【全劇終】《我喺街執咗個失憶嘅女仔返屋企》: 學生會補選篇：回饋

「1、2、3，失敗者！！！」
 
張廷宇同小悠異口同聲大叫，同時將手上紙碎灑落我頭上。
 
「你兩個比心機笑啦，」我指住小悠，「仲有你！根本冇資格笑我！你自己咪又係失敗者！」
 
「…咩呀！」佢即刻口窒窒。
 
佢地兩個口中嘅失敗，當然係指學生會補選一事。
 




點票結果喺我地演講完當日下晝就有，夾埋之前學生會評分嗰part，結果唔難想像——
 
唐夕嵐成功當選學生會副會長，至於外務秘書就由杜朋也出任。
 
簡單啲講，即係高form完敗。
 
唔單止咁，我仲因為落選，搞到冇得同珀奈去街街！
 
多得唐夕嵐同杜朋也呢兩個萬惡10後，今年聖誕世界上將會繼續有一個飲恨嘅青頭仔（我）。
 




「你嗰日講到咁鬼煽情，我票都投埋俾你架喇，點知你都係咁唔爭氣…」張廷宇喺我一拳中埋去之前合埋咗口。
 
「就係因為煽情！作狀到我諗返起都想嘔！我警告你唔好再喺我面前提起呢單嘢…」我嚴正聲明。
 
如果有多啦A夢，我一定叫佢幫我洗走嗰日喺台上嘅黑歷史。
 
「唔係吖，阿帆你嗰日明明講得咁好。」
 
「收聲！都話唔準再提！」
 




「你仲介意緊secret啲post呀？」小悠講嘅，係我演講之後一個個喺secret 湧現嘅post。
 
內容係：乜4號嗰條候選人講嘢咁假、乜4號嗰條候選人講嘢咁撚on9宏宏。
 
或者小悠講得啱，係因為呢堆post，我先知道嗰日喺台上面講咗啲幾咁 on9、幾咁中二嘅嘢！
 
「嗚…」我發出悲鳴。
 
「不過，真係搵勻成間學校先知你喺美術室。」張廷宇四圍咁望，而我當然喺佢同小悠衝入嚟之前已經遮好咗枱面嘅嘢。
 
放學之後，我即刻衝嚟美術室去完成我未做完嘅事，呢幾日都係咁。
 
「阿帆你喺美術室做咩呀？」小悠又發揮佢好奇（八掛）精神。
 
唯有呢件事，現階段唔俾得佢知…否則羞恥程度將會超越嗰日喺台上演講。




 
「唔關你事！」
 
喺佢追問落去之前，我嘅救星出現。
 
「乜你喺度呀？」係新任學生會副會長唐夕嵐。
 
「…有嘢搵我？」
 
「會長叫我俾返之前學妹計劃個回饋你睇，等你地可以反思，」佢轉向小悠，「你都有。」
 
好似有啲咁嘅嘢。學妹計劃完咗之後，羅凱撒有叫我地做問卷。
 
不過，我唔知原來有乜鬼嘢回饋。
 




我接過唐夕嵐手上嗰張對摺咗嘅紙。
 
「就咁，我要返上七樓做埋啲交接工作，有機會再見。」俾完張紙我，佢就走咗。
 
「阿帆！朋也全部俾晒5分我呀！你呢？」小悠好開心俾咗佢張回饋我睇。
 
的確好似佢講嘅，全部5分。
 
「超，肥仔咁鐘意你，實俾滿分你架啦。」我漫不經心打開手上嘅回饋表。
 
裏面原來夾咗一張水藍色嘅信紙。
 
上款寫住羅凱撒。
 
見到呢三個字，我深信呢封就係唐夕嵐幫我翻譯嘅信。




 
雖然好有衝動即刻開嚟睇，不過張廷宇同小悠都在場嘅呢一刻，唔係咁方便。
 
我偷偷將水藍色信紙放入褲袋。
 
可惜逃唔過張廷宇法眼：「收埋乜嘢！係咪唐夕嵐寫情信俾你！」
 
「…痴線！」
 
「阿帆！你到底拎幾多分啫！」多謝小悠幫我轉移話題。
 
「我而家睇喇，高分過你嘅話你唔好喊呀。」
 
「點會～我都已經拎滿分～」超，得戚到佢！
 




打開回饋表後，我面上表情瞬間凝結。
 
雖然上面啲問題九唔搭八，一睇就知係許正峰出嘅。
 
但重點係個分——
 
果然，而家啲10後真係難服侍…。
 
「幾多分呀幾多分呀！」小悠哄埋嚟偷睇。
 
我即刻將張紙對摺：「太高分！唔想嚇親你！」
 
「即係幾多分呀！」
 
呢個時候，張廷宇電話響。
 
佢望咗一眼電話，走都走唔切：「芝芝話喺家政室焗好咗焦糖燉蛋，問我地食唔食！小悠你去唔去？？？」
 
唔使諗，小悠已經雙眼發光：「去呀去呀去呀！即刻去！bye bye阿帆！！」
 
兩個噪音製造者走咗之後，我耳根得以清靜。
 
重新將對摺嘅回饋表打開，最底寫咗行細字。
 
好彩，張廷宇同小悠走咗。
 
唔係嘅話，應該會俾佢地見到我向上勾起嘅嘴角：



 
「嘖，而家啲10後…」
 
＝＝＝＝＝＝＝＝＝＝＝＝＝＝＝＝＝

1. 你認為配對的學長擁有良好品格。1

2. 你認為配對的學長能作為你的榜樣。1

3. 你認為配對的學長外表整潔。1

4. 你認為此計劃幫助讓你對配對的學長有更深了解。1

5. 如有機會，你會再參與學長學妹計劃。1


 
其他對學長的意見：畫功奇差，然而……整體不錯。