【全劇終】《我喺街執咗個失憶嘅女仔返屋企》: 休比篇：奪回芳心大作戰

趁冇嘢做，我又試咗幾次叫休比個名，考慮到休比嘅耳仔接收嘅音頻可能同人類唔同，所以我高中低音都試勻晒。
 
可惜，都係冇反應。
 
「正死仔！阿妹叫你又應！有異性冇人性！」話雖如此，但其實我連休比係囝係囡都唔知...
 
「入去反省吓啦你。」 我將休比放返入籠，然後去準備我嘅午餐。
 
點知入廚房冇耐，已經聽到籠入面嘅休比發出低鳴：「嘰嘰嘰…」
 




我返出去睇吓佢，佢一臉可憐咁望住我。
 
「想出嚟？你要識做啦？」我對住個籠講。
 
我再叫一次休比嘅名字，同時打開個籠。
 
我期待嘅畫面係佢應我嘅呼喚，直衝我膊頭，我地嘅關係又返返以前咁美好；
 
但現實係佢一衝出嚟，就噬我一嘢。
 




「啊！！」我按住手指痛處，發出慘叫聲。
 
「我放棄你，以後唔會再買零食俾你食。」激到我嬲嬲地，我決定嚇吓佢，「我而家落街散步，你留喺度自生自滅啦。」
 
休比突然雙眼一閃。
 
「做咩呀？想跟我散步？係喎唔記得你好耐冇出過街添，陰功。」小悠平時都冇乜點帶休比出街咁滯，聽佢講理由係休比唔鍾意俾個籠困住。
 
但呢一刻嘅休比似係同我講，佢寧願我用個籠困住佢，都想我帶佢落街散吓步。
 




「算啦，你主人都話你唔鐘意個籠...你都係留喺屋企啦。」
 
準備出門口嗰陣，休比不停亂叫：「嘰嘰嘰嘰…！」
 
「我講得唔啱咩？」我回頭。
 
「嘰嘰嘰嘰…！」
 
「你真係咁想我帶埋你去？」
 
唔知係巧合定係點樣，休比居然做出點頭動作，然後瞓低碌地沙。
 
佢呢個樣，實在係...
 
太！可！愛！




 
「好，等我幫小悠盡吓主人責任，帶你去野餐餐！」我春心蕩漾，將休比抱喺掌心，佢今次終於冇抗拒。
 
於是，我求其執咗啲三文治，同埋休比最鍾意嘅零食落背囊。將休比放入籠之後，我地一人一鼠就展開今日嘅野餐之旅。
 
考慮到唔想出太遠，所以我將目的地鎖定喺距離屋企冇幾遠嘅植物公園。
 
就等我趁呢次機會，重新奪得休比嘅芳心…！