【全劇終】《我喺街執咗個失憶嘅女仔返屋企》: 休比篇：運動會（二）

「羅凱撒？！」我望向正在做熱身運動嘅羅凱撒。
 
千惠將目光投向我望緊嘅方向：「乜原來你地會長都參加咗接力賽？」
 
「如果佢都參加嘅話，即係我地嘅勝算大大降低…」
 
「跑都未跑，你又知？」
 
「聯校宿營嗰陣你都見識過佢嘅實力啦，佢唔只讀書叻，連運動能力都係我地學校數一數二。」我解釋。
 




「你一定係唔記得咗啲嘢。」
 
「唔記得乜嘢？」
 
「聯校宿營嘅野外定向——嗰次我地快過羅凱撒，即係話嚴格嚟講，羅凱撒只係我地嘅手下敗將。」
 
我諗返起聯校宿營嗰次，我地的確喺野外定向環節拎第一名，而羅凱撒只係拎第二。
 
「或者，同佢一組嗰個跑步好勁呢…」講開又講，得羅凱撒一個人喺度做熱身，未見佢嗰位親人。
 




話明親子接力賽，佢唔會自己一個人落場跑晒佢啩？
 
「除非佢阿爸阿媽係奧運金牌，否則結果都會係一樣。」說時遲那時快，千惠已經開始做緊熱身。
 
我跟住佢嘅動作，係咁咦拉吓筋。
 
拉到七七八八嗰陣，負責老師叫我地可以去起點準備。今次比賽係2x200米，我做第一棒，千惠就理所當然係第二棒。
 
而羅凱撒，貌似都係第二棒，而且咁啱喺正我地隔離跑道。
 




咁第一棒係…？我望向旁邊，答案令人意想不到。
 
以羅凱撒親人出席今次運動會嘅人——
 
「赤城紫悅？！」
 
「嗨，高田帆，我地又見面喇。」
 
「點、點解你會出現喺呢度？！」
 
「如你所見，以學生親友嘅身分嚟享受今次嘅運動會。」
 
「你係羅凱撒親友？」愈諗愈唔明。
 
佢冷笑一聲：「而家，仲未係時候…」




 
「咩意思？」
 
「On your mark, set！」
 
鳴槍聲代替咗赤城紫悅嘅回答，喺我回過神來之前，佢已經一陣風咁奔馳喺賽道上。
 
我趕緊追上去。
 
因為，除咗佢同羅凱撒嘅關係之外，仲有另一件我相當在意嘅事。
 
我花盡全身氣力先勉強追得上赤城紫悅嘅速度，而佢，神情依然相當輕鬆。
 
「…你點解，要跟蹤我同小悠？」我喘住氣，將呢件事問出口。
 




我從後側瞥見赤城紫悅微微勾起嘅嘴角。
 
「如果，你呢份洞察力可以用喺第二啲方面嘅話…」
 
我感覺到圍繞喺我同赤城紫悅周邊嘅空氣於一息間靜止。
 
「第二啲…方面？」
 
直到空氣恢復流動，赤城紫悅嘅動作忽然加快，唔使幾秒就拋離我幾個身位。
 
某程度上，佢承認咗自己係之前跟住我同小悠嘅犯人。
 
點解佢要咁樣做？
 
目的果然係休比…？