【全劇終】《我喺街執咗個失憶嘅女仔返屋企》: 繁星祭篇：校監與學生會長（下）

「父親大人，我…」羅凱撒講都未講完，就被一吓清脆嘅響聲打斷。
 
我被眼前嘅畫面驚呆，大概係冇預計到校監會喺有外人嘅情況之下兜巴昇羅凱撒。
 
「你應該知道我對你嘅要求，任何原因都唔可以當做你做得唔完美嘅藉口。」
 
「我今個學年嘅表現的確係有失水準，只不過…」講到呢度，羅凱撒就發出一下悲鳴聲。
 
理由係名為校監嘅人物猛力向佢腹部使出抽擊。
 




我踏前一步，點知俾背向我嘅校監叫停：「外人最好唔好多事。」
 
…佢點知道我對腳郁咗。
 
「我花盡全副心思去培育你，你居然一年之內同我丟清我呢個校監嘅架，你話唔係因為佢都好難令人相信。」
 
「父親大人，唔關嗰個人事…」羅凱撒再度發聲，結果唔難想像，佢老豆準備又兜巴昇落去——
 
不過喺掂到羅凱撒之前，我伸手制止咗。
 




「我唔知你地講緊嘅嗰個人係邊個，不過呢間房有閉路電視錄低羅校監你所做嘅一切。」
 
名為校監嘅人物一嘢甩開我隻手：「估唔到連最底層嘅學生都開始作反。」
 
佢望一眼房間角落嘅閉路電視，然後整理自己嘅袖口。
 
而喺閉路電視嘅正下方，貼住繁星祭嘅宣傳海報。
 
「繁星祭…」校監緩緩吐出呢三個字。
 




「嗯，而家準備得如火如荼，歡迎羅校監你去參觀吓。」我對佢講。
 
「作為本年度最後一個活動，」佢輕托鼻樑上嘅眼鏡，「希望你地5E班30個人可以好好享受到最後。」
 
雖然唔知點解佢會知道我係邊班，不過佢頭先句說話入面有一個錯處：「羅校監你有時間嘅話可能要多啲睇吓學校文件，因為我地班嘅人數係31個，唔係30個。」
 
冇錯，上年的確係30個，但小悠作為插班生入學之後，人數就變咗31。
 
「哼，」伴隨住同羅凱撒一模一樣嘅笑聲，名為校監嘅人物走向學生會大門，「由始至終人數都冇變，多出嚟嘅只係幽靈學生。」
 
「…咩意思？」
 
如我所料佢咩都冇講就走咗，得返我同羅凱撒喺會室裏面。
 
「…你冇嘢嘛？」望住塊面紅咗一撻嘅羅凱撒，我問。




 
佢匆匆忙忙行向大門嗰邊，留低一句：「今日呢個人情，我會還返俾你。」跟手走埋。
 
我再次領略到，咩叫有其父必有其子。