【全劇終】《我喺街執咗個失憶嘅女仔返屋企》: 青葉（三）

中文堂之後係體育堂，我地班同羅凱撒嘅A班去咗體育館上堂。
 
今日嘅課堂內容係體操，女仔就喺隔離場打籃球。
 
「玩單槓嘅技巧係…羅同學，你出嚟做個示範俾大家。」體育阿sir講。
 
「係。」羅凱撒企咗起身，然後走到阿sir旁邊。
 
「首先，掌心向前…」
 




「嘿。」按照阿sir講解，羅凱撒輕而易舉握實咗單槓，之後更加示範咗幾次完美嘅360度轉體俾我地睇。
 
「哇！！！」尖叫聲唔係來自我地，而係來自同我地只有一網之隔嘅數名花痴。
 
望住幾個花痴女同學變晒心心眼，突然諗起午休嗰陣張廷宇講嘅嘢。
 
「又靚仔，運動又叻，仲識照顧朋友…」
 
「小心！你冇事吖嘛？」注意力被羅凱撒把聲拉回。
 




原來有個同學捉唔實支單槓，跌咗落地下，羅凱撒即刻走上前關心佢情況。
 
靚仔。
 
運動叻。
 
照顧朋友。
 
100％match。
 




我將視線瞥回籃球場，花咗一陣先搵到小悠嘅身影，佢正專注喺投籃上，似乎冇發現呢邊嘅情況。
 
咻一聲，喺佢手上嘅籃球應聲入網。
 
佢開心到原地跳咗幾吓，然後好似察覺到我嘅視線一樣，忽然往呢邊望。
 
我下意識將目光投到別處。
 
…隔咗幾秒，又忍唔住望吓佢。
 
佢唔知幾時企咗喺分隔開男女兩邊嘅繩網前，表情同我頭先見到嘅幾個花痴女同學一樣，甚至有過之而無不及，口水都流埋嗰隻。
 
羅凱撒關心完頭先跌落地條友之後，繼續做緊360度轉體，其他人就開始自由活動。
 
而小悠望緊嘅方向，正正就係羅凱撒嗰邊。




 
唔好話女同學，就連男嘅都被羅凱撒吸引一樣，向佢行注目禮。
 
小悠會對住佢心心眼，都正常嘅。
 
屌…！咪話咗唔好去在意…。
 
由聯校宿營開始，你已經知呢兩條友有啲嘢架啦——我同自己講。
 
「老師！」係小悠把聲，佢唔知幾時越過繩網，衝咗過嚟男仔上堂呢邊。
 
「咩事呀？」
 
小悠指住正被羅凱撒緊握嘅單槓，雙眼發光：「我可唔可以試吓玩呀？」
 




「可以係可以嘅，但係…」
 
「多謝老師！」人地阿sir講都未講完，小悠就一支箭跳咗上單槓。
 
我呆咗兩秒。
 
…原來唔係望緊羅凱撒，係望緊支單槓。
 
諗到佢頭先個飢渴樣，又忍唔住笑出聲。
 
然後，內心鬆一口氣。
 
兩節體育堂之後，終於放學。
 
準備同小悠一齊走嘅時候，佢話俾我聽佢約咗人。




 
「…約咗邊個？」
 
「秘、密！」
 
「懶神秘…。」平時如果約咗芝芝嘅話，小悠會好大方承認，鮮有會好似今日咁唔肯講。
 
腦裏又擅自往奇怪方向諗。
 
唔通，約咗羅凱撒…？
 
「係咁先啦，阿帆。」
 
我猶疑咗一陣，決定自己一個踏上回家路途。