【全劇終】《我喺街執咗個失憶嘅女仔返屋企》: 學生會補選篇：低form候選人

我同小悠冷戰直到放學，去緊學生會途中，佢睬都唔睬我。
 
「喂…有冇嬲咁耐呀…」我死死氣問。
 
換嚟嘅，係佢一句「哼」。
 
推開學生會室門，學生會四條友，連埋唐夕嵐、杜朋也已經坐晒喺度。（題外話，除咗羅凱撒、駱以雪同許正峰，淨低嗰個學生會成員我仲未知佢叫咩名）
 
「身為高form居然遲到，都唔做個好榜樣俾低form睇…」駱以雪眼超超講。
 




「唔好再講無謂嘢喇，即刻開始今日活動，我地今日會…」羅凱撒入正題。
 
我打斷佢：「辯論吖嘛…」
 
佢揚起嘴角：「睇嚟，你已經知道。」
 
望見佢副奸笑樣，又諗起佢同小悠私底下有交流。
 
我大力搖頭：「係咪辯論呀？快啲啦！俾你地見識吓我實力。」
 




許正峰示意我同小悠坐喺一邊。
 
我打個突：「吓？我同佢唔係對手咩？做咩要坐同一邊？」
 
呢個時候，我好似見到唐夕嵐同杜朋也偷偷地笑。
 
羅凱撒推一吓眼鏡：「哼，邊個話今次得你同高小悠兩個候選人？」
 
「你係指…唐夕嵐佢地都有份參選？！」
 




許正峰解答我：「冇錯，今次學生會補選一共四個候選人，因為除咗副會長之外，我地仲需要選外務秘書。」
 
一時醒唔起，學生會一直得四個成員，許正峰俾人革職之後更加得返三個，所以今次補選揀兩條友補上都好正常。
 
不過，我估唔到對手原來唔止小悠，仲有唐夕嵐同肥仔杜朋也！
 
「所以，今日辯論會由高form對戰低form，大家準備好你地嘅大綱未呀？」許正峰繼續講。
 
佢講完，唐夕嵐同杜朋也啪啪兩聲，拎出兩疊成尺厚，相信係政綱嘅文件放喺枱面。
 
身為高form，我地唔可以輸個勢。
 
於是我催小悠：「喂，你個政綱呢？快啲拎嚟！」之所以問小悠，係因為我份政綱得幾版紙，完全唔夠壓場。
 
「…政綱？」小悠摷咗一陣書包，最後拎出一張半皺嘅A4紙，「係咪呢張呀？」




 
「得一頁？得一頁政綱你學人選學生會？！」
 
「…咩、咩呀？你又好好咩？你咪又係得幾頁紙！」
 
「…我得幾頁紙都好過你得一張！仲要巢嘅！」
 
「高form嗰兩個，禁止內訌！」駱以雪一聲令下，我同小悠都唔敢再對鬧。
 
我宣佈，由我同小悠組成嘅高form隊，一開始已經形勢惡劣。