【全劇終】《我喺街執咗個失憶嘅女仔返屋企》: 總集篇：2400萬個瞬間（下）
回家路上。
雖然頭先加咗廿蚊要冰袋，但呢度行返屋企需要啲時間，所以我加快腳步。
萬一裏面嘅嘢溶到不似人形，到時真係嘥錢，兼嘥埋時間排隊。
點知行唔夠兩步，兩隻小學雞兜口兜面撞埋嚟。
我破口大鬧：「喂！睇路啦！我手上袋嘢好撚貴架！」
可能我太有霸氣嘅關係，嚇到隻女小學雞喊咗。
「嗚…嗚…」
我慌張起嚟：「喂、我…對唔住！我唔應該講粗口…」
另一隻男小學雞出聲：「哼，有咩咁巴閉。」
佢托一下眼鏡，一種強烈既視感出現。
「小綾，我地走。」講完佢拖起仲抹緊眼淚嘅女小學雞，轉身走咗。
羅凱撒，我地學校嘅學生會會長。
特徵係面上嘅金絲眼鏡，同埋嗰股深藏骨子裏嘅中二——
臨走之前，佢喺我身後講咗一句：「惡意嘅連鎖總係喺形成之後，愚蠢嘅人類至會後知後覺……」
……
正當我心諗做乜鳩嘅時候，佢講：「睇嚟，我要解放我真正嘅力量。」
……
不過，最令我在意嘅唔係呢樣。
而係佢嗰份對於小悠嘅執著，而且，仲好似知道好多我唔知嘅嘢…（？）
我認得出係小悠喺度講嘢：「今晚可以同你傾計，真係好開心。」
第二把聲回應：「哼，我都係。」
雖然熄咗燈，但呢種咁中二嘅講嘢方式，除咗羅凱撒之外唔會有第二個。
……
「你同以前一樣，一啲都冇變過。」喺失平衡之前，耳邊聽到嘅係羅凱撒呢句說話。
……
之後，我喺阿爸阿媽度得到一封寫俾羅凱撒嘅匿名信，直到而家我都唔記得封嘢係咪真係我寫嘅。
仲未提信上嘅內容九唔搭八。
有時候，我會好想衝去打羅凱撒，叫佢唔好再賣關子，究竟我同佢以前係咪見過面。
不過，唔使諗都知佢唔會咁順攤，唔止咁，佢仲會講多幾句九唔搭七嘅嘢耍鳩我，令到件事更複雜。
我確認手上嘅嘢仲係完整無缺之後，繼續行。
然後，嚟到一個地方。
所有事情，都係由呢度開始——
街口垃圾房。
「我叫小悠，你呢？」
「我冇心傷害你架，我只係……唔知自己點解會喺垃圾房，到我一醒返就見到你。」
開學前嘅一個晚上，我喺街口垃圾房同小悠相遇，自此人生開始被老套地導向輕小說發展模式。
一開始，我甚至唔確定小悠究竟係乜嘢生物嚟，原因在於失驚無神就會發生嘅閃靈現象——
「……我有聽話架！頭先我食食吓嘢，突然間覺得全身冇力，一醒返就見到你…」
「又係咁？」
不過唔知基於咩原因，隨住時間過去，閃靈現象慢慢冇再喺小悠身上發生，我發現冇咗閃靈現象嘅佢，其實都只不過係普通女仔（？）
或者，應該話係一個淨係掛住食、唔識讀空氣，身體意外地靈活，但心智年齡就成反比嘅天生蠢才。
不過，有時佢會無啦啦講啲奇奇怪怪嘅嘢，嗰個時候嘅佢，身上彷彿散發一種截然不同嘅氛圍…
「總之，我應承咗會幫你搵返你嘅記憶就一定會做，即使你認為自己嘅過去一啲都唔重要都好。」
「或者你講得啱，因為對而家嘅我嚟講，同阿帆過嘅每一日先係最重要。」
……
唔知係咪我錯覺，喺月色籠罩嘅氛圍下，小悠嘅表情蓋上一層朦朧：
「…終有一日，阿帆你會知道。」
仲有，一直佔據喺我腦海裏嘅嗰次事件——
我跟隨小悠嘅視線望向窗外嘅景色，夕陽就喺我地眼前散發住橘色光輝，略帶金黃色嘅天空就好似一張畫布咁襯托在後，係一片市區絕對唔會見到嘅美景。
「…好靚。」我忍唔住讚歎。
「嗯。」
之後，小悠緩緩轉過身，問咗一個意味不明嘅問題：「阿帆，你覺得我地嘅相遇…係咪一種偶然？」
「吓？你噏乜呀？」
「雖然我地識咗唔係好耐，但如果有一日你再見唔到我，你會唔會唔記得我架？」
佢問啲嘢愈嚟愈奇怪，我load咗陣至答：
「見唔到你？你指你記得返晒嘢之後？」
「嗯。」
唔知點解，我個心突然一沉：「咁話晒我都叫喺你落難嘅時候幫過你，得閒出嚟食餐飯都得啩？唔會見唔到嘅。」
小悠沉默咗一陣，臉上掛起笑容：「又係喎可？」
「雖然咁講好老套，但我相信每一段相遇都有佢嘅意義喺度，我會努力記住每一個人生中嘅過客。」
「哈哈，估唔到你會講呢啲野～」
「而你，我知道一定唔會係一個過客，至少喺我以後嘅人生入面，我都想見到你。」
講完之後，我先發覺頭先句嘢會唔會太似表白……
但我隨即鬆一口氣，畢竟眼前嘅係小悠，佢應該唔會get到嗰種意思。
「阿帆…」小悠好細聲叫咗我個名，然後踏前兩步，好似想講啲咩。
下一秒，就發生一件我意想不到嘅事。
「…小心！」
小悠俾塊爛鬼地板kick親，成個人失去平衡將我壓倒床上。
我地喺極近距離之下對望，同一時間，唇上傳嚟一片柔軟到好似棉花糖般嘅觸感。
除咗嘴裏嘅士多啤梨味之外，鼻腔仲充斥住一陣BB油嘅香味——我意識到係小悠身上嘅味道。
空氣好似凝結咗咁，我分唔清究竟過咗五秒、十秒，抑或係更長嘅時間，小悠就突然起身，一句說話都冇講就跑咗出房。
「喂…」我想叫住佢，但叫唔切。
關於呢次意外嘅嘢，小悠一次都冇提起過，我甚至懷疑會唔會只係我單方面嘅錯覺，其實嗰次我地根本冇掂到…但好快又會否認，因為嗰種觸感的而且確係實實在在。
我轉動鎖匙，打開屋企大門。
小悠喺梳化彈起身：「阿帆！你返嚟喇？」
我趕快將頭先嘅胡思亂想壓回腦海深處。
阿妹未返，屋企似乎得小悠一個。
「嗯，估吓我買咗咩返嚟？」幾經辛苦先買到兼平安運到返嚟嘅嘢。（雖然我自己都想食）
「係咩呀係咩呀？」
我將限量發售嘅龍貓型雪糕蛋糕從冰袋取出：「登登！」
小悠見到，果然雙眼發光：「係休比呀！！！」
「排咗半粒鐘先買到架！咁樣就可以滿足你想生吞休比嘅欲望…」
「明明想食咗休比嗰個係你…！！」
「殊！一陣俾休比聽到嘅話，離家出走都似！」
小悠笑，然後問：「點解你無啦啦買蛋糕嘅？」
我心頭一虛：「因、因為想食囉。」
「你講大話，你平時都唔鍾意食雪糕嘅，點會特登去排隊買返嚟。」小悠一邊食一邊講。
「食你就食啦！咁多嗲！」
講完兩秒，又後悔自己好似太惡…
我一啖將雪糕啪入口：「…我講完之後，你唔可以笑我。」
「嗯？」
「100日之前…我幫垃圾房阿姨清理咗件大型垃圾。」我快快口講完。
如我所料，佢一臉懵然：「吓？」
乜我講得唔夠白咩，同我快啲get阿…
「我話！今日係我喺垃圾房執你返嚟嘅第100日！為咗紀念我做咗好事，幫垃圾房阿姨清理咗你呢件大型垃圾…所以我買個蛋糕返嚟慶祝，得唔得呀？」
至於點解我會記得今日係同小悠相遇嘅第100日，理由係啱啱識佢嗰陣為咗幫佢搵記憶，我記低咗我喺邊一日發現佢，覺得遲啲可能會有用，所以…
所以，我唔係特登記住！
「你唔係唔知處理大型垃圾幾煩架啦！所以垃圾房啲阿姨應該好感激我…從此我人生嘅功德…」
講都未講完，身體突然被一股帶住滿滿bb油氣味嘅體溫包圍。
小悠將頭埋喺我胸口，輕輕吐出三個字：「多謝你。」
「…你代表緊垃圾房阿姨呀？」我開玩笑。
佢喺我懷裏搖頭：「多謝你記得我地相遇嘅日子…」
一股不知所措嘅感覺突然湧上胸口，我抓住逐漸發熱嘅臉龐：「…唔、唔使客氣？」
小悠冇再講啲咩，只係繼續擁緊我。
話說，好似咁大個仔都未試過咁樣俾人攬到實一實…
正煩惱雙手應該放邊嘅我，忽然喺褲袋摸到一張對摺嘅傳單。
我醒起，係頭先駱以雪塞俾我嘅單張。
今日係學生會擁抱日。
…既然係擁抱日嘅話，應該冇咩所謂…？
準備將雙手放到小悠身上嘅同時，屋企大門同時打開。
「我返嚟喇。」阿妹一臉悠閒咁講。
小悠九秒九喺我身上彈起身，我都九秒九放低凌空嘅雙手，繼續若無其事地食眼前嘅雪糕蛋糕。
「一返嚟就見到你地食雪糕，睇見都凍…」
面對阿妹嘅吐槽，小悠只係喺度傻笑。
望住佢嘅表情，回想起剛才嘅擁抱。
心跳居然不期然地加速。
為咗分散注意力，我將視線投向窗邊。
十二月頭，街道開始落葉紛飛。
提醒我，初冬已經不知不覺來臨。