【全劇終】《我喺街執咗個失憶嘅女仔返屋企》: 新年番外篇（上）

註：時間線係休比篇之前，阿帆同小悠放緊新年假嘅期間。


「新年快樂！」放學返到屋企，迎接我嘅係由小悠口中講出嘅呢一句祝賀語。
 
「新年快樂…？明明仲有幾日先係…而且，我地呢個地方興講另一句說話多啲。」我放低書包。
 
「係咩呀？」佢一臉天真地問。
 
「係恭喜發財。」面對佢嘅基礎常識貧乏程度，我已見慣不怪，唯有暗地嘆一口氣。




 
「有咩分別呀？」佢理所當然地追問。
 
「呢啲嘢你應該交俾google大神解答你，我而家入房畫畫，冇咩事唔好打擾我。」我拋低一句，準備入房。
 
點知入房嘅前一刻，眼角餘光捕捉到客廳內一堆數量恐怖、由白色橙色加啡色交織而成嘅殘影。
 
與此同時，小悠脫口而出：「阿帆，我真係好鐘意過新年，你知唔知點解？」
 
「 …因為學校有假放？」我轉身，雙眼聚焦於殘影所在嘅方向，喺確認到殘影真身嘅同時，我諗我大概明白小悠會話鍾意過年嘅理由。




 
「錯！答案係：四周圍會有好多繽紛樂賣！」至於呢一個，就係小悠提供嘅官方答案。
 
——喺我眼前一堆由白色橙色同啡色交織而成嘅包裝袋，係用一座小山嚟形容都不為過嘅各式各樣繽紛樂，獨立包裝、分享裝、黑朱古力、白朱古力……一應俱全。（呢個詞語冇用錯，我估）
 
而小悠指嘅「四周圍會有好多繽紛樂賣」，大概係講緊每年臨近農曆假，街上就會湧現大量年貨，而繽紛樂就係其中之一。
 
望住眼前一堆繽紛樂山，我發出今日以來最強烈嘅嘆息：「唔好同我講呢一堆全部都係你買返嚟…。」
 
「嗯嗯！我將附近超市嘅所有存貨都掃晒返嚟！呢度夠我地3個人食到放完年假！」講完佢隨手喺地上拎咗一pack，跟手開始食。




 
而佢口中嘅3個人，我相信係講緊佢自己、我同埋阿妹。
 
所以，我先更加要吐槽：「對繽紛樂有需求嘅從來都只有你好唔好…！講到底究竟有咩人會特登走去超市搶繽紛樂？唔好將呢個行為講到好似打風前儲備糧食一樣咁平常…！」
 
一口氣爆發完，我連抖幾啖大氣。
 
眼前嘅蠢才居然毫無悔意：「咁係因為…我見到全個貨架都係，實在忍唔住…」
 
「話說，你邊度得嚟咁多錢買？」內心忽然昇起不祥預感。
 
「呢層你放心，係阿妹俾錢我，叫我幫手辦年貨。」佢一臉自豪，顯然認為自己將阿妹交帶嘅任務辦理得好成功。
 
「…我諗阿妹都冇諗過，今年嘅年貨會全部都係繽紛樂。」我低聲講。
 




就喺我思考緊應該點樣處理眼前嘅繽紛樂山，以及喺心裏面對其他想喺超市買繽紛樂嘅人講緊聲抱歉之際，阿妹由房裏面出咗嚟，配以一副如沐春風嘅樣：「哥！我啱啱收到電話…。」
 
「真係？？？」我難掩興奮——每年呢個時候，阿妹總會收到來自遠方嘅阿爸阿媽打嚟嘅電話，內容係——
 
「嗯！佢地預定今晚半夜落機！今次會返嚟直到年假放完！」
 
農曆新年係阿爸阿媽佢地每年都會返嚟陪我地過嘅節日。
 
「好嘢！！」我同阿妹興奮到團團轉，已經唔理得會踩到散落一地嘅繽紛樂，畢竟同阿爸阿媽見面嘅機會，一年都唔知有冇幾次。
 
然後，一吓拍手聲打斷正在自high嘅我：「咁太好喇！呢啲繽紛樂可以叫埋阿帆你地父母一齊食！」
 
我同阿妹停止轉圈，我望吓地上嘅繽紛樂山，又望吓小悠，忽然間諗到件好重要嘅事。
 
而阿妹嘅表情，話俾我知佢都係諗緊同一樣嘢。




 
「你地…做咩咁嘅表情嘅？」小悠揚起一臉無辜嘅笑容，加上佢額頭滴落嚟嘅汗，我估佢八成都知道我同阿妹諗緊乜嘢。
 
「如果俾阿爸阿媽知道屋企原來多咗個人，真係會好L大鑊…」我將手指關節一吓吓啪響。
 
「你講得啱，分分鐘會扣起我地每個月生活費…唔止咁，仲有機會家變…」阿妹低聲碎唸，跟我一樣開始啪起指間關節。
 
「家…家變？冇咁誇張嘅…我諗。」小悠維持僵硬嘅笑容，愈講愈細聲。
 
「與其浪費口水向阿爸阿媽解釋，我寧願對唔住都要做一次…」如果眼前有塊鏡，我相信我見到嘅會係屬於惡魔嘅邪笑。
 
「阿哥，我支持你…」
 
「今日係年廿八，真係啱晒…」
 




「你、你地想點呀？」面對惡魔（仲要兩隻）嘅迫近，小悠只能愈縮愈後，連手上嘅繽紛樂都嚇到跌埋落地。
 
「年廿八，我地要掃垃圾…。」