【全劇終】《我喺街執咗個失憶嘅女仔返屋企》: 統測篇：開考

一入校門，撞正駱以雪帶住幾個prefect check校服。
 
我掂行掂過，點知佢一手攔住我。
 
「早晨！」我懶開朗，希望佢俾我過。
 
「唔好以為扮有禮貌就唔使check校服。」今日嘅駱以雪，都係咁鍾意啄住晒。
 
「睇在陣間統測，你放我上去溫書啦…」
 




「唔得！就係你呢啲人趁統測以為犯校規冇人理。」
 
「我幾時有呀？」
 
或者係我太阻街，又或者太大聲，駱以雪拉我埋一邊：「你唔好覺得我唔知，同你一伙嗰個高小悠日日戴colour con返學。」
 
「…嗰對，唔係colour con嚟。」
 
「唔通你想講佢對眼天生紫色？你當我低能架？」
 




「唉…我一言難盡。」應該話，我都唔識講。
 
「唔好扯開話題，你粒頂喉鈕未扣。」佢一手捉住我衫領講。
 
「我扣、我扣囉。」我一邊扣，佢一邊睥我，令我好唔自在。
 
「呀…副會長？你可唔可以唔好望住我扣？」
 
駱以雪冇答我，表情有啲疑惑。
 




然後忽然哄埋嚟，係咁索我個身。
 
「喂！咩料呀？！」後面係牆，所以我冇退路。
 
佢索多兩索，抬頭講：「你個身，有陣好熟嘅味。」
 
「咩味呀？屈完我犯校規仲想屈我搽香水返學呀？」
 
「我喺聯校宿營嗰陣聞過同樣嘅…」
 
佢講到呢度，我突然心頭一虛。
 
呢個時候，駱以雪瞪大眼：「我記得呢陣香味！同高小悠身上嘅一模一樣！」
 
「嘩！嗰邊有人打prefect！」




 
佢即刻擰轉面：「邊度？」
 
喺佢擰返過嚟之前，我趁機上樓。
 
「你個變態佬！小息我實過嚟搵你！」
 
駱以雪喺後面喝我，我梗係唔理佢。
 
返到課室之後，我索吓個衫領。
 
bb油味。
 
…不過，話晒喺小悠張床瞓咗成晚，hi到少少都好合理掛。
 




正因為一件咁平常嘅事，居然俾駱以雪放大嚟講，搞到我突然在意起上嚟。
 
屌，醒呀！
 
半粒鐘之後就要統測喇！
 
我拿拿聲拎本書出嚟，決定唔再諗無謂嘢。
 
 
估唔到，小悠竟然派卷前一秒先返嚟。
 
我用眼神問佢做咩咁遲，但佢冇望過嚟，只係扁晒嘴咁。
 
派卷，今日測嘅係數學。
 




根據阿妹今朝所講，小悠有能力喺公開試卷拎滿分，所以學校嘅應該更加難唔到佢。
 
做到一半嗰陣，我望一望小悠。
 
趴低咗。
 
係一早做完？定放棄狀態？
 
睇真啲，佢一隻手撳住個肚。
 
…唔舒服？
 
望吓個鐘，仲有九個字收卷，我仲有幾題未做。
 
我將視線放返落份卷。




 
集中！集中！集中！
 
小悠頂唔順會自己舉手叫老師架啦。
 
嗯，冇問題嘅。
 
不過，今次份卷出得唔難，至少好多題目係尋晚千惠教過我嘅。
 
呢個時間，唔知佢係咪都統測緊…？
 
或者，我應該sd個msg俾佢，為尋晚件事道歉。
 
 
收卷之後係小息。
 
小悠依然趴喺度，睇個樣唔多掂。
 
「做咩趴喺度？唔落小食部買野食唔似你喎。」我問。
 
佢趴住擰頭，好似講咗句野。
 
「你講咩呀？聽唔到呀。」
 
「…行唔郁。」
 
「咩事行唔郁？腳痛？」
 
「…餓。」
 
「餓？」
 
「…屋企冇野食。」聽佢把聲似就死。
 
我突然諗起頭先食咗阿妹為佢準備嘅班尼迪，加上雪櫃好似真係冇其他野食…
 
「你冇食野就返學呀？」我有啲大反應，雖然唔食早餐喺其他人眼中好閒，但以我認識小悠為數不多嘅日子嚟講，呢樣嘢足以影響到佢性命。
 
佢好虛弱咁點頭：「…我摷勻成屋都搵唔到野食，仲搞到遲到。」
 
「……」
 
我梗係冇將真相話俾佢知，只係作為賠罪拿拿聲衝落小食部買咗兩袋燒賣獻俾佢。
 
我嘆口氣，真係好難相信小悠係阿妹口中嗰個「好叻」嘅人。