【全劇終】《我喺街執咗個失憶嘅女仔返屋企》: 休比篇：運動會（三）

「跑快啲呀！」我被千惠嘅催促聲拉回現實，趕快將接力棒交到佢手中之後，我見識到咩叫扭轉劣勢。
 
剛才因為我分心而大幅落後嘅進度，千惠幾乎一下子追返上嚟。
 
佢接連超越幾個人，好快爬到第二名位置，僅僅落後於羅凱撒。
 
話唔定，真係有機會贏到羅凱撒同赤城紫悅呢個組合…
 
「加油呀！！唔好輸俾羅凱撒！！」我將手弄成揚聲器狀，向前方大叫。
 




旁邊傳出赤城紫悅冷笑聲：「你同撒仔，睇嚟唔係好投契喎。」
 
「撒仔？你指羅凱撒？」
 
「都係一個稱呼啫。」赤城紫悅睇起嚟毫不在意，佢同羅凱撒嘅關係果然耐人尋味。
 
「你究竟…！」準備再問嘅時候，赤城紫悅遙指賽道嘅終點，「喔，衝線喇。」
 
我隨佢嘅視線望去，透過廣播傳來許正峰嘅聲音，揭示呢場比賽嘅結果——
 




「有結果喇有結果喇有結果喇！第一名毫無疑問！！係我地嘅最強會長！！！數碼精靈凱撒！！！」
 
佢一講完，全場歡呼聲四起。
 
繼而係駱以雪嘅聲音：「請你自重一下，以及尊重吓羅會長，畢竟佢係一個人類，而唔係數碼精靈。」
 
「唉，我就話阿雪你唔好咁認真啦…」
 
我走到終點位置，千惠背對我喺度飲水。
 




「…對唔住，如果唔係因為我太慢，你一定會贏到羅凱撒。」我諗咗兩秒，同佢道歉。
 
「你喺度講咩呀？好哥哥。」佢擰轉身。
 
「呢個稱呼係咩事…」
 
「等我諗吓先，平時晴晴會點樣叫你呢？好哥哥？お兄さん？定係兄ちゃん ？」
 
「同我停止呢啲奇怪叫法…話說你幾時又識日文架？」
 
「呢啲睇得動漫多，個個都識講架啦～」差啲唔記得，眼前呢個係拉我落咒術迴戰坑嘅人。
 
「唔代表你可以扮晴…阿妹用埋啲奇怪稱呼叫我！」
 
「哈哈哈哈哈，原來你會為呢啲事怕醜架？」佢開啟咗恥笑mode。




 
「你記住我地係暫時扮住兄妹先！唔好諗住乘機整估我！」
 
「知道啦，阿哥。」佢收起笑聲，「我冇嘢喎，比賽場上有贏有輸好正常。」
 
「至少，我地都拎到塊銀牌。」呢句唔知算唔算安慰說話…
 
「我地？阿哥你會唔會誤會咗啲咩？塊牌係我拎返嚟，你都冇出過力。」講完佢偷笑，我就知佢又串我。
 
「…我起碼有好好上場跑！」
 
「然後徹徹底底咁輸俾羅凱撒個隊友…」
 
「…喂！」
 




「阿哥你一陣會嚟睇我跳高架可？」
 
「…跳高？你參加咗跳高？」
 
「我阿爺講過，第一名呢樣嘢拎幾多次都唔會嫌多，所以除咗親子接力賽，我仲報咗其他嘢玩，跳高只係其中一個。」
 
…乜我地學校冇限制每個人嘅參加上限咩。
 
「我冇同你講咩？我小學開始每日都會做跳高練習，所以好有信心可以拎個金牌返嚟。」
 
…仲有，睇嚟圍繞喺我身邊嘅人都好鍾意練跳高。