【全劇終】《我喺街執咗個失憶嘅女仔返屋企》: 學生會補選篇：政綱辯論

每隊有十分鐘時間講自己嘅政綱，之後就可以開始自由挑機（提出質疑）。
 
由唐夕嵐佢地開始先。
 
唐夕嵐打開份政綱，開啟好假的初中生mode，連珠發炮講晒出嚟，內容好正路，都係啲乜鬼野文具雨具借用服務、買嘢有優惠。
 
佢地用咗十一分鐘先講完，全部學生會成員對佢地投以讚賞眼神。
 
到我地。
 




我望住自己嗰幾張尋晚臨急臨忙砌出嚟嘅政綱，將有史以嚟最強勁嘅鳩噏mode開行。
 
「…以上就係我構思嘅政綱。」幾經辛苦終於噏咗5分鐘，之後交俾小悠。
 
我向佢打眼色，示意佢開始講。
 
點知佢有啲愕然。（我希望，只係我睇錯…）
 
然後，佢開口，讀出呢幾日我聽到耳仔生繭嘅兩句說話。
 




第一，將炸豬扒丼引入小食部。
 
第二，將鐘聲變成團子大家族。
 
完。
 
我喺心入面計，佢只不過講咗十八秒。
 
連羅凱撒都好似想恥笑我地咁款嘴角戚戚吓，典型想笑又要忍嘅樣。
 




至於佢隔離嘅許正峰同駱以雪就一個偷偷掩住個嘴笑，一個看似冇笑，但對眼已經發出恥笑嘅訊息。
 
「…我屌。」我輕嘆一聲，隔離坐著個豬隊友，跟住落嚟我一定好L難捱…
 
然後，初中組佢地開始挑機。
 
杜朋也chok咗把好假的肥仔聲線：「關於剛才將炸豬扒丼引入小食部嘅政策，有幾點疑問想提出：首先係定價問題，坊間具質素嘅炸豬扒丼價錢一般由60蚊起跳，但呢個未必係一般中學生負擔到嘅金額，請問你會唔會同小食部就炸豬扒丼嘅售價進行磋商呢？另外第二點就係有關營養嘅問題，近年學校都鼓吹健康飲食嘅風氣，如果喺小食部引入炸豬扒丼，擔唔擔心會對學生整體健康水平構成風險呢？唔該。」
 
羅凱撒佢地嘅視線又回到小悠身上。
 
「唔…er…」er咗幾秒，小悠都未講到野。
 
唔使望都知佢而家肯定一額汗。
 
…等我以神嘅姿態降臨拯救吓佢啦。




 
我一路諗一路講：「回應返頭先幾點：第一關於價格嗰度…」
 
我第二次將鳩噏mode開盡，應該講得唔差，我諗。
 
之後，我乘機反客為主：「反而係頭先你地講到試後活動嗰點，我有少少嘢想問，就係…」
 
今次應機嘅係唐夕嵐，佢不慌不忙地將我提出嘅質疑逐一擊破，連羅凱撒都拍咗幾吓手掌。
 
嘖，果然唔可以睇小天才初中生…
 
就係咁過咗幾輪，我地（除咗小悠之外）都開始進入狀態，睇嚟呢場辯論會鬥得難分難解。