過咗芝芝度住嘅第二日），當我喺屋企同如期歸來嘅爸媽，仲有阿妹一齊食住湯圓享受天倫之樂嘅時候，突然收到小悠打嚟嘅電話。
 
老實講，呢兩日冇咗小悠喺度，耳根果然樂得清淨，畫幅畫都順手過平時，所以望住小悠嘅來電，我果斷將部電話反轉，繼續食我嘅湯圓，兼同爸媽閒話家常，氣氛樂也融融。
 
呢個時候，到阿妹電話響，佢選擇返咗入房接。
 
「帆帆，今次返嚟其實我地有嘢要交俾你。」阿媽確認阿妹關上房門後，細細聲對我講。
 




說時遲那時快，阿爸已經將一封陳舊嘅信件放到我面前。
 
「咩嚟架？」我一時間未能看清。
 
「之前唔係同你講過我地搵到呢封信咩？」
 
我定眼一看，信上嘅內容同幾個月前透過訊息收到嘅嗰一封相互交疊。
 
亦即係寫俾羅凱撒嘅謎之信件，之前夕嵐幫我翻譯完之後，由於太過九唔搭七，我選擇就此放置，最後不了了之。
 
估唔到，爸媽今次返嚟，會帶封真跡俾我。
 
我拎上手，好似研究恐龍化石咁研究封嘢，然後發現——
 
封嘢有第二頁。




 
而且寫信人嘅位置，寫咗一個陌生嘅名。
 
一週後。
 
開心嘅時間過得特別快，年假眨吓眼就過咗去。我心裏感激芝芝免卻我同爸媽解釋小悠來歷嘅麻煩。如無意外，小悠今日應該會由芝芝屋企返嚟。
 
老實講對於迫不得已（係，迫不得已）請小悠暫時離開呢件事，我同阿妹唔多唔少有啲愧疚，所以喺佢返嚟之前我地特登預備咗好多（之前小悠買落嘅）繽紛樂，作為迎接小悠兼幫佢洗塵嘅禮物。
 
果然，晏晝3點幾，屋企門鐘響起。
 
我同阿妹確認門外嘅係小悠之後，默默喺心入面數123 ，然後開門…。
 
「歡迎返嚟！」我同阿妹同時將手上嘅迷你版繽紛樂灑出。（順帶一提呢條橋係阿妹諗嘅，令人不得不相信近得一個人多，思維都會愈來愈接近嗰個人，又或者簡單啲講，白痴真係會傳染嘅，因為喺上年阿妹生日嗰陣，我同小悠正正對佢做過同一樣嘢，只不過當時係用紙碎代替繽紛樂）
 




只不過，小悠並冇好似想像中咁元氣滿滿地接過我地掟俾佢嘅繽紛樂，只係氣若游絲講咗兩個字：「…阿帆。」
 
「…小悠？」
 
然後係砰一聲，佢成個人倒在家門前。
 
經過咗一分十二秒，我同阿妹夾手夾腳救返醒小悠。
 
佢醒返之後，無視我地嘅關心，嘴裏不停碎唸住繽紛樂，然後向廚房邁進。
 
望見呢個畫面，我相信佢頭先之所以會暈低，就同我第一次見佢嗰陣一樣，不外乎兩個字——肚餓。
 
果然，匿埋喺廚房解決咗幾包繽紛樂之後，佢滿血復活；我進一步喺佢口中證實，我冇估錯佢頭先暈低嘅原因。
 
「乜芝芝屋企冇繽紛樂俾你食咩…。」




 
「芝芝…？要講嘅話有排講…。」小悠好似憶起啲咩恐怖回憶一樣，塊面青晒。
 
「你到底喺芝芝屋企經歷咗啲咩…。」
 
佢緩緩搖頭，然後又突然大叫：「阿帆！我地去超市！」