【全劇終】《我喺街執咗個失憶嘅女仔返屋企》: 休比篇：小悠的親人

「親人運動會？」做緊功課嗰陣，小悠問我。
 
返屋企之後，我、小悠同埋阿妹圍坐喺飯枱前，一齊研討功課，然後我提起咗運動會嘅話題。
 
「係呀，你冇睇學校通告咩？我地偉大嘅學生會長羅凱撒諗出嚟嘅最高傑作。」
 
「即係好似小學嘅親子運動會咁，帶埋屋企人去？」阿妹語帶疑惑。
 
小悠睇吓部電話，五秒後抬頭：「阿妹你講得啱！真係寫住要帶一個親人去…」
 




「係咪覺得好Q煩呢？好好地運動會又要帶個乜鬼親人去。」
 
「好…」
 
「好？」
 
「好熱鬧呀！」小悠有啲超乎我想像，雖然平時佢對任何學校活動都會產生興趣，但今次運動會要帶親人，我仲以為佢冇人冇物，會覺得唔關自己事添。
 
「你咁開心做乜…？」
 




「因為，咁即係話阿妹都可以一齊去運動會玩囉？」小悠望住阿妹。
 
「吓？雖然通告上面係咁樣寫…」
 
「阿帆同阿妹你地父母長期唔喺度，即係阿帆得阿妹你一個親人囉？所以運動會嗰日我地可以一齊去玩！」
 
「小悠，其實呢…我唔諗住照通告所講咁帶咩親人去。」我解釋。
 
「點解呀？？？」
 




「你唔覺得成件事好尷尬？而家小學雞咩…親子運動會，嘖。」
 
小悠即刻扁嘴，眼眶一秒注滿好假嘅淚水：「等我仲諗住，可以同阿妹一齊參加運動會。」
 
今次嘅運動會仲有個規則，就係學生嘅親人都可以參加運動會嘅項目。
 
「真係on9到唔識形容，有咩理由我地自己學校運動會可以俾外人玩埋一份。」
 
如果係咁，帶個運動天才嚟，咪可以拎晒啲牌。
 
「其實，我去唔去無所謂嘅…反正阿哥都話唔諗住帶親人去嘅話…」
 
阿妹一講完，小悠即刻睥住我：「阿帆你做咩唔俾阿妹一齊去呀？我好想阿妹都一齊去呀～～～」
 
「…我幾時有唔俾阿妹去呀？！如、如果阿妹想跟埋去嘅話，我冇咩反對嘅…」




 
「咁，我去嘅話都冇話唔可以嘅。」阿妹支支吾吾。
 
「好嘢！就咁決定啦！運動會嗰日，我地三個一齊去！」小悠雀躍起嚟。
 
我醒起一個問題：「喂，咁你呢？唔帶親人去就要寫家長信解釋喎，你去邊度搵個親人帶去？」
 
「邊個話我冇親人？」佢一副意想之內嘅表情。
 
「你有親人？」
 
「休比！」小悠一聲令下，休比跳到佢膊頭上，「我嘅親人咪喺度囉！」
 
「…休比？」
 




「小悠，你真係諗住帶休比去？得唔得架？」阿妹比我早一步發問。
 
「佢通告寫住帶一名親友，又冇話一定要人類。」
 
「…呢個前提我諗唔使特登說明啦吓嘩。」我暗地吐槽。
 
「總之，我嗰日會照帶休比去！學校問到嘅話，我就話休比係我嘅親人！」小悠講到呢度摸吓休比，「係咪呀休比？」
 
「嘰嘰嘰嘰！」
 
「是但啦，你鍾意啦…」我已經冇眼睇，呢件事都係交返俾學校處理。