【全劇終】《我喺街執咗個失憶嘅女仔返屋企》: 總集篇：2400萬個瞬間（上）
學生會選舉塵埃落定之後，行人道兩旁嘅樹木開始凋零，提醒我地季節嘅交替。
「師父！我今日要去奧數，唔畫畫喇。」放學時分，唐夕嵐走嚟班房同我講。
自從同唐夕嵐展開咗「師徒」關係，我地久唔久就會匿埋喺美術室入面磨練畫功，又或者係討論漫畫。
本來抱住交流吓嘅心態應承做佢掛名師父，但佢好死唔死，自此之後真係師父師父咁叫我，搞到我都潛移默化埋，當咗佢係徒弟。
不過我呢個師父自己都技不如人，冇咩教到佢就係啦。
「…叫咗你幾多次唔好再叫我師父。」
「我就係要叫，師父師父師父師父…！」佢對我扮鬼臉。
望住佢嘅表情，總係令我諗返起同初初識佢嗰陣有幾大分別——
營業式笑容。
「我係2A班唐夕嵐，興趣係鑽研新知識，認為學習係每個學生嘅本份，喺呢六年入面希望運用自己小小嘅力量為學校帶嚟一分良好嘅改變，多謝。」
聽完佢自我介紹之後，我只有一個想法——
好假的初中生。
我開頭諗學生會可能就係需要啲咁作狀嘅初中生加入，但過咗一排先發現，原來隱藏喺唐夕嵐嗰副營業式笑容底下嘅係…
「我話，我最憎就係呢種大人口吻…」
下一秒，佢突然發出破耳尖叫聲：「第一！我唔係10後！我08年出世架！」
我稍微塞住耳仔，估唔到佢人仔細細爆起seed上嚟咁刺耳。
唔止呢次，仲有嗰次——
「…我最憎就係學語言！咩文都憎！最好呢個世界所有語言徹底消失！」
「仲有校長室入面嗰兩條友我都憎！淨係識得叫我幫學校參加比賽！」
佢推開校長室道門，用一個前所未有嘅聲量對裏面嘅人大嗌：
「收皮收皮收皮！所有大人全部同我收皮！！！」
唔知係咪呢次事件之後，唐夕嵐就發生咗少少改變：由一個雖然叫夕嵐，但一啲都唔直嘅佢，變成慢慢識得有話直說嘅佢。
只不過，如果呢種有話直說唔係用嚟同我唱反調嘅話，應該會更加好…
我孭起書包，就算唐夕嵐有冇奧數都好，我今日都會休息一天，唔去美術室練畫。
因為今日有第二樣嘢做。
如果唔係早幾日咁啱打開月曆嚟睇，都醒唔起。
走到學校大堂，居然見到許正峰同駱以雪喺度派傳單。
「有咩活動要勞煩我地副會長親自出馬宣傳呀？」我接過一張。
上面寫住：有時間的話多多擁抱身邊的人吧！ 不管是校長、同學、老師，還是工友！
「今日係學生會舉行嘅擁抱日，不過同你講都冇用，我相信冇人會想同你擁抱。」駱以雪擰咩臉講。
學生會副會長，駱以雪。
飄逸嘅馬尾，高挑嘅身型，加上張廷宇同許正峰夢寐以求嘅一副身材，呢啲條件足以令佢成為學校女神（聽聞）。
不過幾乎完美嘅外表下，係一個崇尚暴力嘅靈魂，呢一點我由以前已經領教不少——
呢個時候，突然一個排球飛過嚟打中我背脊，然後有把女聲講：「校規第205條：學生不得請任何人開括號包括老師、同學及一切人士閂括號代勞校方所施行之任何形式處罰。」
……
「…見你咁認真，同你玩吓放鬆吓啫…哈哈…喂！！！」
笑都未笑完，駱以雪捉住我戴錶嗰隻手用力咬落嚟。
……
「你放心，我對暴力女冇興趣…嘩呀！」俾駱以雪一拳中埋去嘅唔係我，而係我後面棵樹，不過依然成功嚇到我拿拿聲起步。
……
「哈哈，坐坐吓旅遊巴都有雪條食，隔離學校真係幸福…吖！！！」我求其蒙混過去，下場係俾駱以雪一腳伸返去原先個位。
……
「啪！」一吓清脆嘅響聲，然後係左邊臉嘅劇烈灼熱感。駱以雪唔知幾時喺更衣室出咗嚟，送咗一吓兜巴昇俾我。
……
仲有太多，不能盡錄...
不過撇除呢一點，駱以雪喺老師眼中絕對係個認真又有責任感嘅好學生，連我都睇得出。
「喂，你捨得走未？難得阿雪俾我陪佢一齊派傳單，你唔好阻住我地二人世界啦，今日學生會擁抱日，話唔定派完傳單阿雪俾我擁抱佢呀…」
喺我耳仔邊細細聲講出上面番說話嘅係前學生會副會長——許正峰。
佢俾學校踢出學生會嘅原因，係因為聯校宿營嗰陣掟石仔傷人。
開頭我都唔認為佢係一個惹得過嘅人，直到——
「頭先阿雪話你幫咗佢，咁我幫返你都好正常吖。」許正峰拍拍我膊頭。
「其實體育館嗰次，我都有唔啱嘅。」我猶疑咗一陣，然後講。
「咁梗係啦！你點止唔啱，仲係好撚錯…不過算啦，由而家起我當你係fd。」
後尾佢同我講，點解聯校宿營嗰陣會掟石仔，原來係想保護駱以雪，由嗰時開始我就知道佢瘋狂迷戀駱以雪（嘅胸部）——
「你要問咩我解答你，你唔好搞阿雪。」我差啲俾佢呢句型親。
……
「諗諗吓都係唔可以算，你知唔知約到阿雪打排球係一件幾咁難得嘅事？結果我連佢對波…佢啲球技都未欣賞夠，佢就俾你激走咗…你知唔知我日思夜想咗幾耐？我講緊我對阿雪嗰對…嗰啲出色球技…」許正峰突然一面悔恨，眼角好似仲有兩滴眼淚。
……
「…最多請返你飲珍奶囉，順便可以請埋阿雪飲，咁我就可以睇阿雪表演放手飲珍奶…」
除咗駱以雪之外，許正峰仲有另一樣嗜好——
「關於呢一點我都考慮咗好耐，應該叫學長學妹計劃定係叫學姊學弟計劃好，最後按我地高form男仔多啲呢個理據，就揀咗學長學妹計劃呢個名。」
……
「咪話我唔提你，雖然你決定hea選，但話晒都係個學長，記得對學妹好啲呀！學妹係無辜架！」
……
「喂，叫你領個學妹都領咁耐架？行快兩步啦，全世界等你呀！」然後語氣180度反轉，再同唐夕嵐講，「至於學妹你，可以慢慢行！唔急！」
……
咳，雖然我對駱以雪同學妹都冇咩興趣，但同許正峰做朋友的確係件幾快樂嘅事。
「咁你加油，希望你擁抱到駱以雪。」我喺返許正峰耳邊講，然後踏出校門。
目的地係，車站旁邊嘅人氣甜品店。