【全劇終】《我喺街執咗個失憶嘅女仔返屋企》: 學生會補選篇：突破口

學生會室正上演緊一場用把口做武器嘅攻防戰。
 
不過，面對兩個強敵，就算我開到個鳩噏mode行一行，都係逐漸變得九唔搭七。
 
先唔計唐夕嵐，估唔到連個肥仔杜朋也認真起嚟都似模似樣。
 
呢啲就係學生會候補副會長嘅實力…
 
再望吓我隔離嘅小悠同佢眼前嘅廢紙。
 




我暗地嘆一口氣（雖然我都唔係好佢好多）。
 
呢個時候，小悠突然同我講：「阿帆！如果朋也佢地一陣再對我政綱有疑問嘅話，你俾我自己答返！」
 
佢眼裏好似出現兩團燃燒住強烈意志嘅火。
 
「…得唔得架你。」我半信半疑。
 
「如果連呢種小障礙就跨越唔到嘅話，學咩人選學生會！」
 




你知就好啦…
 
不過，望住佢一副鬥志旺盛嘅樣，我都唔好意思再吐槽佢。
 
結果，唐夕嵐一開口真係抽秤小悠：「另外仲有一項疑問，頭先你地提到想將學校嘅鐘聲改成一首叫做『團子大家族』嘅旋律，請問相關措施會唔會衍生版權問題？如果會嘅話，請問有咩解決方法？唔該。」
 
「…關、關於版權呢個問題！」講到呢度小悠靜咗，顯然高速思考緊應該點拆。
 
正當我諗住幫吓佢嗰陣，佢開口：「…或、或者，我地可以試吓寫信俾日本嗰邊問…？」就好似知道自己個答案太on9一樣，佢愈講愈細聲。
 




「又或者！我、我地將隻歌改少少，變做自己嘢咪得囉…？」頭先喺佢眼裏嘅烈火，此時此刻已經變咗兩個蚊香。
 
我隱約見到，佢頭頂冒埋星星。
 
唐夕嵐同杜朋也面上出現笑容，係恥笑個笑。
 
我唔忍心由得呢個場面，輕輕拍咗吓小悠嘅膊頭：「夠喇，你好好休息吓啦。」（潛台詞：你收皮啦，柒夠未呀？）
 
時鐘踏正4點半，羅凱撒清一清喉嚨：「好，時間夠，雙方可以作出你地嘅總結。」
 
求其做埋個濕鳩總結之後，我為呢場鬧劇嘅結束鬆一口氣。
 
羅凱撒拍掌：「雙方上演咗一場激烈嘅討論，希望大家可以吸收對方嘅意見，完善自己嘅政綱。冇問題嘅話，今日可以解散。」
 
講完之後，學生會幾個成員先後離場。




 
「唉…好彩叫做有我喺度頂吓，旨意你真係死得。」我乘機串吓執緊嘢嘅小悠。
 
「咩、咩呀！我點知佢地得中二，講啲嘢咁有point架咩！！」
 
「你實在太睇小天才初中生…」望向唐夕嵐嗰邊，佢地已經執好嘢準備行。
 
「天才初中生？」小悠重覆。
 
「你唔知唐夕嵐係資優兒童咩？人地真係有料先嚟參選，你估好似我地咁咩…」諗吓諗吓，都唔知係咪羅凱撒拉我地嚟湊人數…
 
「唔得！」小悠突然大叫。
 
「…咩事？」
 




「我要問吓夕嵐！要用咩方法至可以將團子大家族變做學校鐘聲！佢咁叻嘅話，一定知道！」講完小悠狗衝出咗去。
 
十秒之後，佢狗衝入返嚟。
 
「你問到未？」
 
「佢走得好快，我出到去已經唔見佢喇。」呢個時候小悠攤開手掌，「不過，我喺地下執到呢樣嘢。」
 
「咩嚟架？俾我睇吓？」
 
原來係一抽鎖匙，上面扣咗好多鎖匙扣。
 
其中一條鎖匙上面，寫住2A 唐夕嵐。
 
…係唐夕嵐嘅鎖匙？




 
不過，真係估佢唔到，佢竟然會鍾意…
 
「砰！」學生會嘅大門突然被大力推開，入嚟嘅係唐夕嵐。
 
「夕嵐！你返嚟啱喇，你頭先跌咗嘢呀。」
 
唐夕嵐無視小悠，四圍望咗兩眼，最後視線鎖定喺我手掌上嘅鎖匙。
 
「可唔可以還返俾我？」佢走過嚟問。
 
「…冇話唔可以嘅。」我將鎖匙物歸原主。
 
佢接過之後唔該都冇句，頭也不回咁走咗。
 




望住再度關上嘅學生會大門，我突然閃過一下想法。
 
「佢好似好趕時間…？不如我都係下次先問佢…阿帆，我地走未呀？」小悠孭起書包。
 
「我搵到喇…」
 
「嗯？搵到咩呀？」
 
就係，小悠之前提及過嘅——
 
「唐夕嵐嘅突破口。」