【全劇終】《我喺街執咗個失憶嘅女仔返屋企》: 繁星祭篇：校監與學生會長（上）

行咗幾層樓梯，終於到達七樓嘅學生會會室。
 
裏面依舊一絲人聲都冇，不過放學時間照計應該有人。
 
所以我輕輕力敲咗兩吓門，然後等待裏面嘅人回應。
 
「去開門。」隱約聽到裏面有人講。
 
學生會嘅大門從裏面打開，迎接我嘅係羅凱撒。
 




「…而家我好忙，有咩事請稍候再嚟。」講完佢準備閂門。
 
雖然只有幾秒時間，但我已經感覺到佢嘅氣場同平時完全唔同。
 
嗰副傲視眾生嘅態度消失不見，彷彿企喺我面前嘅（我諗唔到第二啲形容）係一隻啱啱出世，奶都未戒斷嘅小狗。
 
裏面有另一把聲忽然講：「開門，請佢入嚟。」
 
羅凱撒馬上反駁：「但係，父親大人…」然後又即刻謝晒皮咁答，「我知道喇。」
 




大門再度被打開，裏面嘅人示意我入去。
 
只見學生會長嘅辦公枱前坐咗一個三十幾歲嘅男人，個樣同羅凱撒餅印一樣。
 
而平時坐喺枱前unun腳嘅羅凱撒，居然落得企埋一邊嘅境地。
 
咪住…羅凱撒頭先叫佢做…父親大人？
 
我記得駱以雪講過，羅凱撒老豆係校監（見聯校宿營篇：POWER（上）），即係話而家喺我眼前嘅，係呢間學校嘅校監。
 




我一時搞唔清狀況。
 
不過，我目的只係嚟交計劃書，於是恭恭敬敬地講：「er... 我係嚟放低份計劃書俾會長嘅，冇咩事嘅話我返出去先喇。」
 
準備轉身嘅時候，羅凱撒老豆竟然叫住我：「等一陣。」
 
我回頭：「…？」
 
羅凱撒老豆冇答我，反而係同佢個仔講：「而家啱喇，就俾由你統領嘅學生睇清楚，」講到呢度佢停咗，托一吓臉上嘅眼鏡，「你係一個幾咁無能嘅會長。」
 
……。
 
「自從今個學年開始之後，你一直不在狀態。」羅凱撒老豆企起身，繞到佢個仔身後。
 
望住呢一幕，我切身體會到咩叫有其父必有其子。




 
原來中二病嘅學生會長背後，有一個中二病嘅老豆。
 
名為校監嘅人物繼續手擺後面，如入忘我之境般發表偉論：「先係聯校宿營，你輸咗俾一向被我視為眼中釘嘅對面學校；去到統測嘅時候，你表現失準，入學以嚟第一次唔係包攬各科嘅第一名；然後係運動會，你提出要引入新項目，結果只係拎到銀牌…」
 
聽完校監嘅說話，我有啲心虛嘅感覺。
 
畢竟聯校宿營嗰陣，學校好大程度上係因為我先會輸；而運動會新項目嘅金牌——雖然得來不易——但係俾我攞咗。至於統測嗰陣係邊條友咁大膽搶咗羅凱撒嘅第一名，就不得而知了。（嗰次我谷到盡咁讀都係拎得個進步獎，所以絕對唔關我事）
 
羅凱撒一直低頭，一粒聲都冇出。
 
「唔只咁樣，仲有嗰件事。」名為校監嘅人物繼續講，「雖然身為校監嘅我都有責任，不過都足以證明你呢個會長係幾咁無能，所以我要趁今日，好好鞭策你。」
 
雖然聽唔明校監口中嘅「嗰件事」係乜，不過睇嚟我被捲入咗一個教仔現場。