【全劇終】《我喺街執咗個失憶嘅女仔返屋企》: 統測篇：月色

以防萬一，我敲咗阿妹房門。
 
開門嘅係小悠。
 
「阿帆！你嚟得啱喇！我溫書溫到就嚟死喇…」
 
我無視佢，走入去搵阿妹。
 
我叫阿妹同千惠聯絡吓，費事佢夜媽媽一個人返去會有咩事。
 




雖然阿妹有啲疑惑，但我打死都唔會講頭先房入面發生嘅事。
 
尤其是，小悠而家喺度。
 
臨走前，我望向書枱，小悠好努力溫緊書。
 
頭先令我一秒間清醒過來，嗰陣熟悉嘅香氣——
 
係同宿營最後嗰日，小悠意外仆落我度嗰陣一模一樣嘅，
 




bb油味。
 
 
返到房冇耐，有人入咗嚟。
 
係小悠。
 
佢打咗個喊露：「原來通宵溫書真係好難，阿帆我瞓覺喇。」
 
「你咪瞓囉。」我瞓喺自己床，面向牆講。




 
「你做咩呀？同千惠鬧交呀？」
 
一聽到千惠個名我即刻彈起身睥住小悠。
 
佢似乎俾我嚇親：「…做咩呀。」
 
佢準備瞓低，我叫住佢：
 
「小悠。」
 
「嗯？」
 
我猶疑兩秒：「…今晚不如掉轉，你瞓床，我瞓地下。」 
 




我咁講，係因為硬係有種…對小悠唔住嘅感覺，雖然啲被係我屋企嘅，但話晒都算係小悠張床，我居然喺佢張床差啲做錯事…
 
「好呀！其實我想試吓瞓你張床好耐，哈哈。」小悠一貫雀躍。
 
「…你真係唔客氣架喎。」口係咁講，但我內心為佢嘅答應鬆一口氣。
 
於是，我地交換瞓覺位置，變成我喺地下，小悠喺床嘅狀態。
 
熄燈之後，我碌嚟碌去瞓唔著，兩個原因：
 
一：腦海依然被頭先嘅事佔據。
 
二：真正瞓喺度先發覺，成個被舖真係充滿住小悠身上嘅bb油味。
 
我又諗返起宿營房入面，嗰個夕陽下嘅意外初吻。




 
為咗分散注意力，我叫左小悠。
 
佢居然未瞓，應返我轉頭。
 
我地傾咗一陣閒計，去到一個自然嘅沉默位，突然有勇氣將道歉說話講出：
 
「小悠，其實我頭先差啲…做咗啲對唔住你嘅事。」
 
雖然聽落好似當左佢係我女朋友咁，但我指嘅係喺佢張床做埋啲咁嘅野。
 
「你做咗啲咩對我唔住呀？」
 
我猶疑一陣：「…我唔想講，不過我應承你，以後唔會喇。」
 




「咁我都唔知係咩事，就算你下次再犯我都唔知啦。」
 
「唔會，真係唔會。」
 
佢坐起身望落嚟：「我點知你真係唔會呀？」
 
我諗咗諗，只係諗到個老套方法，然後伸出手指尾：「勾手指尾？」
 
「…唔要！」
 
「咁你想點？」
 
「算啦，我信住你先，如果你真係有日再犯，你就自己匯報俾我知！」
 
我笑：「多謝你信我。」




 
小悠瞓返低：「我多謝你同我講就真。」
 
「吓，而家我對你唔住，你仲多謝我？」
 
「如果講對唔住嘅話…」講到呢度，佢停咗。
 
直到我以為佢講講吓瞓咗，床上又隱約傳嚟佢把聲：
 
「我都有對唔住阿帆嘅事。」
 
我坐起身：「喂！你以為我聽唔到？」
 
「吓？我頭先有講野咩？」居然仲詐傻…
 
我梗係唔放過佢：「你好講！究竟係食晒雪櫃啲野，定係整爛屋企啲野？」
 
小悠擰咗吓頭。
 
「兩樣都唔係？咁唔通休比又周圍瀨？」
 
佢笑：「都唔係！」
 
「咁係咩呀？」
 
唔知係咪我錯覺，喺月色籠罩嘅氛圍下，小悠臉上蓋上一層朦朧：
 
「…終有一日，阿帆你會知道。」
 
 
如果，當下嘅我察覺到呢個表情同平時嘅佢幾咁違和嘅話…