【全劇終】《我喺街執咗個失憶嘅女仔返屋企》: 繁星祭篇：準備工作

第一次班級會議之後，我地著手繁星祭嘅準備工作。
 
本來活動嘅默認地點係喺自己嘅班房，不過小悠話地方太細會唔夠刺激，所以我地班膽粗粗咁向學生會遞交咗借用禮堂嘅申請，而最終又真係獲得通過，所以嚟緊我地班嘅鬼屋活動會移師到禮堂舉行。
 
經過我同小悠幾晚嘅努力，終於設計好鬼屋嘅藍圖。我地計劃將禮堂佈置到迷宮一樣，途中就安排班上嘅人扮演各式各樣嘅鬼怪；而我同小悠就會喺終點前嘅禮堂舞台上待命，飾演兩隻鬼中之鬼，務求喺玩者逃出鬼屋之前給予佢最後一嚇。
 
望住親手繪製嘅設計圖，我難掩笑容。
 
畢竟係年度重點項目，學生會班人一定會四圍巡視各班活動，分分鐘會玩埋一份，然後當羅凱撒同駱以雪闖入我地班嘅鬼屋嗰陣——
 




「哇哇哇哇哇哇——」羅凱撒嚇到跪地求饒。
 
而一向冇表情嘅駱以雪更加嚇到淚灑當場。
 
…諗吓都覺得刺激。
 
為咗見識兩位學生會成員同平時唔同嘅一面，我會努力做好鬼中之鬼呢個角色。
 
咁樣諗嘅同時，有人向我遞出一個黑色嘅嘩鬼面具。
 




「唔該。」不經意抬頭，至發現對方係一隻身穿黑袍，面色慘白嘅鬼——
 
「哇嘩——！！！」我反射性向後退，結果一下子撞埋牆邊。
 
「…痛！」
 
「哈哈…哈哈…乜阿帆你原來驚鬼？」嗰隻鬼一邊講，一邊將純白面具同兜帽除下，我先認出佢係小悠。
 
「邊個話我驚…。」
 




「我係嚟俾扮鬼嗰陣要著嘅衫你架。」佢跟手遞埋一件白袍俾我。
 
我望吓眼前嘅服飾：黑色面具＋白袍；小悠就相反，白色面具＋黑袍。
 
「今次真係黑白雙煞，想唔嚇死學生會都唔得。」
 
小悠突然雀躍：「阿帆，不如我地幫呢兩隻鬼改返個名好冇呀？」
 
「…改名？你估生b咩而家。」講完之後，我先察覺自己講咗句幾咁糟糕嘅說話。
 
「吓？」好彩小悠聽唔清楚。
 
「冇嘢…！改名吖嘛？好吖！nice idea！」
 
「…改咩名好呢？」




 
我指住小悠手上嘅面具：「呢隻就叫鬼中之鬼1號，另外一隻就叫鬼中之鬼2號，簡稱1號同2號。」
 
正當以為佢會嫌我求其嘅時候，佢竟然雙眼發光：「呢兩個名都唔錯呀！阿帆你改名真係有天份…！」
 
面對小悠呢種獨特嘅口味，我選擇求其回應：「…咁梗係啦。」
 
「阿飯——」呢個時候，背後有人叫我。
 
我轉身：「係。」
 
「關於借用禮堂嗰度，我地要交一份詳細嘅計劃書俾學生會嗰邊，嗱份嘢就喺度，」講完條友塞咗一個文件夾俾我，「咁就拜託你呢個班級委員交上去喇。」
 
「冇問題。」我簡單回應。
 




「唔該！咁我返去繼續佈置喇！」
「大家辛苦喇，努力多一陣…！」
「聽講今日校監嚟咗巡校，各位做得要好好睇睇。」
「有冇人要水呀？可以過嚟呢邊拎。」
 
大家你一言我一語，一同為繁星祭而努力。
 
望住本來乜都冇嘅禮堂，而家圍起一塊塊用嚟整迷宮嘅隔板，我確切感受到一切正在順利進行中。
 
希望今次會成為小悠往後嘅人生中一段不可或缺嘅回憶。
 
我拎住手上嘅文件夾，向住七樓嘅學生會會室進發。