【全劇終】《我喺街執咗個失憶嘅女仔返屋企》: 青葉（六）

「…出嚟啦。」我閉上眼，喺內心祈願。
 
後方嘅某棵樹忽然沙沙作響。
 
聽住樹葉撩動嘅聲音，我嘴角一揚。
 
「嘿，搵到你喇。」
 
我轉身，對剛從樹上跳下嘅人影搖頭：「呢句說話應該係我講先啱，爭啲以為你又閃靈…」
 




「閃靈？唔係呀，頭先我爬咗上樹睇雀巢。」佢指向頭頂上嘅大樹。
 
我循佢方向望去，果然有個雀巢築喺樹枝上。
 
我忍唔住笑，唔單止因為佢鍾意睇雀巢呢一點由聯校宿營到而家都冇變；更加係因為佢頭頂嗰條仍未梳好嘅頭髮。
 
「欸？有咩咁好笑呀？」
 
我搖頭，好不容易將笑聲停止，然後清一清喉嚨：「咁我就單刀直入咁問嘞。」
 




「嗯？」
 
但要問呢啲嘢，果然令人尷尬…
 
所以，我稍微擰歪臉：「你鍾意咗邊個。」
 
「我鍾意…邊個？」佢一副狀況外嘅表情。
 
「…張廷宇講架！佢話…你鍾意咗個又靚仔，運動又叻，又曉照顧人嘅人。」
 




小悠好似聽完外星話一樣，頭上出現幾個問號。
 
過咗一陣，佢用拳頭碰喺手掌上：「我知喇！不過，你淨係啱咗一半。」
 
即係話，小悠真係鍾意咗某個人…。

內心一沉，但我裝作平常：「…係邊個？啱咗一半即係咩？」
 
「因為佢的確靚仔過阿帆好多倍，運動叻過阿帆好多倍，仲識照顧朋友多過阿帆好多倍！」
 
「喂！做咩又拉我落水！」
 
小悠笑咗笑，繼續講落去：「但佢都唔係人。」
 
「唔係人？」




 
「雖然係咁，但赤仔喺我心目中嘅排名依然高過阿帆好多倍。」
 
「赤仔？」
 
「嗯！係紫悅養嘅龍貓！」
 
「…龍貓？」我一時搞唔清狀況。
 
「係呀，就係你口中嗰個又靚仔，運動又叻，又識照顧朋友嗰個人。」
 
小悠講完之後，我原地呆咗幾秒。
 
然後，打從心底裏發笑：「咁又係，我應該一早要諗到…」
 




畢竟眼前嘅係小悠，由我遇到佢嗰一刻開始，就知佢係對呢方面感覺遲鈍，甚至可以話…完全拉唔上關係嘅人。
 
「咁好啦，而家我講咗個秘密俾阿帆聽，作為交換，下次阿帆都要講返個秘密俾我聽。」微風吹過，撩動起髮絲，小悠用手翹起耳邊嘅頭髮。
 
明明眼前嘅係一副已經見過無數遍嘅笑容，但我忽然有種感覺，彷彿剛才至係我地相遇嘅瞬間。
 
內心泛起至今為止從未有過嘅強烈鼓動。
 
一種呢幾日以嚟我覺得難以理解嘅感覺。
 
但係，有時候或者唔需要諗太多，只需要去察覺、去承認，接下來，某啲嘢就會逐漸成形，變成一個令人得以看清嘅形狀。
 
我閉上眼，吸一口氣。
 
「唔使等下次喇，我而家就可以話俾你知。」




 
——待看清以後，淨低落嚟要做嘅，就只有去捉緊。