【全劇終】《我喺街執咗個失憶嘅女仔返屋企》: 休比篇：運動會（五）

我俾赤城紫悅突如其來嘅宣言嚇得停止行動。
 
佢嘅意思係如果休比要走，小悠都會跟埋佢一齊走(？
 
因為小悠的確好鍾意休比冇錯。
 
只係，總感覺頭先嘅說話裏有一絲不協調之處。
 
眼見赤城紫悅同休比有傾有講，我撥走腦海中嘅雜亂想法。
 




當務之急，都係拎返休比重要啲。
 
於是，我照頭先嘅計劃實行——赤城紫悅對我突然出現似乎非常驚訝：「高田帆？」
 
趁佢稍一鬆懈，我從佢手上將休比奪回：「抱歉，我唔會俾你帶走休比。」
 
然後，奔回看台。
 
我將休比放入隨身背囊，並打開一半拉鏈：「休比，為咗你主人，你就乖乖地留喺裏面先。」
 




「你對住個袋噏咩呀？」
 
我抬頭一望，係張廷宇。
 
「邊有呀？」如果俾佢知道我對龍貓講嘢，實周圍唱我係癡線。
 
「有嘢搵你幫手呀，因為我趕住搵芝芝…」
 
為免繼續食閃光彈，我打斷佢：「得！有咩要幫手？」
 




「簡單功夫嚟架啫，你幫我派啲水同毛巾俾啱啱比完賽嘅人。」講完佢將幾支水同毛巾塞俾我。
 
「明，即係打雜…」
 
「是但你點諗啦，」臨走前，張廷宇突然回頭，「係呀，你最好去揾吓小悠。」
 
「佢唔係比緊賽咩？」
 
「比完啦，不過我頭先見佢好似唔係幾開心。」
 
「點解呀？佢輸咗？」
 
「又唔算嘅，咪就係拎個第二；至於第一，好似俾個唔係我地學校一個叫千惠嘅人拎咗。」
 
同張廷宇分別後，我一邊派水俾完成比賽嘅人，一邊尋找小悠嘅蹤影。




 
終於，俾我喺看台嘅另一邊發現佢。
 
佢倚住欄杆，望向遠方嘅藍天。
 
…身上散發出空悠獨有嘅感覺。
 
我搖搖頭，而家唔係諗呢啲嘢嘅時候。
 
我輕步走近：「輸咗就冇晒精神，唔似你喎。」
 
小悠望咗我一眼，兩手撳住欄杆：「俾阿帆見到我咁渣嘅一面添。」
 
我知佢講緊跳高嘅事，於是搖頭：「頭先我去咗儲物室，冇睇到比賽，係張廷宇同我講你拎第二。」
 




「嗯，最後都係拎唔到第一。」雖然扮到毫不在意，但臉上嘅表情已經出賣咗佢。
 
我猶疑咗一陣，講：「對唔住，或者一開始我唔應該俾千惠扮成阿妹去參加今次運動會。」
 
佢搖搖頭：「係我自己技不如人，」就算幾唔識觀言察色，都睇得出佢係強顏歡笑，「只係一諗起5E班嘅大家對我咁有期望，就覺得好對唔住佢地。」
 
「…佢地求其講吓啫，況且你都拎咗個第二吖。」我故作輕鬆道，當刻只係想安慰眼前人。
 
小悠嘅努力我一直看在眼內，只不過，有時候努力過唔一定會得到期待嘅成果，你永遠唔知道其他人花咗幾多倍時間喺同一件事上面；但咁唔代表你所付出嘅未足夠，又或者及唔上人地，因為每個人努力嘅步伐都唔一樣。
 
「唔夠架，張廷宇講過每年運動會都係我地班包尾，所以大家先咁期待我拎塊金牌返嚟。」
 
小悠講得冇錯，每年運動會我地呢屆E班都係墊底。就算千惠以我關連者身分拎到好多牌，但意義根本唔同。
 
「…我好鍾意大家，都好鍾意5E班，我真係好想可以為呢個班做啲嘢。」講到呢度佢停頓一下，「就當係一個回憶。」




 
我諗返起小悠喺體育館努力練習嘅身影。由運動會宣佈舉行嗰日，一直認真對待呢個比賽，揮灑過數不清嘅汗水，每一日、每一日、每一日…
 
對比起自己，從頭到尾只係識逃避，耍手段等自己唔使咁辛苦。
 
「今次真係輸咗俾你…」我低語。
 
或者，我應該學吓全力以赴去做每一件事——就好似眼前人一樣。
 
「你仲記唔記得嗰次學生會補選，我喺台上講過啲咩？」
 
「做咩又講返學生會補選…？阿帆你又話唔可以再提起。」小悠語帶疑惑。
 
「因為要睇吓你係咪記住我啲黑歷史！總之，你唔記得就啱架喇！」
 




只有我一個記得就可以——
 
「去喺有限嘅時間入面築構出接近理想嘅回憶。」
 
我將頭先派剩嘅一條毛巾蓋到小悠頭上。
 
「休比而家喺我背囊裏面，你去抱返佢先，仲有，要小心赤城紫悅。」
 
「赤城紫悅？」小悠將毛巾掀起。
 
「嗯，就係跟蹤我地嗰個人。」講完我準備離去。
 
「阿帆，咁你去邊呀？」
 
呢個時候，許正峰亢奮嘅聲音傳遍每一角落：「嚟喇嚟喇嚟喇嚟喇嚟喇！嚟喇嚟喇嚟喇嚟喇嚟喇！運動會嘅壓軸——由我地偉大嘅學生會會長新創嘅神秘項目！終於嚟到第一次召集！」
 
小悠想創造嘅回憶，即使主角不同，意義會變得唔一樣都好，我想盡力幫佢完成。
 
為此，我而家應該要做嘅事係——
 
 
 
 
「你冇咗嗰塊金牌，就由我幫5E班贏返返嚟。」