【全劇終】《我喺街執咗個失憶嘅女仔返屋企》: 休比篇：解救

試咗唔知幾多次之後，小悠終於成功連埋件冷衫跨過橫桿。
 
照咁睇，佢果然有望喺運動會裏面拎牌。
 
聽張廷宇講，班上嘅同學貌似對小悠寄予厚望，因為我地班嘅體育成績向來麻麻，鮮有機會可以企喺頒獎台上。
 
所以，如果小悠真係拎到牌，咁身為同班同學嘅我地，理應都會好光榮。
 
難怪頭先成功跳到之後，佢地兩個會開心到發出連環歡呼聲。然後，就喺呢片歡呼聲下，張廷宇接到來自芝芝嘅愛的呼喚——
 




「喂！我走先喇！芝芝等緊我！小悠你要加油呀！我同芝芝都睇好你！」
 
送走咗張廷宇之後，我同小悠就合力搬返啲嘢去貯物室。
 
「呼…」掉低張成呎厚嘅墊後，我攤喺上面抖氣。
 
「阿帆你真係要多啲鍛練身體，搬少少嘢就索晒氣。」
 
「關咩事？係張墊太重…」
 




「唔得，我要話俾阿妹知！叫佢多啲迫你做運動！」
 
我指住小悠：「喂！你記得你到今晚十二點都唔可以同阿妹告狀！如果唔係就係我贏！」
 
我講緊嘅係一直進行中嘅禁止耍白痴挑戰，我當然冇忘記呢件事。
 
「…至多完咗今次之後，我先同阿妹講！」
 
「明明就係小學雞…」我暗地搖頭。
 




「阿帆，你唔走呀？」小悠準備開門。
 
「…我想喺度攤多陣。」
 
零碎嘅腳步聲過後，我感覺到隔離多咗個人。
 
「咁好啦，我陪你。」小悠嘅聲音聽起嚟非常近。
 
貯物室呢度有個小天窗，可以望見外面嘅藍天。
 
我閉上雙眼，好好享受呢一刻啲悠閒。
 
「阿帆。」過咗唔知幾耐，小悠忽然叫我。
 
「嗯？」我半睡半醒地回應。




 
「真係好神奇。」
 
「……？」
 
「明明我地而家同出面嘅人只係隔住一道牆，甚至聽到佢地練習緊嘅聲，但個世界就好似得返我地咁。」
 
「…得返我地？」即將被睡魔擄走嘅我只係隱約聽得到小悠嘅說話。
 
「嗯，就只有兩個人。」
 
「咁樣好咩…？冇張廷宇…冇芝芝…冇阿妹…又冇休比…」講完呢句之後，我就進入夢鄉。
 
我發咗個好低能嘅夢。
 




夢入面休比係一隻嚟自龍貓之國嘅神獸，受到全國人民景仰，而小悠自出世起就係聽命於佢嘅使者。
 
「…嘰嘰嘰嘰！」
「……嘰嘰嘰嘰！」
 
有一日，休比唔知做乜不停喺度叫。
 
我忍唔住打佢，結果被佢反咬。
 
「…嘰嘰嘰！」夢入面嘅休比，變到成個人咁大。
 
「…帆！」來自龍貓使者小悠嘅呼喚。
 
「……」
 




「…嘰嘰嘰吱吱吱！」休比嘅聲音，逐漸變成雀鳥類嘅叫聲。
 
「…帆！快啲過嚟睇吓！」
 
我張開眼睛，小悠原來唔知幾時起咗身，企咗喺貯物室嘅角落。
 
「做咩？」我一邊捽眼，一邊走近。
 
「有隻雀仔俾繩網困住咗。」
 
我循佢嘅方向望去，發現繩網裏面真係有隻雀仔，露出痛苦表情。
 
小悠將手往前伸去，小心翼翼地解開纏喺雀仔身上嘅繩。
 
脫困嘅雀鳥，叫聲由悲轉喜。




 
「佢飛唔飛到？」
 
「我睇過佢對翼，應該冇受傷。」小悠將雀仔捧喺手心。
 
「咁我地走啦，帶埋隻雀。」我準備推開貯物室嘅門。
 
小悠搖搖頭，然後將幾個木箱推到天窗下方。
 
「阿帆你幫我睇住隻雀仔先。」佢將雀仔交到我手上，然後獨自爬上木箱，打開原本關上嘅天窗。
 
「俾我。」佢向我伸手。
 
雀仔往小悠嘅手一跳，隨即振翅飛翔，好快就不見蹤影。
 
小悠跳返落地，拍拍腿上嘅灰塵。
 
「…我地經體育館出去咪一樣？」
 
「唔一樣架。」
 
「…？」
 
「佢嚮往嘅係藍天，唔係困住佢嘅牆壁。」
 
我有種感覺，呢一刻喺小悠嘅瞳孔反映出嚟嘅唔係我地所在嘅貯物室，都唔係散落一地嘅體育用品，而係一處我未能觸及嘅地方。
 
「我地返出去喇。」
 
「嗯、嗯。」我趕快跟上。