【全劇終】《我喺街執咗個失憶嘅女仔返屋企》: 學生會補選篇：禮物
當你做咗一件柒事之後，成個世界都會記住你——
最近我深深理解到呢個道理。
理由係過咗幾日，secret都係間唔中就有新post，講我嗰日台上演講單嘢。
我連日嚟匿喺美術室，除咗真係有嘢做之外，仲係為咗避免喺放學嘅高峰時間出現喺人流眼前。
而且，冇人嘅美術室真係好正。
我喺畫紙上揮筆，完成最後嘅潤飾。
用咗幾日時間，終於搞掂…
將完成品照喺光管下，睇吓仲有冇可以修正嘅地方。
…應該不至於認唔出係咩嘅，我諗。
確認好冇嘢修改之後，我小心翼翼將幅畫捲起，然後帶走。
要將幅畫送出去，一定要喺個冇人見到嘅地方，至少…唔想俾學校嘅人見到。
我喺美術室留到差唔多6點，其他人應該走晒喇啩。
而目標人物今日都有學會活動，我同佢事前確認過，佢都係呢個時間放。所以，我約咗佢喺學校門口等。
完美。
剩低嘅，就係等佢本人出現。
說時遲那時快——
「阿帆！」目標人物清理完手上嘅最後一塊朱古力餅，向我揮手。
「又去人地個甜品學會又食又拎…」
「係芝芝整多咗，話送俾我食架！」
「行啦，失敗者。」
「都過咗咁耐啦仲笑！仲有，明明呢個稱呼係我同張廷宇拎嚟笑你架！」
我同小悠踏上回家嘅道路。
「咁事實你都有選唔到學生會，咁你話你係咪失敗者吖？」
「…至少我已經向全校表達過我對炸豬扒丼嘅熱誠！」
「嘖，真係唔明點解你個政綱咁on9都冇人寫你上secret，我呢啲講得咁好嘅反而俾人寫上去！」
「實係因為你冇將炸豬扒丼寫落你份政綱度，所以先會上secret…！」
我同小悠重覆住一如以往嘅廢話連篇。
不過，今日我傾向係咪都搵啲嘢恥笑吓佢，如果唔係…好似掩蓋唔到內心嗰份莫名其妙嘅緊張感。
或者，應該話係羞恥感。
到傾到差唔多嘅時候，我中斷咗對話：「喂。」
「嗯？」
「…都係冇嘢喇。」
「唔信！通常咁樣講，即係一定有啲嘢！」小悠總係喺唔適當嘅時機發揮超越平時嘅智商。
既然都畫好，冇理由又唔送架…？
我一邊抓耳側頭髮：「…我之前咪畫咗幅和泉紗霧俾唐夕嵐嘅？」
「嗯，我記得呀。」
「嗰次之後，我開始練返畫畫…」
小悠聽到之後，笑得好開心：「咁咪好囉。」
「然後呢，冇理由畫嚟畫去都係和泉紗霧架嘛，你又唔鍾意和泉紗霧，我又唔知你鍾意乜嘢…所以、所以…」
佢笑咗兩聲：「哈哈，阿帆你今日講嘢咁口窒窒嘅。」
「咪就係因為你嗰日叫我畫幅畫俾你！我又唔知畫咩！所、所以！」我將小心翼翼捲好嘅畫放到佢手中，「算喇，你自己睇。」
果然，親手將幅畫交俾佢真係羞恥到我不能想像。
尤其我知道佢一定會即刻打開嚟睇。
所以，將幅畫塞俾佢之後，我唔理三七廿一，快步向前行。
不過，行咗幾十米，都唔見小悠跟上嚟。
我停低腳步，慢慢回頭。
小悠企咗喺原地，眼定定望住我啱啱俾佢嗰幅畫。
「…居然一啲反應都冇？」
我行返轉頭，先發現小悠原來唔係冇反應——
喺佢臉上滑落嘅，係一顆豆大嘅淚水。
……！？
「…喂喂！我知我係無聊咗啲，你唔使喊出嚟吓嘩？」
佢搖頭，然後笑：「…我只係覺得好開心。」
畫紙上畫嘅，係小悠。
正確嚟講，係我連日嚟憑腦海嘅印象所畫出——小悠嘅似顏繪。
我笑：「我知我畫技係高超咗啲，但你都唔使感動成咁嘅。」
「…多謝你，我一定會好好珍惜。」
本來期望佢收到之後會窒吓我，而家佢咁認真講多謝，搞到我有啲唔好意思。
「嗯，多謝…」
屌！做乜鳩佢同我講多謝我又同返佢講多謝阿…
佢笑，然後將幅畫攬到實一實。
睇嚟佢好鍾意幅畫，甚至超越我嘅想像，我冇預計過佢收到之後會開心成咁。
「…真係咁鐘意？」我問。
「嗯，鍾意！超級鍾意！」
我笑住抓頭髮。
「…以後都會咁鐘意。」佢低語。
「…以後？」
佢只係搖搖頭。
正當我地再度邁出腳步，我收到張廷宇嘅訊息：
一個星期又過去喇！點呀？會發生意想不到嘅好事第二名！有冇發生啲咩好事？
上個禮拜佢同我講我個星座今個禮拜係好運排行榜第二名，結果成個禮拜我唔係被迫選學生會就係燙傷，果然星座嘅嘢都係唔可信。
我用錄音回佢：「都話冇呀！衰嘢就大把！」
「個張廷宇無啦啦問我有冇好事發生…」然後我忽然諗起，「係喎，我記得你好似係第一名？」
「第一名？」小悠問。
「之前張廷宇講嗰個星座排行榜囉。」
「嗯。」
「你覺得準唔準？」雖然上次小悠講嗰個生日係流嘅…
「直到尋日為止覺得唔準，不過，今日開始覺得準，因為……」
呢個時候，一架飛機喺我地頭頂飛過。
我岳高頭望：「嘩，你睇吓架飛機飛得幾低。」
小悠跟住抬頭，表情忽然帶啲寂寥。
「你頭先講咩話？」
「嗯？冇呀？」
「冇咩？明明聽到你話因為…」
小悠嘅後半句說話，直到最後，我都係聽唔到。
不過…
如果再有機會嘅話，你可唔可以話俾我聽，嗰個時候你到底講咗啲咩…？