【全劇終】《我喺街執咗個失憶嘅女仔返屋企》: 統測篇：熟悉的香氣

「其實你係咪鍾意小悠？」
 
面對呢個爆炸性提問，我第一反應係嚇一大跳：
 
「…我鍾意個白痴妹？唔好玩啦！」
 
「我先唔信有人會喺地下舖多張床俾自己用，你呢啲大話用嚟呃細路仔就得。而且…」
 
佢視線落喺下方，我先發現小悠套校服原來喺被舖入面。
 




我即刻行埋去收好佢，但意識到已經太遲。
 
…洗完衫又唔擺好！今次真係多得佢唔少。
 
「你唔係想話俾我聽套校服係你架嘛？」
 
我口窒窒：「…點解會喺度架？一定係小悠唔知幾時攝入去架啦！」
 
可能講完都feel到太假，我決定對千惠坦白。
 




「…冇錯，小悠同我瞓同一間房，我瞓床佢瞓地下。」
 
回想當初，我會咁樣安排係因為小悠身上發生嘅閃靈現象。
 
不過，就算撇除呢樣野，叫佢一個女仔瞓廳我點都唔好意思，嗰陣阿妹又未接受佢，邊可能同佢share一間房，所以呢半間房只可以由我嚟犧牲。
 
「但係，咁樣唔代表我地之間有啲咩。你可以理解為小悠係一個租客，我係包租公，就係咁簡單。」
 
講完之後，千惠突然坐咗落嚟地下嘅床舖。
 




然後，伸手攬住我。
 
佢抬頭，嘴角上揚：「你咁緊張解釋，我可唔可以理解做你開始鍾意我？」
 
「喂！我邊有好緊張解釋呀？」我想坐後啲，但佢箍實唔放。
 
「而家我知道啦，小悠係租客，你係包租公！」
 
「係，你講得冇錯，不過…你可唔可以放開手先…？」
 
佢出奇地聽話，之後嘻嘻笑咗幾野。
 
諗返轉頭，其實我又真係冇需要向佢解釋小悠同我嘅關係，只不過頭先佢問我係咪鍾意小悠嗰陣，有種唔知點形容嘅感覺。
 
況且，我都只係將事實道出。




 
事實小悠真係（冇交租嘅）租客，我就暫借間房俾佢瞓。
 
就係咁。
 
諗到呢度，我先發現千惠望住我。
 
講真，喺呢個距離，呢個場所（我地而家坐喺地下被舖度），加上佢又沖完涼，無論我平時覺得佢幾煩，呢一刻都有啲不知所措嘅感覺。
 
我抓一下臉，以緩解慌張。
 
「講樣野俾你聽吖。」
 
「咩呀？」我即時回應，呢種時候搵啲野講總好過兩條友齋坐。
 




佢哄近我耳邊：「我愈嚟愈鍾意你。」
 
我feel到耳仔發熱。
 
同埋，好似中咗定身術咁郁唔到。
 
直到我地距離得返幾厘米都唔知有冇之後，佢撳咗我落床舖。
 
我發覺喉嚨好乾，唔知點解。
 
「溫書溫到悶悶地，不如我地試吓其他野？」
 
「咳！」屌，唔小心咳咗出聲。
 
佢見到之後又笑。




 
腦入面有樣野逐漸崩潰緊，取而代之係種唔識形容嘅感覺，要比喻嘅話就好似冬天朝早唔捨得喺被竇起身。
 
因為…好似由細到大，都未試過同女仔咁近距離。
 
如果再唔做啲咩，下一秒嘅事態發展應該會同我想像一樣失控。
 
然而，喺我地差唔多碰到嘅一刻，有種熟悉嘅香味傳入鼻腔。
 
並唔係千惠身上嘅沐浴露味，而係…
 
一秒之間，理智俾某啲野喚醒。
 
千惠可能見我有啲奇怪，就問：「做咩呀？」
 




呢一刻，就算佢把聲聽起嚟幾誘人都好，我都知同佢冇可能繼續。
 
我坐起身：「你今晚…都係瞓床啦。」
 
佢跟我一樣坐起身，我趁自己理智再度喪失前衝咗出廳。
 
跑去廚房，飲咗杯水。
 
過咗一陣，千惠都喺房出嚟，已經換返今朝套便服。
 
我想問佢去邊之前，佢首先開口：
 
「我都係唔喺度過夜喇。」
 
本來想問使唔使送佢返去，但時機明顯唔適合，於是我只好講：「…咁你自己小心啲。」