【全劇終】《我喺街執咗個失憶嘅女仔返屋企》: 休比篇：運動會前夕（下）

之後嘅一個星期，我每日放學都會陪住小悠練習跳高，同時留意赤城紫悅嘅動向。
 
不過講起嚟都幾奇怪，自從上次sd完訊息俾呢個赤城紫悅，佢唔單止覆都冇覆過，仲好似消失咗一樣，冇再以跟蹤狂嘅姿態出現喺我地眼前。
 
我不禁懷疑，嗰日見到嘅會唔會只係我錯覺，其實由頭到尾跟蹤狂都係另有其人，又或者學阿妹講，根本冇跟蹤狂呢回事，所有嘢都係我地FF出嚟。
 
「阿帆！你睇唔睇到呀？我又刷新咗新紀錄呀！」小悠落地之後，跑過嚟同我講。
 
「吓？睇到，睇到呀。」我回過神來。
 




「你都冇睇嘅！算，我問張廷宇！」然後佢跑去搵張廷宇，「張廷宇！你睇唔睇到呀…」
 
「嘰嘰嘰！」呢個時候，休比喺小悠個書包伸咗個頭出嚟。
 
我乘機對佢講：「最衰都係你，惹個咁嘅怪人返嚟…唔係嗰日你跟佢走咗，就唔會出現疑似跟蹤狂！」
 
「嘰嘰嘰！」
 
「哇呀呀！我隻手指呀！！！」呢隻死仔果然有夠小氣，講兩句就撲出嚟咬咗先算。
 




「阿帆，發生咩事呀？」
 
「…冇，冇事呀。」俾小悠知道我挑釁休比，實話我自己攞嚟。
 
小悠嘅視線瞥向下方，然後語帶驚慌：「阿帆你隻手指流緊血…！」
 
我下意識低頭望，真係有個小傷口。
 
「喂，我要趕住搵芝芝，走先喇！」張廷宇同我地揮揮手就走咗。
 




小悠同佢道別之後，喺書包摷咗塊膠布出嚟：「俾你！」
 
我好自然遞出手指，等待佢為我貼上。
 
「……。」小悠嘅表情有啲疑惑。
 
「……。」兩秒之後，我趕快收起手指。
 
我喺度諗咩…？居然等佢幫我貼…。
 
「阿帆唔通你想我…」
 
「收聲！冇！唔好諗多！」我簡潔有力地回應，然後接過佢手上嘅膠布。
 
「咁我去清場先。」佢表情帶點疑惑。




 
「嗯。」
 
處理緊手指傷口同時，我抬頭望向正在收拾場地嘅小悠。
 
然後，無啦啦諗起嗰次佢喺貯物室解救小鳥嘅事。
 
以及嗰一雙只屬於空悠，彷彿正在凝望未知之所嘅瞳孔。
 
呢一刻，究竟你又係邊個？
 
就係咁，種種顧慮交織之下——
 
對赤城紫悅嘅懷疑。
 




有關神秘項目嘅隱憂。
 
…以及，無可否認——心中泛起對小悠嘅異樣情感。
 
終於迎來運動會舉行之日。
 
我更加估唔到，再見到赤城紫悅，竟然係喺運動會裏面。
 

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

由於小弟儲文量不足，聽日暫停一日，下星期再開。