【全劇終】《我喺街執咗個失憶嘅女仔返屋企》: 繁星祭篇：努力的成果

放學後嘅班級會議，我地要商討喺繁星祭裏面整啲咩出嚟。
 
所有人都贊成小悠嘅提議，所以班主任宣佈今年嘅繁星祭，我地班嘅項目係自己落手落腳設計一間鬼屋，然後喺當日用嚟嚇鳩其他人。
 
小悠知道之後，開心到幾乎原地跳起。
 
然後佢偷偷問我：「阿帆，你做咗啲咩令大家都支持整鬼屋？」
 
我搖頭：「我冇做啲咩，會有今日呢個結果，完全係靠你自己嘅努力。」
 




靠住呢十個月以嚟，小悠同班上嘅人所建立起嘅感情，我做嘅只不過喺背後推佢地一把。
 
小悠睇起嚟有啲疑惑，於是我乘機推佢額頭：「快啲傾埋個分工，唔好阻我放學。」
 
靠住小悠嘅帶領，冇幾耐我地就傾完接下來嘅分工，大家各自擔任唔同崗位，而喺其他人嘅你推我讓之下，負責扮鬼嚇鳩人一職唔知點解就落咗喺我同小悠身上，大概大家都唔想戴住個嚇鬼面具，又或者係化到個樣鬼唔馬六。
 
我對於扮鬼嚇人呢回事冇大抗拒，所以好快接受咗呢個分工。
 
決定得七七八八之後，會議結束。
 




我一早叫咗夕嵐喺課室外守候，目的係洗開小悠，求其呃佢落小食部又好，家政室又好，總之我要佢離開班房。
 
因為真正嘅會議，而家先要開始。
 
時間一到，我就向班房外嘅夕嵐打眼色，兼且向小悠傳遞有人搵佢嘅訊息，結果如我所料，小悠跟咗夕嵐出班房。
 
確認佢地行遠之後，我同班上其他人就圍埋一堆，開始另一場討論。
 
既然繁星祭係送俾小悠嘅禮物，除咗鬼屋之外，我覺得可以預備其他驚喜。
 




反正佢都就嚟要走，都唔顧得件事老唔老套了。雖然我知道，玩驚喜真係好老套。
 
不過，都差唔多最後，咪就老套一次咁多。
 
我苦苦思量嘅計劃係：喺繁星祭結束之後，搵人偷偷地熄燈，當小悠以為係停電而不知所措之際，再突然開返燈，然後我地5E班全體出現喺小悠眼前，逐一向佢道別，到時再喺周圍放啲氣球彩帶之類，成個畫面一定好壯觀。
 
點知班上其他人聽完之後，個個一臉鄙視：「又真係好似老套咗啲…」
 
「……。」我駁唔到。
 
「不過，我支持你。」開口嘅係張廷宇。
 
呢句就好似開場白一樣，其他人聽完都陸續開聲支持我個驚喜計劃。
 
中學生涯以嚟，都未試過成班齊心協力去做一件事。所謂嘅熱血，可能就係呢種感覺。




 
距離繁星祭仲有20日。
 
所有嘢好似開始向好。