【全劇終】《我喺街執咗個失憶嘅女仔返屋企》: 總集篇：2400萬個瞬間（中）
未行到車站，已經見到舖頭出面排晒長龍。
估唔到真係咁受歡迎…
不過唔緊要，我有一張（借返嚟嘅）VIP卡！
我喺銀包拎出黑色VIP卡，再遞俾喺門口維持秩序嘅店員。
「唔好意思呀，就算有VIP卡都要排隊呀…」
「吓？！咁張卡有咩用途？」
「VIP卡喺買我地產品嗰陣可以全單85折。」
我望吓條龍，起碼有成百個人，於是偷偷問店員：「你睇在我有VIP卡，靜靜雞俾我打尖得唔得？」
店員笑笑口：「唔好意思呀，想買我地嘅特別造型雪糕蛋糕就一定要排隊，VIP 都冇情講。」
…算。
我死死氣行到隊尾。
最令我激氣嘅唔係排隊，而係有人明明同我講，有VIP卡就可以打尖。
呢個時候，梗係要幫自己拎返個公道。
「喂，又話有VIP唔使排隊！」我快速打字，然後撳發送。
「我應該記錯咗第二間: P」居然秒回…
螢幕上方依然顯示輸入中，幾秒之後我收到一張相：罪魁禍手正一面滋味食緊呢間舖頭嘅泡芙。
「點解你會有？！」
「尋日買: P」
我嘆一口氣，計埋呢張，我電話入面應該有上百張呢個女仔不定期send過嚟嘅自拍。
千惠。
我同佢嘅瓜葛，一切源自於聯校宿營入面嗰支借出嘅塗改液——
準備走人嗰陣，隔離個女仔拋返支塗改液俾我：「喂，還返俾你。」
我一手接住，臨走前不忘提醒：「好彩頭先唔係正式考試，下次記住帶多支士啤。」
「等陣，點解我未見過你？」
我停低腳步：「如果你指喺學生會入面嘅話——因為我只係臨時嚟湊數，你未見過我好正常。」
佢笑咗幾聲：「嚟得呢度即係你學校睇好你組下屆學生會，你咁都唔知？」
「我地學生會興玩無限連任，所以我應該同組學生會呢樣嘢冇緣。」見個女仔冇出聲，我趁機會閃人：「唔講喇，走先。」
「嘻，我地好快會再見面。」
結果如佢所講，我地真係好快再見面，而再見面嗰陣，佢居然向我殺出一吓超直球——
「咁咩原因你要起我底？仲有我係A0呀，咁又點呀？」阿妹又係嘅，連我A0都要同人講…
佢食完碟上嘅沙律，抹咗吓嘴，然後對我笑一笑：「因為我鍾意你囉。」
自此之後，更會毫無預警地對我進行各種偷襲…
「…Sor！係咪整親你傷口？我冇心架…」我即刻上前道歉。講都未講完佢突然哄埋嚟，喺我嘴角旁邊錫咗一吓。
……
諗諗吓嗰陣，突然有人喺後面攬住我。
我嚇到即刻轉身。
「…千惠？」佢隻眼似乎好返，已經拆咗紗布。
……
「我愈嚟愈鍾意你。」
我feel到耳仔發熱。
之後佢冇好似我想像中咁拉開返距離，反而愈哄愈埋。
唔知點解我好似中咗定身術咁郁唔到。
直到我地距離得返幾厘米都唔知有冇之後，佢撳咗我落床舖…
雖然嗰次搞到氣氛有啲尷尬，但唔知係咪我錯覺，呢件事之後，我地之間嘅相處好似變得比以前更自然，更輕鬆。
而隨住時間過去，我所知道關於千惠嘅事都愈嚟愈多，佢除咗係學生會會長、笑點莫名其妙地低、識空手道、鍾意惡作劇…之外，我同佢之間嘅共同話題比我想像嘅要多（？）——
我窒咗一窒，最令我估唔到嘅係佢竟然有睇咒術迴戰：「咩呀我講錯渣嘛！我係想講五条悟！」
「喂，你有冇睇劇場版呀？」
「梗係有啦！前、前傳嗰套吖嘛！話乙骨俾隻咒靈跟住吖嘛！」實際上我睇都未睇過，淨係聽過吓。
佢居然搖頭嘆氣：「里香同乙骨係青梅竹馬，因為細個嗰陣乙骨…」
……
「你搵日嚟我阿爺屋企吖，我教你。」佢好有興致咁講，雖然唔知係認真定鳩噏。
不過，今次係第一次聽佢講有關屋企嘅嘢，我居然有種…應該話同病相憐嘅感覺？
「其實，我阿爸阿媽都長期外國做嘢，好日都唔返嚟一次…」
……
不過唔計呢一堆，或者我心底裏對千惠存在一份感謝，理由係我知道佢真心當阿妹係朋友。
阿妹由細到大為數不多嘅朋友。
本來性格就好內向嘅阿妹，喺嗰件事之後足足有幾個月冇踏出過屋企門口——
「唔好再打啦。」阿妹喺側邊勸我，但火遮眼嘅我根本聽唔入耳。
就喺我同眼前條八婆糾纏嗰陣，眼尾掃到某條嘍囉突然撲去阿妹嘅方向，我想撳住佢但已經太遲。
同一時間，我聽到一聲慘叫。
我即刻拎轉面，只係見到阿妹左臉上有一條血痕，而嘍囉手上就拎住染血界刀。
醫生話阿妹臉上嘅傷口冇咩大礙，但好番之後會有條疤痕。
嗰幾個月裏面，為咗照顧阿妹，我幾乎寸步不離，學都冇返過，最後，我同阿爸阿媽用咗唔少心機先將阿妹喺房入面拉返出嚟。
不過一次巧合，我至發現原來阿妹對嗰陣我陪佢一齊做隱青呢件事耿耿於懷，因為缺席考試令我最終揀唔到想揀嘅科。
為咗令佢覺得嗰段陪住佢嘅日子唔係白過，我決定送一份遲咗兩年嘅禮物俾佢——
我將成疊卷交佢手：「你睇完就明架喇！」
我兩個禮拜以嚟嘅心血結晶。
阿妹望咗一陣啲卷：「…咩意思？」
「喺解釋之前，有樣野我要同你道歉，我之前幫你整電腦嗰陣開咗你寫嘅日記嚟睇。」
阿妹一臉驚訝。
「我想你明白，就算嗰年我真係入唔到精英班，讀唔到想讀嘅科，但我從來都冇後悔過。」
因為我同阿妹雖然冇血緣關係，但由六歲嗰陣阿爸阿媽收養佢開始，佢就係我唯一嘅阿妹。
或者嗰份遲咗兩年嘅心意終於傳遞到，統測之後，我同阿妹相處嘅氛圍好似有啲向好嘅改變——
我笑，唔單止因為聽到阿妹嘅答案，仲係因為可以咁樣同阿妹傾心事，自從中三之後都冇乜幾次。
「唔記得同你講，你煮嘅嘢食好香，以後多啲煮俾我食得唔得？」
阿妹好似呆咗兩秒，然後將手上嘅餐具塞晒落我手：「今晚係例外架咋！邊個話可以成日煮俾你食…！」
「…讚你啲嘢好食都唔得？」果然，阿妹嘅心情真係好難觸摸。
至少到而家，我都未完全觸摸到。
最後，我排咗半粒鐘隊，總算買到我要買嘅嘢。