【全劇終】《我喺街執咗個失憶嘅女仔返屋企》: 繁星祭篇：各位，請聽我講

「嗯，我同你一樣。」
 
想將今年嘅繁星祭變成一個永不褪色嘅回憶。
 
雖然面對住嘅係班上長久以嚟嘅頹風，但唔試吓嘅話唔會知得唔得。
 
小悠依然低頭，我抓住佢雙肩：「所以，」
 
佢緩緩抬頭，表情果然有啲沮喪。
 




見到佢咁樣，我更加下定決心：「其他人就由我去勸，你諗吓想整間點嘅鬼屋。」
 
佢就咁望住我，兩秒後先講：「你有方法咩？」
 
「…方法唔係冇，我會盡最大努力去試。」
 
即使真係一個人都勸唔到——
 
我繼續講：「就算最後淨係得我地兩個，我都要喺繁星祭入面整一間最正嘅鬼屋。」
 




小悠臉上逐漸浮現笑容：「…嗯！」
 
＝＝＝＝＝＝＝＝＝＝＝＝＝＝＝
 
夜晚，我開咗個group ，將班上除咗小悠之外嘅所有人加晒入去。
 
而得到最多嘅回覆係「？」、「咩group嚟？」，甚至有啲連字都冇打就直接quit咗。
 
望住一路跌嘅群組成員，我焦急到自言自語：「喂喂…！唔好走住呀！」
 




然後，雙手飛快喺螢幕鍵盤上打字、按下送出：
 
各位，請聽我講。20：32
 
收到嘅回覆依舊係問號佔多，有啲就問我開個新group做乜。
 
我繼續敲打螢幕：
 
關於嚟緊嘅繁星祭，我有啲嘢想講。20：33
 
我將心裏嘅計劃，亦即係想將繁星祭搞得好好睇睇，當做送俾小悠嘅禮物呢件事講俾大家聽，然後等待大家嘅回覆。
 
我地班之所以會咁頹，不外乎認為所謂嘅繁星祭根本冇意義。所以，要改變頹風，首先要賦予繁星祭一個特別嘅意義。
 
而呢個意義，就係小悠。




 
正如我之前所講，樂意幫小悠創造佢喺呢間學校最後回憶嘅，一定唔只我同張廷宇兩個。
 
果然，大家知道我嘅諗法之後，態度有所轉變。
 
「其實鬼屋應該會幾好玩」、「如果係為咗小悠嘅話」宏宏，雖然都係有啲唔情願，不過總好過今朝嗰陣。
 
我一鼓作氣，對住電話講：「咁喺聽日嘅班級會議，大家記得要贊成整鬼屋。」
 
送咗段錄音出去之後，陸續收到「ok」、「好」…
 
我暗地歡呼，為成功嘴遁班上同學而感到高興。
 
跟住落嚟，只要再勸埋頭先一嚟就quit group 嘅人，咁樣小悠嘅鬼屋夢就可以喺繁星祭裏面實現。
 




所以，我向其餘嘅人逐一傳遞訊息，傳遞小悠喺呢間學校嘅最後一個願望。
 
然後，好快到咗第二日。