【全劇終】《我喺街執咗個失憶嘅女仔返屋企》: 青葉（五）

冇幾耐，小悠同杜朋也終於喺店裏面出嚟。
 
佢地分別之後，小悠就一個人踏上返屋企嘅路。
 
我一直同佢保持幾十米距離，行喺佢後面。
 
雖然按常理我應該上前同佢打招呼，然後一齊講住廢話返屋企。但唔知點解，今日我忽然有興趣知道，當佢一個人嘅時候會係點。
 
會係平時咁白白痴痴，定係好似上次喺貯物室救雀仔嗰陣咁，散發截然不同嘅氣場。
 




行唔夠一陣，小悠忽然停低腳步，我都即刻搵碌電燈柱匿埋。
 
然後，佢粒聲唔出就踎低咗，喺地下唔知指指劃劃乜嘢。
 
幾分鐘之後，佢拍拍手上嘅灰塵，跟住跳吓彈吓咁走咗。
 
我行到剛才佢停下嘅地方，原來係一群螞蟻喺度搬緊麵包。
 
……。
 




睇嚟返去要再教佢，大城市嘅街道係有幾咁污糟。
 
又行唔夠兩步，今次小悠俾個行路震晒嘅阿婆截低咗。
 
個阿婆捉住佢問咗幾句嘢，小悠就一路答一路指住某個方向。睇嚟係問路嘅阿婆。
 
冇幾耐，個阿婆好滿意咁笑，跟手塞咗啲嘢俾小悠。
 
小悠閃過驚喜表情，一嘢將手上嘅不明物體啪入口，之後係滿面幸福嘅模樣。
 




佢繼續跳吓彈吓咁行。
 
跳跳吓，佢又突然停咗喺度。
 
「又咩事呀…」我低聲嘆道。
 
小悠稍微彎低身，呢個角度我睇唔到佢嘅情況，只係聽見佢不停喺度咳。
 
而且幾吓之後，依然冇停歇嘅跡象。
 
我開始理解到，佢大概係俾阿婆頭先塞俾佢嘅不明物體（我估係糖？）噎到。
 
「…呢個白痴。」我搖頭嘆氣，正準備上前幫手時，身後被人一拍。
 
我回頭，係訓導主任。




 
「放學後唔可以喺街上流連，你連呢一點都唔知？」
 
「我唔係喺度流連，我係返緊屋企…。」我盡量壓低聲線，費事俾小悠發現。
 
「我唔信！你似係抱住不懷好意嘅目的…。」
 
「…乜我睇落真係咁形跡可疑。」我細聲抱怨。
 
「你講咩話？」
 
「搣時，其實前面有個同學哽親，事關重大你可唔可以放我去救咗佢先？」
 
「哽親？」
 




「嗯，就喺嗰邊。」我往頭先小悠所在嘅方向一指，但發現竟然唔見咗人，「欸？」
 
「嗰邊邊有人？」
 
「…頭先明明喺度架？」
 
訓導主任嘆氣，然後講：「今次就放過你，下次放學記得即刻返屋企。」
 
「係嘅，知道。」
 
去咗邊？
 
目送搣時離開後，我跑到頭先小悠嘅位置，尋找佢嘅蹤影。
 
望勻晒四周，都係唔見人。




 
明明前一秒先見佢哽親，冇理由突然間跑咁快架？
 
我開始慌張起來。
 
我怕係閃靈現象又再翻兜，帶咗佢去唔知咩地方。
 
「小悠！」我一路叫住佢個名，一路喺附近搜索。
 
直到氣開始喘，我停咗落嚟。