【全劇終】《我喺街執咗個失憶嘅女仔返屋企》: 新年番外篇（下）

「即係話，你成個年假都冇食過繽紛樂…。」我一路行，一路聽緊推住購物車嘅小悠喺芝芝屋企一個星期嘅心路歷程，已經唔知道應該由邊度開始吐槽。
 
簡單嚟講，小悠原本應該優哉悠哉地渡過佢嘅新年假期，但世事難料，芝芝住嗰棟大廈突然出現變種病毒，於是全棟樓嘅居民（包括小悠）就禁止外出。
 
原本呢件事都冇咩問題——如果芝芝屋企有繽紛樂嘅話。奈何聽小悠講，芝芝父母早已雙亡，留低八個年幼細佬妹，一家九口就住喺不足200呎嘅板間房裏面，唔係話窮到燶嗰隻，不過有錢都唔係用嚟買繽紛樂，再加上…
 
「夠喇！唔好再講喇！」我制止咗講到一半嘅小悠。
 
呢啲喺電影裏面至會有嘅悲慘身世，居然會發生喺我認識嘅人裏面…。
 




「不過，人地已經一家九口，你居然好意思去人地屋企暫住…」
 
「我本身都有推架，不過一入到屋，芝芝同佢啲細佬妹就好熱情咁樣招待我，搞到我唔知點樣開口…」小悠難得一臉沮喪。
 
望住佢我開始心虛，因為唔係我趕佢走嘅話，佢就唔使去打擾芝芝，所以我心裏面暗暗同芝芝講咗句對唔住。
 
「再加上…」小悠將頭先嘅話接落去，「芝芝屋企因為地方比較淺窄，所以根本冇位擺零食…」
 
「於是你就喺芝芝屋企渡過咗同外界完全隔絕，兼且冇零食嘅假期…。」
 




「其實芝芝屋企所有嘢都好好架，佢啲細佬妹又乖又聽話，芝芝對我又好，知我冇零食就寧願自己每餐食少啲都要分俾我食，仲讓埋個位俾我瞓，自己就同八個細佬妹孖舖…。」
 
只係喺隔離聽，我已經感受到淡淡嘅罪惡感，都係嗰句，如果唔係嗰日我趕走小悠嘅話，芝芝喺年假期間就唔使養多個廢人…。
 
「總之，我地好好感謝芝芝啦。」我一句總結，結束呢個令人莫名其妙地感到沉重嘅話題。
 
「嗯，」小悠推住架購物車，似乎仍然未搵到佢要搵嘅嘢。
 
至於佢要搵啲咩不難估到，呢個都係佢咁急拉我嚟超市嘅原因。畢竟困喺芝芝屋企嘅成個假期，佢都冇食過繽紛樂；而屋企嗰啲，頭先已經俾佢食得七七八八。
 




「唔使望啦，全部缺貨，」我同小悠喺擺朱古力嘅貨架之間穿梭，「一定係因為你之前買得太過份，人地驚咗你唔再入貨。」
 
我講緊嘅係小悠買咗一堆多到可以堆成山嘅繽紛樂做年貨呢件事。
 
「點會呀？都已經過咗成個星期…」小悠嘅視線突然向貨架最高處掃視，「有喇有喇。」
 
我跟佢視線望，果然有唔知係賣淨定係留嚟存貨嘅繽紛樂。
 
小悠伸盡手臂都係拎唔到，喺我諗住幫佢之前，佢已經一腳企咗上理貨員專用嘅腳踏。
 
「你小心呀…」
 
「知道！」
 
趁佢雙手仲摷緊貨架上面嘅零食，我猶疑咗一陣，決定向佢道歉：




 
「…對唔住。」
 
「對唔住？」
 
「…我唔應該叫你走嘅。」
 
「咁我唔喺度嗰幾日，你有冇諗起我呀？」
 
「欸…？」我被佢突如其來嘅提問嚇得一時語塞，窒咗幾秒先組織到句子，
 
「…要講嘅話，又唔可以話冇嘅…大概…」我一邊抓耳側頭髮一邊講。
 
「嘿，」小悠一下子從腳踏跳返落地，手裏面拎住嘅係幾排繽紛樂分享裝，「呢度啱啱好夠芝芝同佢八個細佬妹分！」
 




我數吓啲繽紛樂，真係夠芝芝同佢八個細佬妹分，仲有淨添。
 
「原來你係想送俾芝芝…。」
 
「又係你話，我地要好好多謝芝芝吖嘛。」
 
「服咗你，又話芝芝屋企冇位放零食，咁多出嚟嘅你係諗住留俾邊個…」我問，但未問完小悠已經答咗——
 
「我同阿帆，仲有阿妹！」
 
我嘆氣笑，然後忽然諗起一個幾重要嘅問題：「話時話，你去芝芝屋企應該冇帶埋啲假期功課架啦…？」
 
佢如我所料般搖頭：「做咩呀？」
 
「你係咪唔記得咗，我地聽日就要返學…」




 
小悠一聽，果然面容扭曲。
 
結果，喺開學嘅前一晚，小悠通宵坐喺書枱前，為佢呢個多災多難嘅年假劃上完美嘅句號。而一早做晒假期功課嘅我，梗係安心大覺瞓。
 
——一如以往，今日係連記低都嫌浪費紙張嘅無聊日常。
 
不過，望住眼前呢個被假期功課折磨到得返半條人命嘅天生蠢才，我覺得呢種日常可以一直延續落去嘅話，其實都唔差。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
新年番外完結，如果作者乞夠１０００個ｌｉｋｅ，送多個裏篇俾大家。
下次正篇故事會喺３１／１更新，內容由繁星祭篇：最初的畫接起，感謝閱讀。