【全劇終】《我喺街執咗個失憶嘅女仔返屋企》: 休比篇：疑問

同小悠返緊屋企嘅途中，我感覺到一股來自背後嘅危險視線。
 
我走到暗角位匿埋，好讓我透過對面嘅後視鏡掌握情況。
 
「阿帆你做咩匿喺度呀？」小悠似乎不明所以，於是我趕快做出安靜手勢。
 
映照喺後視鏡嘅畫面——雖然有啲模糊——係一個陌生嘅人影。
 
180左右嘅身高，配上一件連帽黑色長褸。
 




完全符合阿妹嘅描述。
 
「…跟蹤狂！」小悠終於發現。
 
冇錯，我都好驚訝——阿妹口中嘅跟蹤狂居然會鎖定小悠為目標。
 
而呢個跟蹤狂，此刻似乎正為我同小悠突然消失喺佢視線範圍呢件事而煩惱。
 
「…我都話真係有架啦！」小悠壓低聲線。
 




「幻覺…一定係幻覺！」
 
「我地快啲諗辦法擺脫佢仲好啦！」
 
「辦法…辦法…有！」我望住正埋站嘅巴士，「見唔見有架巴士過緊嚟？陣間我數123，然後咩都唔好理，衝咗上車先算！」
 
「…知道！」
 
「準備，123！」數完之後，我同小悠各自用最快嘅速度衝咗上車，然後直奔上層。
 




「呼…」總算有驚無險。
 
我望向跟蹤狂所在嘅位置，呢個角度下，我得以從頭到尾睇清楚呢個居然會對小悠產生興趣嘅怪人。
 
等陣，呢個係…？
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
 
經過一番波折，我同小悠終於返到屋企。
 
迎接我地嘅係阿妹。
 
「點呀？小悠喺學校有冇犯規？」
 
我望吓小悠，佢一副期待我快啲講嘅樣。
 




「冇，雖然我都想有。」講完我擰歪臉。
 
「如果去到十二點，小悠依然冇犯規，勝利就係屬於佢，阿哥你到時唔可以再話佢係小學雞。」
 
「…知道喇。」
 
「仲有，承惠一箱繽紛樂！」小悠對我攤大手板。
 
「…你實贏架咩？！我睇死你跟住落嚟一定會犯規！睇吓點！」
 
然而，接下來嘅時間，小悠一直好安份。
 
已經夜晚十點，距離十二點淨返僅僅兩個鐘。
 
睇嚟要諗吓辦法：煽動又好，老屈又好，都要佢露出馬腳，咁我就可以大聲同阿妹宣佈——我係贏家！




 
我瞓喺床上面，不停思考對策。
 
先整理一吓小悠全日嘅舉動，我由朝早食班尼迪開始回想，到佢俾同學圍觀、放學練跳高、喺貯物室裏面解救被困嘅小鳥…
 
「佢嚮往嘅係藍天，唔係困住佢嘅牆壁。」
 
當時佢嗰種帶點空洞嘅眼神，再度浮現於腦海之中。
 
諗返轉頭，小悠已經唔係第一次俾我呢種感覺。
 
難怪總係有種講唔出嘅熟悉。
 
記得半年前，小悠住喺我屋企嘅第一晚，我心裏面問過一個問題。
 




半年後嘅呢一刻，望住嗰隻同佢去主題公園贏返嚟，而家俾我放咗喺窗邊嘅龍貓玩偶，我再度產生同樣嘅疑問——
 
究竟你係邊個 …？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

補返龍貓玩偶由來：一個人的遊樂園（下）