【全劇終】《我喺街執咗個失憶嘅女仔返屋企》: 青葉（一）

運動會嘅第二日，我地雖然獲得補假一天，但係24小時並唔足以令我對腳從疲勞同酸痛之中解放出嚟。
 
或者，我應該由而家開始培養做運動嘅習慣。
 
一於週末嘅時候落街跑吓步。
 
我一邊諗，一邊拖住彷彿唔屬於自己嘅雙腿返學。
 
本身以為小悠一早返咗學校，因為佢早過我出門口，但差唔多行到校門嗰陣，佢居然從街道對角出現。
 




「早晨呀，阿帆。」佢跑過嚟講。
 
我被呢個突如其來嘅碰面嚇一跳，連忙回應：「早、早晨，點解你會喺對面行過嚟嘅？」
 
「頭先我特登兜咗去便利店一轉吖嘛。」
 
我地並肩走進校園。
 
「咁早又去買繽紛樂呀？屋企冇晒喇咩？」
 




「唔係繽紛樂呀。」
 
「轉口味？唔食繽紛樂嗱？」
 
呢個時候，我先發現小悠好似收埋啲嘢喺背後。
 
「呢個，俾你。」講完佢將一袋幾重嘅嘢勾到我手上。
 
我打開，隨便拎咗一盒嚟睇：「…休足時間？」
 




「嗯！尋日放假你成日都冇落過床，叫你出嚟食嘢你又行到拐吓拐吓，我就諗你會唔會係腳痛嘞。」
 
本身仲諗住蒙混過去，畢竟跑完步第二日就腳痛呢種表現實在過於弱雞，但我似乎低估咗小悠嘅洞察力。
 
佢就好似睇穿我嘅想法一樣，向我瞇眼笑。
 
我馬上別過視線。
 
運動會後對小悠泛起嘅異樣感覺，並冇隨住日子過去而減退。（雖然只係隔咗一日…）
 
呢幾十個鐘頭裏面，我努力回想以前同小悠相處時嘅氣氛，但越去諗我就越係發現一個事實，就係乜嘢氣氛根本冇變過，變嘅係我嘅感覺。
 
然而，我唔確定呢種感覺究竟係因為我太過在意「空悠」嘅存在而萌生，抑或係基於其他理由而出現。
 
「…多謝。」我用幾乎聽唔到嘅聲量講。




 
不過依舊被小悠聽見：「你唔使講多謝，因為呢幾盒嘢，係我問阿妹用你今個月嘅飯錢買嘅。」
 
「咩話？！」
 
「嗯！我覺得阿帆你要對自己好啲。」
 
「聽講，而家係月尾呀可…？」我感覺到嘴角逐漸僵硬。
 
「嗯！下個星期就係新一個月！」
 
「即係話，你用埋我今個月僅餘嘅百幾蚊飯錢，去買咗呢幾盒嘢返嚟…。」
 
小悠一副後知後覺嘅表情：
 




「咁由今日開始成個星期…」
 
「我都冇錢食飯呀！」我大叫。
 
佢熱淚盈眶，突然捉起我對手：「我知道肚餓嘅感覺，其實我今個月啲飯錢都差唔多用晒，不如我地而家一齊去問張廷宇借錢…？」
 
雖然唔知係邊個灌輸佢呢種冇錢就問人借嘅價值觀，但我當下嘅重點落咗喺雙手嘅觸感上。
 
呢種屬於小悠嘅體溫，絕對唔係第一次感受到。
 
偏偏呢個時候，腦裏回憶起聯校宿營嗰次意外之吻。
 
心臟瞬間傳來發軟嘅感覺。
 
我下意識縮開雙手，向後退兩步。




 
小悠似乎對我嘅行為不明所以：「…帆？」
 
「冇嘢，我突然間覺得對手有啲酸痛，所以…」我一邊迴避目光，一邊搵藉口。
 
「奇奇怪怪。」講完佢就行喺我前面。
 
奇怪嗰個係你…！無啦啦捉住我對手，搞到我乘機亂諗嘢…！
 
明明當刻有更加重要嘅事迫在眉睫！
 
與其被內心莫名其妙嘅情感所困擾，我更加應該思考嚟緊呢個星期午飯嘅解決方法。