【全劇終】《我喺街執咗個失憶嘅女仔返屋企》: 休比篇：運動會（四）

一返到看台，小悠就跳咗埋嚟。
 
「阿！帆！你同千惠好叻呀！拎到第二名！」
 
我搲頭：「雖然我都冇乜功勞…」
 
「阿帆你已經跑得好快架喇！不過喺你隔離嗰個女仔，應該係會長嘅屋企人？佢簡直好似識得飛一樣！」
 
一諗起赤城紫悅，內心嘅疑問又再度浮面。
 




我唔知應唔應該同小悠講，佢就係之前擄走休比，兼且跟蹤我地嘅人。
 
「小悠…」或者都係提一提，等小悠有防備好啲。
 
不過我講都未講，許正峰就宣佈跳高第一次召集。
 
「阿帆我唔同你講喇！我要落去準備比賽！」
 
「喂。」我叫住佢，「你記住唔好大意，今次比賽你多咗個好強勁嘅對手。」
 




「你放心啦，我會努力。」
 
雖然千惠運動能力優秀係一個事實。不過運動會舉行前，我同小悠喺體育館唔係白過，我親眼見證佢所付出嘅努力，呢一點無容置疑。
 
加上連羅凱撒都睇好小悠嘅話，佢一定冇問題。
 
結果如我所想，小悠輕易地進身跳高決賽；當然——今日嚟扮住我一日阿妹先嘅千惠都係。
 
「話咁快！嚟到跳高決賽！代表呢個愉快嘅運動會已經過咗一半有多…」許正峰講完，扮咗幾下喊聲。
 




「各位同學都非常努力，值得加許。」駱以雪繼續棒讀。
 
「阿帆！」背後傳來小悠嘅聲音，「你幫我睇住休比先啦，唔知係咪頭先掛住比賽冇理佢，佢而家有啲不安。」
 
說罷小悠將休比放喺我手上。
 
「…今次唔會再咬我啩？」我輕輕摸吓休比嘅皮毛。
 
「我最近成日喺休比耳邊幫阿帆你講好說話，休比應該會睬返你！係咁我走先喇。」
 
「真係咩？」望住手上嘅休比，我忽然諗到赤城紫悅而家身處喺同一個運動場上。
 
即係話，休比其實好危險。
 
而且，小悠明顯冇將休比個籠帶過嚟，為免被赤城紫悅有機可乘，或者我應該帶休比去室內好啲。




 
起碼佢跑起上嚟，都有範圍俾我搵返。
 
於是，我抱住休比，偷偷入咗看台下嘅臨時雜物室。
 
直到小悠比完賽前，都係乖乖留喺度好啲。
 
不過，可能間房過於狹窄焗促，休比顯得格外不安，從我手中掙脫後直奔門口。
 
「…喂！」話音未落，雜物室嘅門突然從外打開，我下意識匿埋。
 
係赤城紫悅。
 
「嘰嘰嘰嘰！」休比一見到佢，發出亂叫聲。
 




赤城紫悅被地上嘅聲音吸引，俯身拾起休比。
 
我偷望佢表情，此刻嘅佢表現得有點驚訝：「休比？你都喺度？」
 
「嘰嘰嘰嘰！」
 
「我知道喇，係你主人帶埋你嚟嘅。」
 
「嘰嘰嘰嘰！」
 
聽住一個人同一隻龍貓有問有答咁進行對話，實在有啲唔真實。
 
不過，小悠喺度嘅話，我知佢會用一句說話解釋——「休比好有靈性架！！！」
 
「咁耐冇見，你都仲係咁痴身…」我匿埋喺儲物架後，望住赤城紫悅輕輕撫摸休比嘅身體。




 
「不如，你跟我一齊走？」
 
聽到呢句，我就知道赤城紫悅嘅目的果然係休比——
 
佢大概會趁呢個機會，再次擄走休比呢個目標。
 
我記得小悠講過，休比對佢嚟講係比親人更加重要嘅存在。
 
唔可以坐以待弊。
 
要喺赤城紫悅得手之前，搶返休比返嚟。
 
我心裏擬好作戰計劃——一陣我會衝出去推開赤城紫悅，趁機拎返休比再拔腿狂奔。
 




倒數三聲，準備實行。
 
三。
 
二。
 
一…

 
「如果你走嘅話，你主人一定同你一齊走，佢最錫就係你，係咪？」
 
…欸？