【全劇終】《我喺街執咗個失憶嘅女仔返屋企》: 休比篇：運動會開幕

「今日！就係全校期待嘅高中運動會！！！大家對於唔洗上堂呢件事係咪特別興奮呢？哈哈，我都係講笑啫…」
 
喺運動場出面，已經聽到許正峰把聲透過廣播系統傳達到現場每一個角落。
 
聽講，佢同駱以雪係今日運動會嘅司儀。
 
能夠匿埋喺陰暗處，鳩噏一整天就可以收工，都不失為一份好差。仲未提佢可以成日對住佢夢寐以求嘅女神。
 
「請你自重啲，雖然今日特別活動，但都係一個正式嘅上學日嚟。」
 




「難得今日係一年一度嘅運動會～好心阿雪你就放鬆啲啦～」
 
不過，聽住佢地咁樣打情罵俏，某程度上其實係件幾尷尬嘅事。
 
我喺運動會門口，只要等埋阿妹嚟就可以一齊入去——阿妹今朝臨出門口之前話有啲唔舒服，叫我自己出發先；至於小悠，更加係一早就帶住休比出咗門口。
 
「阿帆！我已經成功帶咗休比入場喇！」係小悠傳送過嚟嘅訊息。
 
我暗地嘆口氣，估唔到學校喺呢方面真係寬鬆到呢個程度，連龍貓都可以當係學生嘅親人…
 




電話再度傳來響聲，今次係阿妹——
 
「哥，對唔住…我真係唔舒服到出唔到門口，不過你你唔使擔心！我已經叫咗我朋友嚟扮住你嘅親人先，等你喺運動會冇咁悶！」
 
我即刻錄音回佢：「喂喂喂！唔使喇，我自己一個入去得架喇…」
 
因為呢種似曾相識嘅感覺，加上阿妹嘅朋友其實嚟嚟去去我只係諗到一個——
 
可惜，已經太遲。
 




「高田帆！」
 
我拎轉面，揚起僵硬嘅笑容：「乜咁啱呀？千惠。」
 
「你就唔啱啦，有啲咁好玩嘅嘢都唔預我，好彩晴晴及時通知我嚟頂佢個位～」千惠今日著住佢學校嘅體育服。
 
「…阿妹有冇同你講，我地學校呢次運動會係要帶親人？」
 
「有，佢咩都同我講晒喇～」
 
「既然你知道嘅話，咁點解仲嚟嘅？」
 
「其實睇真啲，我地兩個都幾似樣吖？今日就等我地做住一日姊弟先！定係你想係兄妹呀？」
 
「你係點樣得出似樣呢個結論…不過呢！其實運動會一啲都唔好玩架！又要曝曬，又要坐一日，不如你都係趁而家返去啦…」我作最後抵抗。




 
「今日係星期日我都咁早起身特登出嚟幫你，你唔會趕我走嘅！同埋我聽講，唔係你學校嘅學生都可以參加比賽架可？」
 
「係就係…不過，你想點？」我昇起一陣不祥預感。
 
「唉唔好煩喇，我地今日一於扮龍鳳胎！」未等我同意，佢就拉咗我入運動場。
 
「喂喂…！」