【全劇終】《我喺街執咗個失憶嘅女仔返屋企》: 休比篇：運動會前夕（上）

臨瞓之前，小悠喺書枱上嘅月曆劃咗一吓。
 
「仲有一個星期！」
 
我望吓個月曆，發現佢喺下星期日標記咗「運動會」。
 
「乜你原來咁期待運動會架咩？」雖然佢對任何學校活動都好期待，不過重視到標記喺月曆，真係第一次見。
 
「期待呀！因為今次運動會，5E班嘅大家對我有好高期望！」
 




貌似因為小悠嘅運動能力喺班上數一數二，所以我地班都旨意佢喺運動會拎牌。
 
「咁你記得加油，拎個跳高金牌返嚟。」
 
「梗係啦！所以淨低嘅日子，我日日都會去體育館練習，阿帆你唔使等我放學喇。」
 
「你練還練，記住唔好勉強自己。」我提醒一句。
 
「知道！」
 




我心不在焉地把玩手上嘅電話，等候跟蹤狂嘅真面目——赤城紫悅嘅回覆。
 
可惜由下晝到而家，電話響都冇響過。
 
心裏突然閃過一陣不安。
 
我猶疑一陣，然後開口：「都係唔好喇，呢幾日放學我同你一齊練習啦。」
 
「阿帆你又參加咗跳高咩？」
 




「…我去練拋豆袋唔得咩？！」雖然幾乎肯定，神秘項目應該唔係拋豆袋…
 
「哦，阿帆你都要加油呀！」
 
又一陣沉默，我諗緊好唔好同小悠講關於跟蹤狂嘅事。
 
最後，我都係講：「小悠，之前嗰個跟蹤狂，我諗我知佢係邊個。」
 
本來瞓低咗嘅佢即刻彈起身：「係邊個？？？」
 
「…就係之前擄走休比嘅犯人。」
 
「擄走休比嘅犯人…？」
 
「嗯，佢嘅外形同阿妹之前所講嘅一致。」




 
小悠一臉疑惑：「咁點解，佢要跟住我地？」
 
「如果我冇估錯嘅話，佢嘅目標唔係阿妹，唔係你，都唔係我，而係休比。」我冷靜地推論出。
 
「休比？！」
 
「嗯，雖然唔知佢嘅具體理由係咩，不過除咗休比之外，我諗唔到點解佢要跟住我地。」
 
「咁、咁休比咪好危險囉？」小悠慌張起嚟。
 
「個跟蹤狂應該唔會猖狂到爆門入屋啩？但係穩陣起見，呢排都係睇實啲休比好啲。」
 
「唔得！等我聽日開始，帶埋休比一齊返學！仲有！運動會嗰日都一定要帶埋休比去！」小悠抱實咗休比講。
 




「你記得記得上堂唔好俾休比走出嚟，唔係我都幫你唔到。」
 
「我知道喇，休比一定會乖乖地架嘛，係咪呀休比？」
 
「嘰嘰嘰！」
 
望住呢個畫面，忽然諗起哈姆太郎同佢嘅主人。我暗地嘆一口氣，然後攤倒床上。
 
「唔講仲以為休比真係你嘅親人…不過諗落可能又啱，你地大家都係嚟自垃圾房，哈。」我笑，記得當日小悠話喺垃圾房執咗隻龍貓返嚟嗰陣，我真係嚇一跳。
 
「阿帆你錯喇，休比對我嚟講——」
 
窗外，一陣寒風掠過，我將綿被拉緊一下。
 
「係一個比親人更重要嘅存在。」從地板上傳來小悠嘅聲線，聽起嚟虛無飄緲。