【全劇終】《我喺街執咗個失憶嘅女仔返屋企》: 統測篇：真正目的？

第二日，統測嘅第一日。
 
為咗好好發揮今次努力成果，我晨早起咗身。
 
不過都係唔夠阿妹早，一出房門阿妹已經食緊早餐。
 
順帶一提，今日嘅早餐係阿妹親自炮製嘅Eggs Benedict。
 
趁小悠未瞓醒，食埋佢嗰份先。
 




偷笑緊嗰陣，阿妹叫左我：「哥。」
 
我抬頭：「？」
 
「趁小悠未起身，我有野同你講。」佢一臉凝重，呢個表情已經話俾我知佢想講嘅係咩。
 
「係關於小悠嘅成績？」
 
佢點一吓頭。
 




果然，尋晚嘅讀書會阿妹乘機試探小悠。
 
「我知道喇，你講啦。」
 
「尋晚我地一對一教學嗰陣，我借啲意俾佢做咗呢幾年嘅公開試 past paper。」
 
…唔怪得小悠尋晚叫晒救命咁，我為佢默哀3秒。
 
「咁結果係點？」
 




「我俾佢做咗中英數3科嘅paper 1，除咗中文之外，佢其他都…」講到呢度阿妹故弄玄虛。
 
中六程度嘅試卷。
 
暑假嗰陣我手痕研究過，大概知道cut off喺邊。
 
小悠嘅話，我唔知佢會拎咩分，因為佢根本未考過試。
 
呢個時候，阿妹將下半句講落去：
 
「滿分。」
 
「…滿分？！」
 
「係，滿分。」




 
「撞彩，一定係撞彩。」我加速食手上嘅早餐。
 
「就算點撞彩都唔會撞到滿分掛？加上仲有聯校宿營嗰次，我而家好肯定小悠唔係咁簡單，至少喺讀書方面。」
 
雖然我話小悠係撞彩，但可能早已認同阿妹嘅推測。
 
不過，咁又代表乜野？
 
我諗唔明。
 
唔通話，咁代表佢係個高分低能咩…
 
「至於佢埋你身嘅理由，我需要時間去搞清楚。」阿妹講。
 




「…咩埋我身？你唔好講到佢咁有目的啦。」
 
「我都唔希望佢係有目的，但我真係唔信一個咁叻嘅人會咩都冇諗就住咗喺我地屋企。」
 
「佢真係咩都冇諗，叫佢嚟住嗰個係我。」
 
「咁你呢？你有冇諗過點解係你？條街咁多三唔識七嘅人點解係你遇到佢？」
 
我諗返第一次喺街遇到小悠嘅情形。
 
然後，第一次同阿妹提及呢件事：「就算係我識佢嗰日，都係我主動同佢講野先架。」
 
「…你咪唔好信我講囉！反正你做咩都係為咗佢！」阿妹有啲激動。
 
我即刻殊佢：「你咁大聲一陣俾小悠聽到架喇！」




 
沉默一陣。
 
我開口：「…我仲以為你已經接受咗小悠嘅存在。」
 
「接受同有冇目的係兩回事嚟，我接受佢唔代表佢唔係帶住目的咁嚟，我接受佢都唔代表我唔可以懷疑佢。」
 
講完之後，阿妹起身：「如果佢係嚟傷害你嘅話，到時我會毫不猶疑咁趕佢走。」
 
我笑：「你睇你起晒鋼，小悠都怕咗你喇。」 
 
阿妹嘴一藐，孭起書包就走。
 
我諗咗一陣，叫住佢：「喂！」
 




佢停低。
 
由始至終，我都冇忘記我今次努力嘅理由。
 
「今次統測我會俾心機，唔係為咗小悠。」
 
「…關我咩事？」
 
係為咗一直以嚟都咁為我著想嘅你——呢句咁羞恥嘅野我梗係講唔出。
 
不過，係我心聲。
 
阿妹出咗門口。
 
我食埋小悠件Eggs Benedict之後，都出咗門口。
 
統測之戰，正式開始。