【全劇終】《我喺街執咗個失憶嘅女仔返屋企》: 休比篇：櫻花樹下的浴衣女（上）

呢個地方係野餐聖地，加上今日放假，嚟到嘅時候已經好多人。
 
好不容易搵咗個角落，舖上野餐墊，專心享受難得嘅二人世界。
 
我將休比放喺手心，同佢你一啖我一啖（我食我嘅三文治，佢食佢嘅牧草波波），可能呼吸到新鮮空氣，心情都靚啲，直到而家休比都冇出現抗拒我嘅反應。
 
一切都好美好。
 
只係，可能畫面太過温馨，惹來不少細路嘅目光。
 




「媽…呢個人好慘呀，竟然一個人嚟野餐。」
 
「唔好理人啦，行快啲。」
 
我用兇惡眼神回敬多口嘅細路，成功令佢乖乖合埋口。
 
但假日嘅遊人駱驛不絕，好快又有第二個細路經過。
 
「媽咪你睇，真係有人一個人嚟野餐架！」
 




我將食到一半嘅三文治掉低，捧起休比俾個細路睇：「我有囡陪架！睇唔睇到呀？」
 
為咗俾啲下馬威個細路睇，唯有犧牲休比，叫佢扮住女先。（不厭其煩講多次，雖然我唔知佢係囝定囡...）
 
個細路哇一聲喊出嚟，好快走遠咗。
 
與此同時，休比亦喺我手中掙脫，仲大大力噬咗我一嘢。
 
「阿！！！」我顧不及手指嘅痛楚，因為休比跳咗落地之後，用超越超音鼠嘅速度跑走咗。
 




「…喂！返嚟阿死仔！」我立刻追住佢。
 
佢一路避開嚟野餐嘅遊人，一路極速奔跑；我就一路同啲人講唔好意思，一路跟喺佢尾。
 
「頭先危急關頭先叫你扮住女先，有冇咁小氣阿…」
 
就喺我斷氣前一秒，休比終於停咗喺一個人隔離。
 
 
「…櫻花飄落嘅速度係每秒五厘米。」
 
 
我稍息一會，然後抬頭，終於望清眼前嘅景象：
 
樹下企住一個留住及腰長髮，高我半個頭，望落似係大學畢業嘅女生。




 
但最吸引嘅我係佢一身紫色打扮，佢居然著住日本人去祭典嘅浴衣。
 
「我與你嘅距離，每秒鐘又會拉開幾多米？」
 
「…吓？」
 
佢望向腳邊，然後將休比一手抱起。
 
休比居然冇反抗。（我深信佢係一個有異性冇人性嘅男性）
 
「好可愛嘅龍貓，係你養嘅？」個女仔講。
 
「嗯…正確嚟講，係我屋企養嘅。」
 




個女仔以熟練嘅手勢輕撫休比嘅身體，休比則係一副爽到飛天嘅表情。
 
「er... 請問你可以俾返我未？」我伸手。
 
個女仔微笑：「冇問題。」然後將休比交到我手上。
 
「…唔該。」
 
點知一秒都未有，休比又即刻跳返去個女仔隻手。
 
「喂！你隻死仔！」
 
個女仔再度將休比交返俾我，但休比又即刻跳返過去。
 
就係咁重覆咗好幾次之後，我決定出絕招：「你等我一陣，我去拎佢個籠過嚟。」




 
九秒九跑去拎返個籠，今次我chok埋聲氹休比入去：「入面有你最鍾意嘅牧草波波呀，返嚟啦。」
 
察覺到個籠之後，休比一下子跑到個女仔嘅膊頭上。
 
「睇嚟佢唔鍾意俾個籠困住。」個女仔講。
 
「唔係啦，佢平時好乖架。」擾攘咗一輪，我嘅忍耐力亦即將到極限，於是轉用有史以來最惡嘅語氣向休比咆哮：「返過嚟阿！」
 
大概係受軟唔受硬，休比向後一縮，表現得更抗拒。
 
「對待寵物唔可以咁惡…佢叫咩名？」個女仔摸一下休比。
 
「…休比。」我答。
 




「休比，你返去你主人度好冇？」
 
「嘰嘰嘰嘰！」休比狂叫一輪，就算唔識聽龍貓話嘅我都明白佢想講咩：
 
就係，我唔想返去個 on9度阿！！！
 
個女仔尷尬一笑：「睇嚟都係冇用。」
 
「…咁而家點呀？」我近乎喊出嚟。
 
「冇辦法喇，睇嚟休比要暫時寄放喺我度——直到我諗到辦法令佢冇咁痴我嗰時。」

個女仔一臉輕鬆，講出以上呢番說話。