【全劇終】《我喺街執咗個失憶嘅女仔返屋企》: 學生會補選篇：後日談—逐漸改變的二人

一個風和日麗嘅放學後。
 
一個冇人（除咗我）嘅美術室。
 
一首loop緊嘅群青。
 
一幅眼前正在完成嘅畫。
 
一吓嚇我一跳嘅開門聲。
 




一段煩躁又急促嘅腳步。
 
…一個意想不到嘅人來訪。
 
「妖！我頂唔順喇！」唐夕嵐雙手拍響枱面。
 
「…受咩刺激？」我停止畫筆嘅動作。
 
「學生會要做嘅嘢真係好多、好煩！又細碎！我好辛苦先求到會長放我落嚟休息！」
 




「所以，點解休息要嚟美術室呢…？」
 
說時遲那時快，佢喺我對面放滿一枱畫具：「我要畫畫！」
 
「咁你自便…」我繼續集中喺眼前畫作上。
 
然後，我地各自喺度畫畫。
 
美術室裏除咗隱約嘅秒針聲，就只有畫筆觸紙聲。
 




一開始平穩柔和，逐漸變得急促又焦燥…
 
「妖！」唐夕嵐將手上嘅畫紙搓成一團，用力掉落地下。
 
「…又咩料呀？」
 
「畫極都係咁核突！點解我咁蠢架？！」資優兒童居然有面講出呢句說話，有冇諗過在我聽起嚟係一種嘲笑…
 
我放低手上畫筆：「你唔係蠢，係畫畫嗰陣爭咁少少耐性啫。」
 
「你畫緊咩呀？」佢向我投來視線。
 
本來唔諗住俾任何人睇，不過諗起佢頭先發脾氣掉畫紙，或者俾佢睇吓都無妨。
 
等佢知道就算畫得差，都唔需要掉畫紙咁激動，嗯。




 
「算，俾你睇。」
 
佢行埋我隔離，見到我畫緊嘅嘢之後表情一轉。
 
「…漫畫？」佢有啲驚訝。
 
自從畫返畫之後，細個嘅夢想喺腦海深處逐漸浮現。我唔知過咗咁耐，呢個夢想有冇改變，抑或只係俾現實強行壓進海底，裝作不見。所以，我想知道我對畫漫畫嘅感覺。
 
「唔得咩？！想恥笑即管恥笑。」我別過視線。
 
個死妹釘真係老實不客氣：「…哈哈！哈哈哈…哈哈哈！」
 
「…真係咁好笑？」
 




佢好不容易先笑完：「我唔係笑你畫得核突，我係笑你畫嘅內容…」
 
！！！
 
「你係咪讀書太辛苦，所以至會癲咗，幻想自己喺垃圾房執咗個女仔返屋企…媽呀好毒呀…」
 
一陣前所未有嘅羞恥感湧現：「…我幾時有話自己係主角？！」
 
「畫得呢啲內容邊個唔會幻想自己係主角吖…不過，」佢彎低身執返頭先掉落地嘅畫紙，「多謝你。」
 
「多謝我？」
 
「我未蠢到你想安慰我都唔知嘅，作為報答，」佢單一吓眼，「講多樣嘢你聽。」
 
「咩呀？又想恥笑我？」




 
佢嫣然一笑：「我大個唔想做醫生唔想做律師，更加唔想做狗官！我想做嘅係漫畫家！呢個係我一直以嚟嘅夢想！」
 
「…咁睇唔開？」望住唐夕嵐嘅瞳孔，我彷彿見到十年前嘅自己——

 
「嗯！我要做漫畫家！」

 
我嘆口氣，輕拍唐夕嵐嘅頭：「不過咁啱嘅？我都係喎。」
 
佢笑，係一個發自內心嘅笑容。
 
「由今日開始，你就係我師父！」
 




面對呢個突如其來嘅稱呼，我嚇到差啲反櫈：「…咁突然？！當中發生咗咩事我係咪skip咗…」
 
「我地兩個都想做漫畫家，你畫畫年資耐過我，又畫得靚過我，咪即係我師父囉。」
 
「邏輯上會唔會有少少問題…應該咁講，我連自己都未搞得掂，點做你師父？」
 
「只係一個稱呼嚟啫，求你啦，我真係好想有個人喺畫畫上面帶住我…！」
 
「不過…」本來想拒絕，但我忽然諗到一樣嘢，「咪住先。」
 
佢一臉疑惑。
 
「…你而家係學生會副會長呀可？」
 
佢點頭。
 
「…全校除咗羅凱撒同駱以雪之後，就係你大晒架可？」
 
佢一臉得戚：「唔止，因為學校睇重我，就連會長佢地都要忌我幾分～」
 
嚟喇！我嘅時代！
 
只要操控唐夕嵐，連羅凱撒同駱以雪呢兩個魔頭都要聽我指揮！！
 
到時候，學生會嘅幕後話事人就係我。
 
諗到呢度，我笑咗出嚟：「Deal。」
 
與此同時，唐夕嵐發出歡呼聲：「好嘢！」
 
我地握咗一吓手，一段莫名其妙嘅師徒關係（？）亦從今展開。