【全劇終】《我喺街執咗個失憶嘅女仔返屋企》: 休比篇：懶係創新的元素

我望住部電話，搵返嗰個人之前俾我嘅聯絡方法。
 
然後鼓起勇氣：
 
「點解你要跟住我？」
 
發送。
 
阿妹之前遇到嘅跟蹤狂，同尋日我同小悠放學見到嘅好大機會係同一個人。
 




而尋日喺巴士上層望出去嗰陣——雖然著住連帽黑色長褸，又戴住黑超（題外話，我一直覺得光天化日之下咁樣著仲明顯…），但我留意到長褸底下，有部分衣角露出。
 
係日本人去祭典嗰陣會著嘅浴衣。
 
再加上身高同體型相符，所以我大膽肯定，呢個跟蹤狂嘅真面目，就係之前將休比擄走嘅犯人——
 
赤城紫悅。
 
不過上完半晝堂，都未見佢覆。
 




午息嘅時候，我去咗搵唐夕嵐，目的係確認有關神秘項目嘅事。
 
「你唔好問啦，師父。」佢逃避我眼神。
 
「咁即係話呢個神秘項目，一定唔係拋豆袋呢啲輕鬆嘢！」
 
「…因為我都只係負責俾idea，至於神秘項目具體係啲咩，係由會長決定架。」
 
「咁你身為學生會副會長，一定知道神秘項目到底係啲咩啦？」
 




唐夕嵐面帶委屈地搖搖頭。
 
「話就話神秘項目，使唔使神秘到連學生會內部都唔知？即係得羅凱撒一個人知？」
 
佢點點頭。
 
「…on9。」隨即補回一句，「唔係鬧緊你。」
 
「我淨係知，神秘項目唔會同既有項目重覆…」
 
「呢樣我都知，你講過喇。」
 
「其他我真係唔知喇。」
 
「好好地一個運動會又要懶創新，都唔知羅凱撒諗咩。」




 
「其實除咗神秘項目之外，今年仲新加咗一個元素。」
 
「又玩咩元素？」
 
然後，唐夕嵐拎部電話出嚟：「學校已經send咗通告出嚟，你快啲睇吓！」
 
我打開學校app，裏面果然有一份運動會注意事項。
 
快速掃視一次，不外乎係恆常提醒，直到目光落到最後一行——
 
「本年度運動會主題為親友共聚，請每位同學各携同一位親友出席，享受天倫之樂。」我大聲朗讀，然後問唐夕嵐，「即係點呀？」
 
「即係字面意思咁囉，今年嘅運動會每個人都要帶個親人到場。」
 




「邊個天才諗出嚟架？個運動場邊裝到咁多人？仲有，屋企人唔洗返工呀？」
 
「…呢一層，會長話運動會會分開初中同高中進行，咁就唔怕運動場唔夠坐，至於返工呢個問題，今年嘅運動會會改喺星期日舉行。」
 
 
「如果我唔帶嘅話，佢都吹我唔漲架啦。」我翹起雙手。
 
「原則上係嘅，不過就要寫家長信解釋囉，其實我都覺得會長呢個提議怪怪地，邊個會想帶埋阿爸阿媽嚟運動會喎，不過佢堅持要咁做，我地都冇辦法。」
 
「…咁on9嘅嘢都諗得出，呢個羅凱撒真係一絕。」
 
鐘聲響起，代表午息完結。
 
「咁我走先喇。」
 




「…等陣先。」我叫住佢，「我想問你呢排教緊小悠唱歌？」
 
「哦，佢之前教我整蛋糕吖嘛，咁我咪教佢唱和泉紗霧隻角色歌囉！」
 
「…又係和泉紗霧，你究竟識唔識其他歌？」
 
「我！唔准！你嫌棄！紗霧！」講完佢嬲爆爆走咗。
 
…而家啲10後真係。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
給親愛的讀者／路過的客官：開咗個避世用後備ｉｇ, 只會貼呢個故相關嘅嘢, follow嘅都係我嘅真愛—＞re_knincarkgr