【全劇終】《我喺街執咗個失憶嘅女仔返屋企》: 學生會補選篇：站於台上的數百秒（下）

全場靜晒。

 
「頭先有人同我講，今次可能係我中學生涯入面唯一一次發光發亮嘅機會，我諗其實佢講得啱…」

 
「話晒咁大個台，咁多人聽你講嘢。」

 
我望向禮堂後方嘅大鐘，時間係一點正。





 
倒回一個星期之前，我喺唔知頭唔知路嘅情況下半被迫加入呢場學生會補選。

 
我接續講落去：

 
「不過，我會企喺度可以話係一個意外。」





 
嗯，毫無理由，直到——

 
「如果我今次成功當選嘅話！你…你…你聖誕節可唔可以同我出街？」
 
「うん、待ってるよ。」

 
此時此刻，珀奈應該都喺台下聽緊我講嘢。





 
「選學生會好麻煩，真係好麻煩，又要諗政綱、又要玩咩學妹計劃。」

 「學校就係咁，總係要迫你面對一堆你唔想面對嘅嘢，功課、考試、俾人鬧…」

 
「大人嘅世界有好多嘢我地根本理解唔到，亦都控制唔到。」

 
「但又諷刺地，每個人都好似需要呢一種回憶。」

 
「後來我先發覺，六年時間眨吓眼就會過，我唔想到死嗰一刻先發現原來中學生涯乜嘢都冇做過。」





 
「…其實我都唔知自己講緊乜，不過呢幾日我喺度諗，學校對我嚟講，究竟係一個點樣嘅存在。」

「而得出嘅答案，就係一個盛載住唔同人嘅回憶，嘅一個地方。各種人、各種發生嘅事…」

 
「可以盡情做自己鍾意嘅事，識到唔同性格嘅人，我覺得呢個先係學校應該有嘅模樣。」

 
「唔單止係常規嘅嘢，仲有…超越常規、超越超越常規…」

 
「收皮收皮收皮！所有大人全部同我收皮！！！」

 




「所以，要俾一個理由嘅話——」

 
我選學生會嘅理由——


 「我相信就算影響唔大，但改變係逐少累積，即使只係好少好少，但到我畢業嗰日，學校一定會——」


 「就係如果選學生會可以幫到呢間學校所有人，唔理係邊個，包括我自己，去喺有限嘅時間入面築構出接近理想嘅回憶，我就願意去做。」

 
即使我地想創造嘅回憶同大人所希望嘅相違背。

 




唔知點解，呢一刻出現喺我腦海嘅，係唐夕嵐畫嘅一幅幅和泉紗霧。

 
「…我講完喇，多謝大家。」

 
我向台下鞠躬，轉身返入後台。

 
踏出一步，背後響起嘅係滿場掌聲，當中夾雜宅男們嘅熱情歡呼：「4號學長！我愛你！！支持你！！」

 
返到後台，小悠熱淚盈眶咁衝埋嚟：「阿帆！！你真係講得好好呀！！」

 




「…有冇咁誇張呀？」

 
「嗯！如果我可以投票嘅話，一定會投俾你！」

 
我將頭髮撥向後：「哈！咁睇嚟，今次我真係贏硬。」

 
「哼，的確唔差，」到羅凱撒走埋嚟，然後托眼鏡：「…頭先嘅，都係你嘅真實想法？」

 
我聳一吓膊頭。

 
「雖然最終結果會俾學生會評分影響，但我衷心祝福你會成為學生會副會長。」講完之後，佢轉身走。

 
全校投票環節好似喺我講完之後就開始咗。

 
不過，結果係點對我唔重要，我淨係知道我要做嘅嘢已經做完。