【全劇終】《我喺街執咗個失憶嘅女仔返屋企》: 休比篇：櫻花樹下的浴衣女（下）

面對呢個荒唐嘅提議，我一口拒絕：「等陣！等我叫佢主人嚟親自接返佢。」
 
休比唔痴我啫，我叫小悠過嚟得喇掛？
 
於是我馬上sd訊息俾小悠：快啲過嚟救休比，唔係佢會好大鑊。
 
大概係以為我玩嘢，所以佢俾個咁嘅reply我：我而家同芝芝排緊限量版布甸，如果排唔到嘅話我仲大鑊呀！所以阿帆你唔好煩我喇，bye！
 
我之後梗係有解釋休比而家處於咩狀況，但小悠似乎選擇咗不讀不回。
 




…我為休比有一個咁不負責任嘅主人默哀3秒鐘。
 
其實仲可以搵阿妹求救，不過佢而家補緊習，上堂唔玩電話嘅佢收到我嘅求救訊息嘅機會十分渺茫。
 
而且，眼前呢個女仔嘅表情逐漸變得不耐煩：
 
「點呀？你班到馬未？我趕時間。」
 
面對呢個孤軍作戰嘅局面，為咗休比，我放棄最後嘅尊嚴：
 




「我求吓你，你俾返隻鼠我啦…」
 
「而家又唔係我搶你隻鼠，你自己問吓休比嘞？」
 
我抱緊最後一絲希望，望向休比：「…休比？」
 
依然瑟縮喺眼前女仔嘅膊頭上，睬都唔睬我。
 
「咁樣啦，你俾個電話我，到休比想返去你度嘅時候，我就叫你過嚟接返佢。」
 




「…如果佢一直瀨死唔走呢？」
 
個女仔搖搖頭，好肯定咁講：「唔會，你俾三日時間我，三日之後我一定會叫你嚟接返佢。」
 
我半信半疑：「你肯定？」
 
「肯定。」佢嘅瞳孔散發住一股令人信服嘅魅力。
 
喺我講啲咩之前，佢一手搶咗我部電話，之後佢將自己嗰部響緊嘅電話拎俾我睇：「啱啱我用你電話打俾自己，咁樣我地就交換咗號碼啦，呢段期間我會定期update休比嘅情況俾你知。」
 
此時，一架貨van停泊喺植物公園外面，個女仔見到之後揮手：「好啦，我真係趕時間，三日後見。」
 
「嗯，三日後見…」
 
……就奇！！！！！




 
而家休比喺我眼前跟個陌生人走咗！！！！！
 
「…等陣呀！！！」我向貨van方向大叫，但個女仔已經帶埋休比上車，跟手開車走埋。
 
淨低我一個人拎住個空空如也嘅籠企喺原地。
 
我用咗五分鐘時間去消化剛才嘅狀況，然後得出某種可能性。
 
唔通，係新式騙案手法…？目的旨在拐帶未成年寵物參與不法行為…如果係咁，休比今次真係GG了…
 
思考緊有咩對策嘅時候，收到頭先個女仔（騙子）send嚟嘅訊息。
 
佢俾咗一個地址我，叫我三日之後去搵佢。
 




我望吓個地址，係一間臨海而建嘅五星級酒店。