【全劇終】《我喺街執咗個失憶嘅女仔返屋企》: 青葉（二）

結果，我都係去咗搵張廷宇。
 
「所以，你嚟緊一個禮拜都冇飯食？」
 
我一邊咬紙包飲品，一邊無奈點頭：「手上呢包嘢係我用最後嘅4蚊買返嚟。」
 
張廷宇嘆一口氣：「咁啦，芝芝嚟緊會整飯盒俾我食，我叫佢預埋你啦。」
 
「會唔會唔係咁好呀？」話晒都係芝芝整俾張廷宇嘅愛心便當。
 




「得啦，芝芝好易話為。」
 
「…有機會嘅話，我一定要親口多謝佢。」我滿懷感激。
 
「芝芝同小悠咁熟，你平時唔會見到佢咩？」張廷宇問。
 
我擰頭：「我一次都未見過芝芝。」
 
張廷宇塊面扭曲成天下間最驚訝表情：「咩話？？？」
 




之後，佢喺電話撳咗幅相俾我睇，係一張蒙到pk嘅全校大合照，背景係禮堂。
 
「嗱，呢個就係芝芝。」
 
我一手接過佢部電話，將頭先佢指嘅一角放大：「邊個呀？」
 
「呢個呀。」佢再指住同一地方。
 
「蒙到咁，點睇？」
 




佢嘆一口氣：「邊個叫你放到咁大？保持距離，你先會見到芝芝最真實嘅一面。」講完佢手指一掃，張相又變返原來大細，「係咪？」
 
我瞇長雙眼，點睇都只係一個蒙到化開嘅人影：「…都係睇唔清。」
 
佢藐我一吓：「一定係你信念唔夠強。」
 
「…信念？」
 
張廷宇收埋部電話，突然話鋒一轉：「話說，你知唔知小悠鍾意咗邊個？」
 
嘴裏嘅飲料應聲噴出。
 
張廷宇連忙拎咗幾張紙巾俾我：「喂喂你點呀？係芝芝講嘅，佢話小悠一定係鍾意咗某個人。」
 
「…點解咁講？」




 
「芝芝話戀愛中嘅少女係有樣睇嘅，睇小悠嘅表情，佢一定係墮入愛河咁話喎。」
 
「乜佢表情同平時有分別咩？」
 
「呢兩日小悠經常會諗嘢諗到笑，然後經芝芝問兩問之後，小悠就講咗堆意味不明嘅嘢出嚟，嗱都係芝芝講架咋。」
 
「意味不明？」
 
「嗯，芝芝問佢鍾意邊個，小悠只係講咗『又靚仔，運動又叻，仲識照顧朋友』呢幾個特徵出嚟。」
 
張廷宇講完之後，羅凱撒就莫名其妙地浮現喺我腦海中。
 
「乜你同小悠住埋一齊，都唔知佢鍾意邊個咩？」
 




「…我點會知呢啲嘢？」
 
張廷宇郁一吓膊頭：「咁算囉，當我問錯人。」講完佢拍拍我膊頭，跟手走埋。
 
小悠，鍾意嘅人？
 
又會咁突然間…
 
不過諗落其實唔出奇，佢嗰副咩都躍躍欲試嘅精神，分分鐘當呢啲嘢係新奇體驗嘅一部分。
 
腦海又出現某張戴眼鏡嘅臉孔。
 
「…屌！」
 
我連自己對小悠嘅感覺係咩一回事都未搞得清楚，仲點有空閒去理佢鍾意邊個？




 
就算佢真係鍾意咗羅凱撒又點？係，我唔應該去在意…
 
「各位同學，打開筆記第59頁…」午休之後係中文堂。
 
「高小悠，你讀第一段課文。」
 
「係！」小悠應咗一聲，就企起身開始讀，「在我心中蕩漾的是一片飄浮的雲，你儘管說吧，說你愛我或者不愛…」
 
唔好去在意唔好去在意唔好去在意。
 
「你儘管去選擇那些難懂的字句，把它們反反覆覆地排列開來，你儘管說吧朋友，你的心情我都會明白…」
 
從小悠嘴裏朗讀出嘅字句彷彿幻化成寫俾某人嘅一封封情書。
 




「我只知道朋友，你是我最初和最後的愛，在迢遙的星空上，我是你的，我是你的…」
 
我是你的…
我是你的…
我是你的…
 
好似環迴立體聲一樣盪於耳孔之中。
 
點叫我唔去在意…。
 
佢讀完之後，班房出現零碎掌聲。
 
小悠坐門口旁邊；我坐窗口位最後，剛好一條對角線。
 
今朝都冇發覺，佢應該係未瞓醒，搞到頭髮都未梳好，有幾條飛咗出嚟。
 
我忍唔住笑。
 
「高田帆，笑咩？到你讀。」
 
「…哦哦！」
 
小悠回過頭，對我掩住半邊嘴笑。