【全劇終】《我喺街執咗個失憶嘅女仔返屋企》: 繁星祭篇：今年想特別一點（下）

「…鬼屋？」
 
「嗯！你地諗吓，整鬼屋嘅話我地可以搵好多人扮鬼，咁咪可以多啲人一齊玩囉？」佢雀躍起嚟。
 
「聽落好似幾好玩，仲有得嚇鬼其他人。」張廷宇摸住下巴講。
 
「阿帆！你覺得呢？」
 
望住小悠嗰道充滿期待神色嘅視線，我稍微將目光放遠：「…只要係你鍾意嘅話，我都冇問題。」
 




「好嘢！咁我地一於整鬼屋！」小悠開心到舉起雙手。
 
「不過都係嗰個問題，班上嘅其他人根本唔想搞咁多嘢，你地想整鬼屋可能有啲困難。嗱講明先，我就支持你地嘅。」張廷宇提出咗一個不能忽視嘅事實。
 
「唔緊要！我會逐個逐個去說服佢地！」講到呢度，小悠撳實張廷宇嘅膊頭，「多謝你支持呀，張廷宇！」
 
然後，一陣煙咁衝走咗。
 
「一如以往咁有行動力…」我望住小悠漸去嘅背影講。
 




「雖然咁講可能有啲奇怪，但係小悠今次好似特別雀躍？」
 
「可能因為呢個係佢臨走前最後一個回憶，」我望向張廷宇，「總之，我地就俾心機做好呢一次。」
 
＝＝＝＝＝＝＝＝＝＝＝＝＝＝＝
 
放學嘅時候，小悠依舊喺度拉攏班上嘅人，去支持我地喺嚟緊嘅繁星祭裏面整鬼屋，但進度似乎不太理想。
 
「…鬼屋呀？好多嘢要預備架喎。」坐喺座位上嘅毒撚一臉不情願。
 




而小悠就企喺前，雙手按實書枱：「我同阿帆會統籌成個活動！確保大家唔使做好多嘢！同埋我地班有30個人…」
 
毒撚逐漸變得不耐煩：「就算有30個人咁又點？講真呢啲活動都真心冇人會理架啦。」
 
「就係因為咁！我地先要更加俾心機落去！咁樣大家先會被感染埋一份…」
 
「你放我返屋企打機好過啦，雖然你份人平時冇咩，不過今次真係強人所難咗啲…」
 
我再聽唔落去，走過去一手拉小悠行出課室：「唔好再講喇，我地走啦。」
 
直至去到樓梯間，我先放開佢，佢一嚟就衝我講：「阿帆你做咩拉我走呀？你俾多啲時間我一定可以勸到大家架。」 
 
「你問心，你覺得可以咩？」我繼續講，「呢度係現實世界，你想要見到嘅高中生圍埋一齊做一件好熱血嘅事，唔會有架。」
 
小悠靜咗落嚟。




 
然後，緩緩開口：「阿帆，我係咪真係喺度強人所難。」
 
「…我唔係咁嘅意思呀。」
 
「…我只係，想同大家一齊創造一個唔會隨住時間褪色嘅回憶。」佢一直低頭，我望唔到佢臉上嘅表情。
 
然而，只係透過聲線，我就感受到佢對於班上其他人嘅態度係幾咁無力。至少而家呢種沮喪，係我認識佢以嚟，從來未見過。
 
心臟有一種被堵塞嘅感覺。
 
我思考當下我可以做嘅嘢係咩，得出嘅結論係要改變班上嘅頹風，應該比登天更難。
 
就連喺班上受歡迎嘅小悠親自去勸都冇效，更何況係我。
 




咪住先，喺班上受歡迎…
 
我好似諗到啲嘢。