【全劇終】《我喺街執咗個失憶嘅女仔返屋企》: 休比篇：空與白

我將小悠分做平時嘅佢，以及某啲情況下先會出現嘅佢。
 
為咗分辨兩者，平日白白痴痴嗰個姑且叫白悠；而散發出空洞眼神嗰個就叫空悠。（唔係寄嗰啲）
 
兩者合併就會得出空白一詞，亦都代表住小悠呢個人嘅來歷係一片空白。
 
我不禁佩服自己，喺命名上或者有啲天份。
 
返正題。
 




根據經驗，大部分時間會出現嘅都係白悠，白悠對食物毫無抵抗力，而且冇乜智商可言，用三個字總結就係小學雞；
 
而空悠則全身上下散發住一股同白悠完全唔同嘅氛圍，有時候會講啲奇奇怪怪，聽起嚟有啲深奧嘅說話，聲音比白悠溫柔一啲。瞳孔裏藏著深邃嘅感覺，彷彿正在凝望未知嘅遠方。
 
雖然…佢地明明係同一個人，我咁諗實在有啲荒謬，況且話唔定空悠只係佢為咗贏呢次比賽而扮出嚟嘅。
 
不過撇除所有嘢，我嘅目的得一個——只要十二點前白悠出現，就代表我贏。
 
為此，我一早將一排繽紛樂收喺身後。
 




正所謂最肚餓嘅時間永遠係夜晚，我唔信佢忍到口。
 
冇幾耐，房門被打開，係啱啱沖完涼出嚟嘅小悠。
 
係機會…！
 
「小悠！你睇吓我準備咗啲咩俾你？」我亮出身後嘅繽紛樂。
 
佢望咗兩秒，然後講：「咁啱有啲肚餓…多謝阿帆！」
 




望住佢一路食嘅樣，依舊同平時有啲唔同。
 
平時嘅佢一定會食到成嘴都係，跟手問我：「阿帆，你食唔食呀？」
 
但呢一刻嘅佢並冇咁做，只係安靜咁食。
 
解決完手上嘅繽紛樂，佢就攤咗喺床舖，一邊哼唱不知名歌曲，一邊逗手上嘅休比。
 
「哼緊咩歌？」
 
「係夕嵐教我嘅一首歌。」
 
「…你同佢幾時又變到咁熟？」
 
「佢之前叫我教佢整蛋糕，作為報答佢就教我唱呢首歌。」




 
「…原來係咁。」
 
明明同佢瞓同一間房已經半年，但今晚或者太著急要引白悠出嚟，令我有種特別緊張嘅感覺。
 
「等我學識咗之後，唱俾你聽吖。」
 
「…哦哦。」
 
愈係去在意眼前嘅究竟係空悠定白悠，心臟就跳得愈快。
 
我選擇躺到床上咩都唔諗，冷靜吓頭腦先。
 
「…帆。」
 




我沿聲音方向轉去，映入眼裏係一雙紫色瞳孔。
 
深邃嘅眼神。
 
「哇！！」我反射性向後退，後腦撞上背後牆壁，「…痛！」
 
小悠唔知幾時靠咗喺我床邊，手上抱住休比。
 
「阿帆你有冇事呀？」
 
「冇…你做咩無啦啦哄埋嚟？」
 
「我諗到方法令休比重新親近你！」
 
「係咩方法…？」




 
小悠再次靠近：「就係，叫休比同你瞓一晚！等佢習慣你身上嘅氣味之後，就會變得鍾意你。」
 
我凝望眼前人，拼命想要搵返平常面對呢雙眼睛嘅感覺——
 
但似乎白費心機，心跳只係不斷攀升…。
 
明明呢半年嚟，內心冇產生過異樣感。
 
雖然諗返轉頭，一開始同小悠相遇嗰陣，我承認極少時候係有過心動感覺，但隨住開學之後佢嘅本性盡現（？），呢種感覺慢慢冇再出現過。
 
今晚發生咩事，呢種感覺又出現返。
 
「帆？」眼前人擺出疑惑表情，同時靠得更近。
 




我即時退後：「走呀！唔好埋嚟呀！」
 
「做咩呀？」佢抱住休比坐上床，「你咁樣休比會好唔開心架…」
 
我用被蓋住自己：「得喇！我投降呀！」
 
「投降？」
 
「我買原箱繽紛樂俾你喇！你快啲變返白悠…」
 
「…白悠？」
 
「總之係我輸，你快啲落返地下先！」
 
靜咗十秒。
 
我慢慢揭開張被，見到小悠跳返落地。
 
然後——
 
「好嘢！！！阿帆應承買原箱繽紛樂俾我呀休比！！！」
 
企喺小悠膊頭上嘅休比回應：「嘰嘰嘰嘰！」
 
「我要話俾阿妹知！！！係我贏咗！！！」
 
係白悠。
 
講完之後，佢跑咗出房。
 
我喺度諗，自己係咪中咗計。
 
所謂嘅空悠唔通真係小悠為咗贏呢次打賭而扮出嚟…？
 
但係佢會唔會忽然間醒目到咁？
 
剛才攀升嘅心跳，依然尚未平復。
 
我抖咗幾啖大氣，強行將心跳抑壓下去。
 
趁小悠仲未返入嚟，我選擇早點入睡，忘記關於空悠嘅事。